ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵍⴻⵣⵣⴰⵢⴻⵔ ⵜⴻⵏⵏⴰ-ⴷ ⴷ ⴰⴽⴽⴻⵏ ⴰⵎⵜⴰⵡⴰ ⵖⴻⴼ ⵢⵉⵎⵉⵖⴻⵙ ⵏ ⵉⵕⴰⵏ ⵢⵓⴷⴻⴼ ⴷⴻⴳ ⵓⵎⴻⵣⵔⵓⵢ
ⵍⴻⵣⵣⴰⵢⴻⵔ – ⵍⴻⵣⵣⴰⵢⴻⵔ ⵜⵓⵎⴰⵔ (ⵜⴻⴼⵕⴻⵃ) ⴰⵙⵙ ⵏ ⵜⵜⵍⴰⵜⴰ ⵙ ⵓⵎⵜⴰⵡⴰ ⴰⵢ ⵢⴻⵜⵜⵡⴰⵙⵜⴻⵏⵢⴰⵏ ⴳⴰⵔ ⵉⵕⴰⵏ ⴷ ⵜⴻⴳⵔⴰⵡⵜ ⵏ 5+1 ⵖⴻⴼ ⵡⴰⵀⵉⵍ ⵉⵎⵉⵖⴻⵙ ⵏ ⵉⵕⴰⵏ, ⵢⴻⵔⵏⴰ ⵜⴻⵏⵏⴰ-ⴷ ⴷ ⴰⴽⴽⴻⵏ ⴰⵎⵜⴰⵡⴰ-ⴰ ⴷ « ⴰⵎⴻⵣⵔⵓⵢⴰⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵜⵜⵡⴰⴱⴷⴻⵔ ⴷⴻⴳ ⵓⵍⵖⵓ ⵏ ⵓⵖⵍⵉⴼ ⵏ ⵜⵖⴰⵡⵙⵉⵡⵉⵏ ⵏ ⵓⵣⵖⴰⵔ.
« ⵍⴻⵣⵣⴰⵢⴻⵔ ⵜⵓⵎⴰⵔ (ⵜⴻⴼⵕⴻⵃ) ⵙ ⵓⵙⵜⴻⵏⵢⵉ ⵏ ⵓⵎⵜⴰⵡⴰ ⴰⵎⴻⵣⵔⵓⵢⴰⵏ, ⴰⵙⵙ-ⴰ, ⴳⴰⵔ ⵜⴻⴳⴷⵓⴷⴰ ⵜⵉⵙⵍⴰⵎⴰⵏ ⵏ ⵉⵕⴰⵏ ⴷ ⵜⴻⴳⵔⴰⵡⵜ ⵏ 5+1, ⵖⴻⴼ ⵡⴰⵀⵉⵍ ⵉⵎⵉⵖⴻⵙ ⵏ ⵉⵕⴰⵏ ⴷⴻⴼⴼⵉⵔ ⵍⴻⵎⵛⴰⵡⵕⴰⵜ ⵜⵉⵡⴻⵄⵕⴰⵏⵉⵏ ⴰⵢ ⵢⴻⴹⴹⴼⴻⵏ ⴰⵛⵃⴰⵍ ⵏ ⵢⵉⵙⴻⴳⴳⴰⵙⴻⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵔⵏⴰ ⵜⴻⵖⴱⴰⵍⵓⵜ-ⴰ.
« ⵡⴰ ⴷ ⵔⵔⴱⴻⵃ ⴰⵎⴻⵇⵔⴰⵏ ⵉ ⵜⴷⵉⵒⵍⵓⵎⴰⵜⵉⵜ ⴷ ⵓⵎⵛⵉⵡⴻⵕ, ⵢⴻⵔⵏⴰ ⴰⵎⵜⴰⵡⴰ-ⴰ ⴷ ⴰⴼⵔⴰⵏ ⵙ ⵡⴰⵣⴰⵍ-ⵏⵏⴻⵙ ⵉ ⵍⵎⴻⵏⴷ ⵏ ⵜⴰⵍⵡⵉⵜ ⴷ ⵜⵖⴻⵍⵍⵉⵙⵜ (ⵍⴰⵎⴰⵏ) ⵜⴰⴳⵔⴰⵖⵍⴰⵏⵜ ⵉⵎⵉ ⴰⵢ ⴷ-ⵢⴻⵔⵥⴻⵎ ⴰⴱⵔⵉⴷ ⵉ ⵓⵔⴽⴰⴷ ⴷ ⵜⵏⴻⴼⵍⵉⵜ ⵉ ⵜⵎⵓⵔⴰ ⴷ ⵢⵉⵖⴻⵔⴼⴰⵏ ⵏ ⵜⴻⵎⵏⴰⴹⵜ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵜⴻⵖⴱⴰⵍⵓⵜ-ⴰ.
