ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵜⵉⵏⵇⵉⴹⵉⵏ ⵜⵉⵎⴻⵇⵔⴰⵏⵉⵏ ⵏ ⵓⵎⵜⴰⵡⴰ ⵖⴻⴼ ⵢⵉⵎⵉⵖⴻⵙ ⵏ ⵉⵕⴰⵏ

ⵍⴻⵣⵣⴰⵢⴻⵔ – ⵙⵜⴻⵏⵢⴰⵏⵜ ⵜⵏⴻⵣⵎⴰⵔⵉⵏ ⵜⵉⵎⴻⵇⵔⴰⵏⵉⵏ ⴷ ⵉⵕⴰⵏ ⴰⵙⵙ ⵏ ⵜⵜⵍⴰⵜⴰ ⴷⴻⴳ ⵠⵉⴻⵏⵏⴰ ⴰⵎⵜⴰⵡⴰ ⴰⵏⴻⴳⴳⴰⵔⵓ ⵖⴻⴼ ⵡⴰⵀⵉⵍ ⵉⵎⵉⵖⴻⵙ ⵏ ⵉⵕⴰⵏ ⴷⴻⴼⴼⵉⵔ 12 ⵏ ⵢⵉⵙⴻⴳⴳⴰⵙⴻⵏ ⵏ ⵍⴻⵎⵛⴰⵡⵕⴰⵜ ⵜⵉⵡⴻⵄⵕⴰⵏⵉⵏ. ⴰⵎⵜⴰⵡⴰ-ⴰ ⴳⴰⵏ-ⵜ-ⵉⴷ ⴰⴽⴽⴻⵏ ⴰⴷ ⵢⴻⴹⵎⴻⵏ ⴰⵙⵙⴻⵇⴷⴻⵛ ⵏ ⵡⴰⵀⵉⵍ ⵉⵎⵉⵖⴻⵙ ⵉⵕⴰⵏⵉ ⵉ ⵢⵉⵙⵡⴰⵏ ⵏ ⵜⴰⵍⵡⵉⵜ, ⵢⴻⵔⵏⴰ ⵎⴰ ⵜⵇⵓⴷⴻⵔ ⵉⵕⴰⵏ ⴰⵢⴰ, ⴰⴷ ⵢⴻⵜⵜⵡⴰⴽⴽⴻⵙ ⵓⵄⴰⵇⴻⴱ-ⵏⵏⵉ ⴰⴳⵔⴰⵖⵍⴰⵏ ⴰⵢ ⴷ-ⵢⴻⵜⵜⵡⴰⵃⴻⵜⵜⵎⴻⵏ ⴼⴻⵍⵍ-ⴰⵙ.

ⴰⵎⵜⴰⵡⴰ ⴰⵢ ⵜⴻⵙⵜⴻⵏⵢⴰ ⵉⵕⴰⵏ ⴷ ⵜⴻⴳⵔⴰⵡⵜ ⵏ ⵒ5+1 (ⵉⵡⴰⵏⴰⴽⴻⵏ ⵢⴻⴷⴷⵓⴽⴽⵍⴻⵏ, ⵔⵓⵙⵢⴰ, ⵛⵛⵉⵏⵡⴰ, ⴼⵕⴰⵏⵙⴰ, ⵜⴰⴳⴻⵍⴷⴰ ⵢⴻⴷⴷⵓⴽⴽⵍⴻⵏ ⴷ ⵍⴰⵍⵎⴰⵏ) ⴷ ⵡⵉⵏ ⴰⵔⴰ ⵉⴹⴻⵎⵏⴻⵏ ⴷ ⴰⴽⴽⴻⵏ ⴰⵀⵉⵍ ⵉⵎⵉⵖⴻⵙ ⵏ ⵉⵕⴰⵏ ⴰⴷ ⵢⴻⵜⵜⵡⴰⵙⵙⴻⵇⴷⴻⵛ ⴰⵍⴰ ⵉ ⵢⵉⵙⵡⴰⵏ ⵉⵎⴻⵍⵡⵉⵢⴻⵏ ⴷⴷⴰⵡ ⵜⵄⴻⵙⵙⴰⵙⵜ ⵜⴰⴳⵔⴰⵖⵍⴰⵏⵜ. ⴷ ⵜⵉ ⴰⵢ ⴷ ⵜⵉⵏⵇⵉⴹⵉⵏ ⵜⵉⴳⴻⵊⴷⴰⵏⵉⵏ ⴷⴻⴳ ⵓⵎⵜⴰⵡⴰ-ⴰ:

