Asebter amenzawi

Tinqiḍin timeqranin n umtawa ɣef yimiɣes n Iṛan

LEZZAYER – Stenyant tnezmarin timeqranin d Iṛan ass n ttlata deg Vienna amtawa aneggaru ɣef wahil imiɣes n Iṛan deffir 12 n yiseggasen n lemcawṛat tiweɛṛanin. Amtawa-a gan-t-id akken ad yeḍmen asseqdec n wahil imiɣes iṛani i yiswan n talwit, yerna ma tquder Iṛan aya, ad yettwakkes uɛaqeb-nni agraɣlan ay d-yettwaḥettmen fell-as.

Amtawa ay testenya Iṛan d Tegrawt n P5+1 (Iwanaken Yeddukklen, Rusya, Ccinwa, Fṛansa, Tagelda Yeddukklen d Lalman) d win ara iḍemnen d akken ahil imiɣes n Iṛan ad yettwasseqdec ala i yiswan imelwiyen ddaw tɛessast tagraɣlant. D ti ay d tinqiḍin tigejdanin deg umtawa-a:

Assefɛel n umtawa==

Iṛan d 6-nni n tnezmarin timeqranin ad ttemlilit tikkelt yal sin n yiseggasen akken ad sfeqdent assefɛel n umtawa-nni. Iṛan ad teǧǧ 150 n yimaswaḍen n Tnegga tagraɣlant n teẓwert tabelkimant ad d-rzun fell-as akken ad sfeqden ahil-nnes imiɣes.

Tagensast tunnigt n tɣawsiwin n uzɣar n Tdukli Tuṛufit d tsertit n tɣellist (laman), Federica Mogherini, ad tessemyuddes amahil (axeddim) n tseqqamut ara yesfeqden assefɛel n umtawa n Vienna.

Tanegga tagraɣlant n teẓwert tabelkimant tella yagi deg Iṛan, ad tessefqad, seg-a ɣer da, akk ideggen imiɣsen n Iṛan yerna ttunefken-as yizerfan d imeqranen ugar deg tmurt-a.

Iṛan teqbel ad tefk azref imlesses i yimaswaḍen akken ad adfen ɣer yideggen ay yexḍan ahil imiɣes, ladɣa ideggen iserdasiyen, ma yella imaswaḍen cikken d akken la d-yettili din urmud imiɣes ay yeffɣen i lqanun n Uneggaf amernan n Umtawa n uḥbas n uzraɛ imiɣes ay tɛuhed Iṛan ad t-twemmeṛ yerna ad t-tessefɛel.

Asbuɣer n wuṛanyum==

Iṛan teqbel ur tbennu ara imukan imaynuten i usbuɣer n wuṛanyum i tallit n 15 n yiseggasen. Asbuɣer n wuṛanyum s tesgemmasin d ayen ara ireẓmen abrid i usseqdec n wuṛanyum-nni i tɣawsiwin yemgerraden ɣef leḥsab n ufmiḍi n ullummes n yizuṭup U-235: 3,5 ɣer 5% i userɣu imiɣes, 20% i usseqdec deg tesnajya d 90% i usseqdec deg lbumba tabelkimant. Aḥric-a aneggaru d netta ay ifessusen akk i uxdam.

Iṛan tesɛa, imir-a, 19.000 n tesgemmasin, gar-asent 10.200 ay la ixeddmen, maca, ɣef leḥsab n umtawa-a, yessefk ad d-neqsent 6.104 (d anqas s sin n yimuren ɣef 3) deg 10 n yiseggasen ay d-yetteddun. D acu kan, Iṛan tezmer ad tkemmel anadi-nnes ɣef tesgemmasin yerna tezmer ad tebdu ad tent-id-txeddem seg-a ɣef 8 n yiseggasen, ladɣa tisgemmasin n IR-6, d tid ay iǧehden 10 n tikkal ugar n tesgemmasin ay la tesseqdac imir-a, d tesgemmasin n IR-8 ay iǧehden 20 n tikkal ugar n tid ay tesɛa imir-a.

Aḥbas n uɛaqeb agraɣlan==

ɣef leḥsab n usenfar n umtawa-a, Iṛan ad tesɛu azref ad d-teqqel ɣer tnezzut (ttjaṛa) tagraɣlant, ad d-tettaɣ ttawilat n teknussna yerna ad tesseqdec tiɣbula tigraɣlanin n yidrimen. Tadukli Tuṛufit la tessefray ad tesnerni amɛawen-nnes d Iṛan deg tnezzut, areḍḍal n yidrimen d ussefti.

Seg yidis niḍen, tinezmarin timeqranin ǧǧant targult-nni n Yiɣlanen Yeddukklen ay d-yettwaḥettmen ɣef Iṛan deg wayen yerzan aǧaw n leslaḥ, yerna ad tkemmel tergult-a 5 n yiseggasen, am wakken ay ǧǧan targult n waǧaw n tmeẓdiyin ara ikemmlen 8 n yiseggasen. Lemmer Iṛan ad tagi ad teg ayen ay d-iḥettem fell-as umtawa-a, Tadukli Tuṛufit ad tɛawed ad d-tḥettem aɛaqeb-nnes fell-as, yerna yal tikkelt deg Iṛan ad terkeḍ amtawa n Vienna, ad yettwaḥettem fell-as uɛaqeb n 65 n wussan.