Asebter amenzawi
Mass Bedoui iweṣṣa iwaliyen akken ad d-lhun s usselhu n tudert n yal ass n yimezdaɣen
LEZZAYER – Aneɣlaf n tɣawsiwin n daxel d tmezdayin tidiganin, Noureddine Bedoui, yefka lewṣayat i yiwaliyen akken ad d-lhun d wakk udmawen yerzan asselhu n tudert n yal ass n medden, ɣef wakken ay aɣ-d-ixebber uɣlif.
Lewṣaya tamezwarut terza aḥezzeb mgal waḍḍanen ay ineṭṭḍen d yimihiten n tdawsa, ladɣa imi ay yerna uzɣal deg unebdu yerna la d-yettili ussewjed i tuqqla ɣer uɣerbaz deg 2015-2016.
Aneɣlaf yesmekti-asen-d i yiwaliyen d akken yal aḥezzib yessefk ad d-teddu yid-s tsertit n teɣwalt ara yesḥulfun medden ɣef yimihiten ay d-yezzin fell-as yerna ad as-teg ifadden akken ad yettekki deg uḥezzeb mgal yimihiten-a d waḍḍanen ineṭṭḍen.
Deg wayen yerzan tuqqla ɣer uɣerbaz n 2015-2016, aneɣlaf yebder-d lmeǧhud ay d-yellan deg ufaki n lebni n yiɣerbazen d tesdawiyin. D acu kan, aneɣlaf yenna-d d akken « yella-d uɛeḍḍel d lexṣaṣ » deg waṭas n twilayin, am wakken ay d-iger tiɣri akken ad d-faken tidumṣukiwin deg wakud akken ad mmagren amḍan n yinelmaden imaynuten.
Iweṣṣa daɣ imeẓla (ssrabes) ay terza temsalt akken ad ddmen akk iḥezziben iwatan akken ad tewwlen iɣerbazen d tesdawiyin akken kan ara faken s lebni, am wakken ara faken imuhal (ixeddimen) n uṣeggem n yiɣerbazen ay mazal la ttwaṣeggamen uqbel ma yebda-d useggas aɣurbiz.
Ma d lewṣaya tis kraḍt (3) d atewwel n yiɣerbazen imenza s usseḥmu, imi aṭas seg yiɣerbazen ay yezgan deg tmurt ur sɛin ara lgaz, yerna lexṣaṣ n usseḥmu yettḍurru ibalmuden deg tegrest (ccetwa).
Lewṣaya tis kuẓet (4) nettat d assuddes n yimuras d ussedhu i yigerdan d yilemẓiyen. Lewṣaya-a tettunefk i yimḍebbren n twilayin n yiri n lebḥeṛ yerna yerza athelli « amellil » s yigerdan d yilemẓiyen deg tallit n unebdu n 2015 s ussewjed n wakk ttawilat d yimeẓla (ssrabes) ay yessefken.
Lewṣaya tis sḍiset (6) terza assewjed n tallit n umwan (lexrif) d tegrest. Deg ukatar n uḥezzeb ɣef yimihiten ara d-yekken seg yir lḥal n tegnewt deg snat-a n tsemhuyin, yerna i lmend n uḥraz n tɣellist (laman) n medden, n wayla d usgalef anagdud, aneɣlaf iweṣṣa iwaliyen ad ddmen akk iḥezziben yessefken s usduqqes n tegrawin n uɛawez d uḥezzeb tidiganin ladɣa deg wayen yerzan tagermant deg yibriden d temdinin.
Ma d lewṣaya tis sḍiset terza assefrek n temqebrin, ladɣa deg wayen yerzan assizdeg, aṣeggem d ussemɣer-nsent. Aneɣlaf yessuter, seg yidis niḍen, seg yiwaliyen ad d-fken uqbel 23 Yulyu 2015 iṛabulen yettwafeṣṣlen ɣef lewṣayat-a d yiḥezziben ay yettwaddmen i lmend n waya.
Deg tgara, aneɣlaf yesmekti-d iwaliyen d akken yessefk ad sḥeṛsen akken ad faken lecɣal-a deg wakud ay asen-yettunefken., am wakken ay asen-d-iger tiɣri akken ad d-ttxebbiren ɣef wuguren ay d-ttemlilin deg ussefɛel n yiḥezziben-a akken ad ḍemnen ameẓlu anagdud igerrzen yerna ad sselhun tagnit n tmeddurt n medden deg wakk timnaḍin n tmurt.