ⴰⵙⵙⴻⴼⵄⴻⵍ ⵏ ⵓⵎⵜⴰⵡⴰ==

ⵉⵕⴰⵏ ⴷ 6-ⵏⵏⵉ ⵏ ⵜⵏⴻⵣⵎⴰⵔⵉⵏ ⵜⵉⵎⴻⵇⵔⴰⵏⵉⵏ ⴰⴷ ⵜⵜⴻⵎⵍⵉⵍⵉⵜ ⵜⵉⴽⴽⴻⵍⵜ ⵢⴰⵍ ⵙⵉⵏ ⵏ ⵢⵉⵙⴻⴳⴳⴰⵙⴻⵏ ⴰⴽⴽⴻⵏ ⴰⴷ ⵙⴼⴻⵇⴷⴻⵏⵜ ⴰⵙⵙⴻⴼⵄⴻⵍ ⵏ ⵓⵎⵜⴰⵡⴰ-ⵏⵏⵉ. ⵉⵕⴰⵏ ⴰⴷ ⵜⴻⴵⴵ 150 ⵏ ⵢⵉⵎⴰⵙⵡⴰⴹⴻⵏ ⵏ ⵜⵏⴻⴳⴳⴰ ⵜⴰⴳⵔⴰⵖⵍⴰⵏⵜ ⵏ ⵜⴻⵥⵡⴻⵔⵜ ⵜⴰⴱⴻⵍⴽⵉⵎⴰⵏⵜ ⴰⴷ ⴷ-ⵔⵣⵓⵏ ⴼⴻⵍⵍ-ⴰⵙ ⴰⴽⴽⴻⵏ ⴰⴷ ⵙⴼⴻⵇⴷⴻⵏ ⴰⵀⵉⵍ-ⵏⵏⴻⵙ ⵉⵎⵉⵖⴻⵙ.

ⵜⴰⴳⴻⵏⵙⴰⵙⵜ ⵜⵓⵏⵏⵉⴳⵜ ⵏ ⵜⵖⴰⵡⵙⵉⵡⵉⵏ ⵏ ⵓⵣⵖⴰⵔ ⵏ ⵜⴷⵓⴽⵍⵉ ⵜⵓⵕⵓⴼⵉⵜ ⴷ ⵜⵙⴻⵔⵜⵉⵜ ⵏ ⵜⵖⴻⵍⵍⵉⵙⵜ (ⵍⴰⵎⴰⵏ), ⴼⴻⴷⴻⵔⵉⵛⴰ ⵎⵧⴳⵀⴻⵔⵉⵏⵉ, ⴰⴷ ⵜⴻⵙⵙⴻⵎⵢⵓⴷⴷⴻⵙ ⴰⵎⴰⵀⵉⵍ (ⴰⵅⴻⴷⴷⵉⵎ) ⵏ ⵜⵙⴻⵇⵇⴰⵎⵓⵜ ⴰⵔⴰ ⵢⴻⵙⴼⴻⵇⴷⴻⵏ ⴰⵙⵙⴻⴼⵄⴻⵍ ⵏ ⵓⵎⵜⴰⵡⴰ ⵏ ⵠⵉⴻⵏⵏⴰ.

ⵜⴰⵏⴻⴳⴳⴰ ⵜⴰⴳⵔⴰⵖⵍⴰⵏⵜ ⵏ ⵜⴻⵥⵡⴻⵔⵜ ⵜⴰⴱⴻⵍⴽⵉⵎⴰⵏⵜ ⵜⴻⵍⵍⴰ ⵢⴰⴳⵉ ⴷⴻⴳ ⵉⵕⴰⵏ, ⴰⴷ ⵜⴻⵙⵙⴻⴼⵇⴰⴷ, ⵙⴻⴳ-ⴰ ⵖⴻⵔ ⴷⴰ, ⴰⴽⴽ ⵉⴷⴻⴳⴳⴻⵏ ⵉⵎⵉⵖⵙⴻⵏ ⵏ ⵉⵕⴰⵏ ⵢⴻⵔⵏⴰ ⵜⵜⵓⵏⴻⴼⴽⴻⵏ-ⴰⵙ ⵢⵉⵣⴻⵔⴼⴰⵏ ⴷ ⵉⵎⴻⵇⵔⴰⵏⴻⵏ ⵓⴳⴰⵔ ⴷⴻⴳ ⵜⵎⵓⵔⵜ-ⴰ.

