Asebter amenzawi

Amciweṛ gar Yilibiyen: Lezzayer yeɛjeb-as wamek ay ddant lumuṛ

LEZZAYER – Lezzayer tenna-d d akken yeɛjeb-as wamek ay ddant tɣawsiwin deg wayen yerzan amciweṛ aɣelnaw gar Yilibiyen ay d-yellan ddaw tmehla n ugensas uzzig n umaru amatu n Yiɣlanen Yeddukklen i Libya, Bernardino Leon i lmend n ufaki n taluft ay iḥuzan tamurt-a, ɣef wakken ay d-yenna ass n lḥedd uneṭṭaq n uneɣlaf n tɣawsiwin n uzɣar, Abdelaziz Benali Cherif.

« La nettḍafar yerna nerra-d mliḥ ddehn-nneɣ ɣer umciweṛ aɣelnaw gar Yilibiyen ay yenheṛ ugensas uzzig n umaru amatu n Yiɣlanen Yeddukklen i Libya, Mass Bernardino Leon, yerna yeɛjeb-aɣ ufara ay d-yellan deg ukala-a i ussuffeɣ n tmurt-a seg taluft », ay d-yenna uneṭṭaq deg yiwet n tseɣrut i Tnegga n Tɣemsa n Lezzayer.

« Nger tamawt d akken yella-d usurif yelhan ɣer sdat deg ukala n ferru aserti, amelwi n taluft deg Libya yerna nger-d tiɣri i wakk imeggiyen d yidisan ay terza temsalt, menɣir tigrawin ay yettwaḥesben d tirebrabin, akken ad fken azal i nnfeɛ imineg n uɣref alibi yerna yal yiwen ad yeǧǧ seg umur-nnes i wayeḍ, imi d aya ay yessefken i uḍman n tdukli d unnummed n wakal n Libya taweltmat, d uḥraz n tnaya-nnes d umtawa n uɣref-nnes, am wakken d aya ara ireẓmen abrid i lebni n tsuda tidumanin d ussewliwel n wakk tizemmar d tẓewrin i uḍman n urkad deg Libya d yimenɣi amellil mgal rrebrab », ɣef wakken ay d-yenna.

Lezzayer « ad tkemmel, deg yidis-nnes, ad tettekkay deg lebni n talwit tmurt-a taweltmat, tanaragt », ɣef wakken ay d-yerna uneṭṭaq.