Asebter amenzawi

CR Belouizdad la tettṛaju Aoudou

LEZZAYER – CR Belouizdad (Tamɣunt 1ut n tkurt n uḍar n Lezzayer) ad temciweṛ d teɣlamt n JS Ṣawra akken ad as-d-tefk amenṭag abenini Mohamed Aoudou, yerna d wa ara yilin d amarir amaynu aneggaru ara d-tessidef CRB i tsemhuyt-a, ɣef wakken ay d-tenna teɣlamt-a i Tnegga n Yisalan n Lezzayer. « Nesɛa ttiɛad ass n letniyen d uselway n Ṣawra, Mohamed Zerouati, akken ad nessiwel ɣef wawway n Aoudou. Ma nessaweḍ ad t-id-nessidef, ad yili d netta ay d amarir aneggaru ara d-nawey deg unebdu-a », ɣef wakken ay d-yenna unmazul n uselway n CRB i Tnegga n Yisalan n Lezzayer. Taɣlamt n Belouizdad tessadef-d, ar imir-a, 7 n yimrarien imaynuten: Billel Ouali (RAEC Mons/Biljik), imenṭagen Sid Ali Yahia Chérif (JSM Bgayet) ed Mohamed Hicham Nekkache (MC Wehṛan), alemmas amenṭag Feham Bouazza (USM Lezzayer), amḥaddi Amir Belaili (CRB Ɛin Lfekrun), alemmas n unrar Belkacem Niati (USM Belɛebbas) d umenṭag agabuni Bonaventure Sakombi, terḍel-it-id ASO Cclef i yiwet n tsemhuyt.

« Ma ur d-nessadef ara Aoudou, ad d-nessidef Ahmed Gacemi (ay d-yettaxren seg ES Sḍif) », ɣef wakken ay d-yenna Boudoumi, ay d-yernan d akken taɣlamt-nnes teǧǧa takti-nni n ussidef n yimidis azelmaḍ akken ay d-yessuter usleɣmay-nnes, Alain Michel. S tisin n umarir-nni abenini (ay yessadfen 5 n yiswan ɣer JS Ṣawra deg tsemhuyt yezrin), CR Belouizdad ad tesɛu 23 n yimrariren yesɛan turagt. « Mazal xuṣṣent-aɣ snat n turagin ara nesseqdec deg tallit n tegrest. Beddu n tsemhuyt s 23 n yimariren d ayen ara aɣ-yeǧǧen ad d-nessiger cwiṭ n umeṣruf deg tcehṛiyin », ɣef wakken ay d-yenna. CR Belouizdad ad teg annan n ussewjed deg temdint n Yifran, deg Meṛṛuk gar 22 Yulyu d 7 Ɣuct yerna ad turar 5 n temliliyin timmidwanin.