ⵉⵕⴰⵏ ⵜⴻⵇⴱⴻⵍ ⴰⴷ ⵜⴻⴼⴽ ⴰⵣⵔⴻⴼ ⵉⵎⵍⴻⵙⵙⴻⵙ ⵉ ⵢⵉⵎⴰⵙⵡⴰⴹⴻⵏ ⴰⴽⴽⴻⵏ ⴰⴷ ⴰⴷⴼⴻⵏ ⵖⴻⵔ ⵢⵉⴷⴻⴳⴳⴻⵏ ⴰⵢ ⵢⴻⵅⴹⴰⵏ ⴰⵀⵉⵍ ⵉⵎⵉⵖⴻⵙ, ⵍⴰⴷⵖⴰ ⵉⴷⴻⴳⴳⴻⵏ ⵉⵙⴻⵔⴷⴰⵙⵉⵢⴻⵏ, ⵎⴰ ⵢⴻⵍⵍⴰ ⵉⵎⴰⵙⵡⴰⴹⴻⵏ ⵛⵉⴽⴽⴻⵏ ⴷ ⴰⴽⴽⴻⵏ ⵍⴰ ⴷ-ⵢⴻⵜⵜⵉⵍⵉ ⴷⵉⵏ ⵓⵔⵎⵓⴷ ⵉⵎⵉⵖⴻⵙ ⴰⵢ ⵢⴻⴼⴼⵖⴻⵏ ⵉ ⵍⵇⴰⵏⵓⵏ ⵏ ⵓⵏⴻⴳⴳⴰⴼ ⴰⵎⴻⵔⵏⴰⵏ ⵏ ⵓⵎⵜⴰⵡⴰ ⵏ ⵓⵃⴱⴰⵙ ⵏ ⵓⵣⵔⴰⵄ ⵉⵎⵉⵖⴻⵙ ⴰⵢ ⵜⵄⵓⵀⴻⴷ ⵉⵕⴰⵏ ⴰⴷ ⵜ-ⵜⵡⴻⵎⵎⴻⵕ ⵢⴻⵔⵏⴰ ⴰⴷ ⵜ-ⵜⴻⵙⵙⴻⴼⵄⴻⵍ.

ⴰⵙⴱⵓⵖⴻⵔ ⵏ ⵡⵓⵕⴰⵏⵢⵓⵎ==

ⵉⵕⴰⵏ ⵜⴻⵇⴱⴻⵍ ⵓⵔ ⵜⴱⴻⵏⵏⵓ ⴰⵔⴰ ⵉⵎⵓⴽⴰⵏ ⵉⵎⴰⵢⵏⵓⵜⴻⵏ ⵉ ⵓⵙⴱⵓⵖⴻⵔ ⵏ ⵡⵓⵕⴰⵏⵢⵓⵎ ⵉ ⵜⴰⵍⵍⵉⵜ ⵏ 15 ⵏ ⵢⵉⵙⴻⴳⴳⴰⵙⴻⵏ. ⴰⵙⴱⵓⵖⴻⵔ ⵏ ⵡⵓⵕⴰⵏⵢⵓⵎ ⵙ ⵜⴻⵙⴳⴻⵎⵎⴰⵙⵉⵏ ⴷ ⴰⵢⴻⵏ ⴰⵔⴰ ⵉⵔⴻⵥⵎⴻⵏ ⴰⴱⵔⵉⴷ ⵉ ⵓⵙⵙⴻⵇⴷⴻⵛ ⵏ ⵡⵓⵕⴰⵏⵢⵓⵎ-ⵏⵏⵉ ⵉ ⵜⵖⴰⵡⵙⵉⵡⵉⵏ ⵢⴻⵎⴳⴻⵔⵔⴰⴷⴻⵏ ⵖⴻⴼ ⵍⴻⵃⵙⴰⴱ ⵏ ⵓⴼⵎⵉⴹⵉ ⵏ ⵓⵍⵍⵓⵎⵎⴻⵙ ⵏ ⵢⵉⵣⵓⵟⵓⵒ ⵓ-235: 3,5 ⵖⴻⵔ 5% ⵉ ⵓⵙⴻⵔⵖⵓ ⵉⵎⵉⵖⴻⵙ, 20% ⵉ ⵓⵙⵙⴻⵇⴷⴻⵛ ⴷⴻⴳ ⵜⴻⵙⵏⴰⵊⵢⴰ ⴷ 90% ⵉ ⵓⵙⵙⴻⵇⴷⴻⵛ ⴷⴻⴳ ⵍⴱⵓⵎⴱⴰ ⵜⴰⴱⴻⵍⴽⵉⵎⴰⵏⵜ. ⴰⵃⵔⵉⵛ-ⴰ ⴰⵏⴻⴳⴳⴰⵔⵓ ⴷ ⵏⴻⵜⵜⴰ ⴰⵢ ⵉⴼⴻⵙⵙⵓⵙⴻⵏ ⴰⴽⴽ ⵉ ⵓⵅⴷⴰⵎ.