ⴰⵎⵖⵉⵡⴰⵏ ⴰⴳⵔⴰⵖⵍⴰⵏ « ⵢⴻⵙⵙⴻⴼⴽ ⴰⴷ ⴷ-ⵢⴰⴳⴻⵎ ⵙⴻⴳ ⵓⵎⴻⴷⵢⴰ-ⴰ ⴰⵎⴻⵇⵔⴰⵏ ⴰⴽⴽⴻⵏ ⴰⴷ ⵢⴻⵙⵙⴻⵔⴱⴻⵃ ⵍⵎⴻⴵⵀⵓⴷ ⵏ ⵜⵓⴽⴽⵙⴰ ⵏ ⵍⴻⵙⵍⴰⵃⴰⵜ ⵉⵎⵉⵖⵙⴻⵏ, ⴰⵃⴱⴰⵙ ⵏ ⵓⵣⵔⴰⵄ-ⵏⵙⴻⵏ ⴷ ⵓⵙⵜⴻⵄⵕⴻⴼ ⵙ ⵓⵣⵔⴻⴼ ⵏ ⵜⵎⵓⵔⴰ ⴰⴽⴽⴻⵏ ⴰⴷ ⵙⵇⴻⴷⵛⴻⵏⵜ ⵜⴰⵥⵡⴻⵔⵜ ⵜⵉⵎⵉⵖⴻⵙⵜ ⵉ ⵢⵉⵙⵡⴰⵏ ⵉⵎⴻⵍⵡⵉⵢⴻⵏ ⵉ ⵍⴼⴰⵢⴷⴰ ⵏ ⵜⵏⴻⴼⵍⵉⵜ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵍⵖⵓ-ⴰ.
ⵍⴻⵣⵣⴰⵢⴻⵔ « ⵜⵀⴻⵏⵏⴰ » ⴰⴽⴽ ⵉⴷⵉⵙⴰⵏ ⴰⵢ ⵢⴻⵜⵜⴻⴽⴽⴰⵏ ⴷⴻⴳ ⵓⵙⵙⴻⵔⴱⴻⵃ ⵏ ⵍⴻⵎⵛⴰⵡⵕⴰⵜ-ⴰ, ⵢⴻⵔⵏⴰ ⵜⴳⴻⵔ-ⴷ ⵜⵉⵖⵔⵉ ⵉ ⵢⵉⴷⵉⵙⴰⵏ-ⴰ ⴰⴽⴽⴻⵏ « ⴰⴷ ⵅⴻⴷⵎⴻⵏ ⵉ ⵍⵎⴻⵏⴷ ⵏ ⵓⵙⵙⴻⴼⵄⴻⵍ » ⵏ ⵓⵎⵜⴰⵡⴰ-ⴰ ⴰⵢ ⵢⴻⵜⵜⵡⴰⵙⵜⴻⵏⵢⴰⵏ, ⴰⵎ ⵡⴰⴽⴽⴻⵏ ⴰⵢ « ⵜⵄⴰⵡⴻⴷ ⵜⵡⴻⴽⴽⴻⴷ-ⴷ ⴰⴱⴷⴰⴷ-ⵏⵏⴻⵙ ⵖⴻⵔ ⵢⵉⴷⵉⵙ ⵏ ⵍⵎⴻⴵⵀⵓⴷ ⵏ ⵓⵎⵖⵉⵡⴰⵏ ⴰⴳⵔⴰⵖⵍⴰⵏ ⵉ ⵍⵎⴻⵏⴷ ⵏ ⵜⵓⴽⴽⵙⴰ ⵏ ⵍⴻⵙⵍⴰⵃ (ⵉⵎⵉⵖⴻⵙ) ⵢⴻⵔⵏⴰ ⵜⴻⵙⵙⴰⵔⴰⵎ ⴰⵎⵜⴰⵡⴰ-ⴰ ⴰⴷ ⵢⴻⵜⵜⴻⴽⴽⵉ ⴷⴻⴳ ⵜⵓⴽⴽⵙⴰ ⵏ ⵍⴻⵙⵍⴰⵃ-ⴰ ⵙⴻⴳ ⵓⵎⴰⴹⴰⵍ ⴰⴽⴽⴻⵏ ⵎⴰ ⵢⴻⵍⵍⴰ », ⵖⴻⴼ ⵡⴰⴽⴽⴻⵏ ⴰⵢ ⵜⵜ-ⵉⴷ-ⵢⴻⵅⵜⴻⵎ ⵓⵍⵖⵓ-ⴰ.