ⵉⵕⴰⵏ ⵜⴻⵙⵄⴰ, ⵉⵎⵉⵔ-ⴰ, 19.000 ⵏ ⵜⴻⵙⴳⴻⵎⵎⴰⵙⵉⵏ, ⴳⴰⵔ-ⴰⵙⴻⵏⵜ 10.200 ⴰⵢ ⵍⴰ ⵉⵅⴻⴷⴷⵎⴻⵏ, ⵎⴰⵛⴰ, ⵖⴻⴼ ⵍⴻⵃⵙⴰⴱ ⵏ ⵓⵎⵜⴰⵡⴰ-ⴰ, ⵢⴻⵙⵙⴻⴼⴽ ⴰⴷ ⴷ-ⵏⴻⵇⵙⴻⵏⵜ 6.104 (ⴷ ⴰⵏⵇⴰⵙ ⵙ ⵙⵉⵏ ⵏ ⵢⵉⵎⵓⵔⴻⵏ ⵖⴻⴼ 3) ⴷⴻⴳ 10 ⵏ ⵢⵉⵙⴻⴳⴳⴰⵙⴻⵏ ⴰⵢ ⴷ-ⵢⴻⵜⵜⴻⴷⴷⵓⵏ. ⴷ ⴰⵛⵓ ⴽⴰⵏ, ⵉⵕⴰⵏ ⵜⴻⵣⵎⴻⵔ ⴰⴷ ⵜⴽⴻⵎⵎⴻⵍ ⴰⵏⴰⴷⵉ-ⵏⵏⴻⵙ ⵖⴻⴼ ⵜⴻⵙⴳⴻⵎⵎⴰⵙⵉⵏ ⵢⴻⵔⵏⴰ ⵜⴻⵣⵎⴻⵔ ⴰⴷ ⵜⴻⴱⴷⵓ ⴰⴷ ⵜⴻⵏⵜ-ⵉⴷ-ⵜⵅⴻⴷⴷⴻⵎ ⵙⴻⴳ-ⴰ ⵖⴻⴼ 8 ⵏ ⵢⵉⵙⴻⴳⴳⴰⵙⴻⵏ, ⵍⴰⴷⵖⴰ ⵜⵉⵙⴳⴻⵎⵎⴰⵙⵉⵏ ⵏ ⵉⵔ-6, ⴷ ⵜⵉⴷ ⴰⵢ ⵉⴵⴻⵀⴷⴻⵏ 10 ⵏ ⵜⵉⴽⴽⴰⵍ ⵓⴳⴰⵔ ⵏ ⵜⴻⵙⴳⴻⵎⵎⴰⵙⵉⵏ ⴰⵢ ⵍⴰ ⵜⴻⵙⵙⴻⵇⴷⴰⵛ ⵉⵎⵉⵔ-ⴰ, ⴷ ⵜⴻⵙⴳⴻⵎⵎⴰⵙⵉⵏ ⵏ ⵉⵔ-8 ⴰⵢ ⵉⴵⴻⵀⴷⴻⵏ 20 ⵏ ⵜⵉⴽⴽⴰⵍ ⵓⴳⴰⵔ ⵏ ⵜⵉⴷ ⴰⵢ ⵜⴻⵙⵄⴰ ⵉⵎⵉⵔ-ⴰ.

ⴰⵃⴱⴰⵙ ⵏ ⵓⵄⴰⵇⴻⴱ ⴰⴳⵔⴰⵖⵍⴰⵏ==

ⵖⴻⴼ ⵍⴻⵃⵙⴰⴱ ⵏ ⵓⵙⴻⵏⴼⴰⵔ ⵏ ⵓⵎⵜⴰⵡⴰ-ⴰ, ⵉⵕⴰⵏ ⴰⴷ ⵜⴻⵙⵄⵓ ⴰⵣⵔⴻⴼ ⴰⴷ ⴷ-ⵜⴻⵇⵇⴻⵍ ⵖⴻⵔ ⵜⵏⴻⵣⵣⵓⵜ (ⵜⵜⵊⴰⵕⴰ) ⵜⴰⴳⵔⴰⵖⵍⴰⵏⵜ, ⴰⴷ ⴷ-ⵜⴻⵜⵜⴰⵖ ⵜⵜⴰⵡⵉⵍⴰⵜ ⵏ ⵜⴻⴽⵏⵓⵙⵙⵏⴰ ⵢⴻⵔⵏⴰ ⴰⴷ ⵜⴻⵙⵙⴻⵇⴷⴻⵛ ⵜⵉⵖⴱⵓⵍⴰ ⵜⵉⴳⵔⴰⵖⵍⴰⵏⵉⵏ ⵏ ⵢⵉⴷⵔⵉⵎⴻⵏ. ⵜⴰⴷⵓⴽⵍⵉ ⵜⵓⵕⵓⴼⵉⵜ ⵍⴰ ⵜⴻⵙⵙⴻⴼⵔⴰⵢ ⴰⴷ ⵜⴻⵙⵏⴻⵔⵏⵉ ⴰⵎⵄⴰⵡⴻⵏ-ⵏⵏⴻⵙ ⴷ ⵉⵕⴰⵏ ⴷⴻⴳ ⵜⵏⴻⵣⵣⵓⵜ, ⴰⵔⴻⴹⴹⴰⵍ ⵏ ⵢⵉⴷⵔⵉⵎⴻⵏ ⴷ ⵓⵙⵙⴻⴼⵜⵉ.

ⵙⴻⴳ ⵢⵉⴷⵉⵙ ⵏⵉⴹⴻⵏ, ⵜⵉⵏⴻⵣⵎⴰⵔⵉⵏ ⵜⵉⵎⴻⵇⵔⴰⵏⵉⵏ ⴵⴵⴰⵏⵜ ⵜⴰⵔⴳⵓⵍⵜ-ⵏⵏⵉ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⴰⵢ ⴷ-ⵢⴻⵜⵜⵡⴰⵃⴻⵜⵜⵎⴻⵏ ⵖⴻⴼ ⵉⵕⴰⵏ ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⴰⴵⴰⵡ ⵏ ⵍⴻⵙⵍⴰⵃ, ⵢⴻⵔⵏⴰ ⴰⴷ ⵜⴽⴻⵎⵎⴻⵍ ⵜⴻⵔⴳⵓⵍⵜ-ⴰ 5 ⵏ ⵢⵉⵙⴻⴳⴳⴰⵙⴻⵏ, ⴰⵎ ⵡⴰⴽⴽⴻⵏ ⴰⵢ ⴵⴵⴰⵏ ⵜⴰⵔⴳⵓⵍⵜ ⵏ ⵡⴰⴵⴰⵡ ⵏ ⵜⵎⴻⵥⴷⵉⵢⵉⵏ ⴰⵔⴰ ⵉⴽⴻⵎⵎⵍⴻⵏ 8 ⵏ ⵢⵉⵙⴻⴳⴳⴰⵙⴻⵏ. ⵍⴻⵎⵎⴻⵔ ⵉⵕⴰⵏ ⴰⴷ ⵜⴰⴳⵉ ⴰⴷ ⵜⴻⴳ ⴰⵢⴻⵏ ⴰⵢ ⴷ-ⵉⵃⴻⵜⵜⴻⵎ ⴼⴻⵍⵍ-ⴰⵙ ⵓⵎⵜⴰⵡⴰ-ⴰ, ⵜⴰⴷⵓⴽⵍⵉ ⵜⵓⵕⵓⴼⵉⵜ ⴰⴷ ⵜⵄⴰⵡⴻⴷ ⴰⴷ ⴷ-ⵜⵃⴻⵜⵜⴻⵎ ⴰⵄⴰⵇⴻⴱ-ⵏⵏⴻⵙ ⴼⴻⵍⵍ-ⴰⵙ, ⵢⴻⵔⵏⴰ ⵢⴰⵍ ⵜⵉⴽⴽⴻⵍⵜ ⴷⴻⴳ ⵉⵕⴰⵏ ⴰⴷ ⵜⴻⵔⴽⴻⴹ ⴰⵎⵜⴰⵡⴰ ⵏ ⵠⵉⴻⵏⵏⴰ, ⴰⴷ ⵢⴻⵜⵜⵡⴰⵃⴻⵜⵜⴻⵎ ⴼⴻⵍⵍ-ⴰⵙ ⵓⵄⴰⵇⴻⴱ ⵏ 65 ⵏ ⵡⵓⵙⵙⴰⵏ.