Asebter amenzawi

Imḍebber n Yiɣlanen Yeddukklen iɛawed iger-d tiɣri i uḥbas n yimenɣi deg Sudan n Unẓul

ADDIS-ABEBA – Amaru amatu n Yiɣlanen Yeddukklen, Ban Ki-moon, iger-d tiɣri, tikkelt niḍen ass n letniyen akken ad ifak yimenɣi deg Sudan n Unẓul.

Imḍebber n Yiɣlanen Yeddukklen yedda ɣer Addis-Abeba, tamaneɣt n ityupya, akken ad yettekki deg usarag n ussidrem n tneflit.

Deg yiwen n usarag n tɣemsa deffir n yiwet n temlilit ɣef Sudan n Unẓul ay d-yellan gar uneɣlaf amenzu n Ityupya, Hailemariam Desalegn d tselwayt n Tseqqamut n Tdukli Tafriqit, Nkosazana Dlamini Zuma, Mass Ban yenna-d: « Ass-a, ad d-greɣ tiɣri i uselway Kiir d unmazul n uselway aqbur Aduktur Riek Machar akken ad ǧǧen ṭṭrad deg lfayda n yimezdaɣen n tmurt d uzekka n Sudan n Unẓul ».

« Greɣ-asen-d tiɣri akken ad msefhamen, ad d-meslen amtawa yerna ad qadren iṛeggimen-nsen akken ad ḥudden imezdaɣen n Unẓul n Sudan », ɣef wakken ay d-yenna.

Tagnit talsant deg Sudan n Unẓul tuweḍ ɣer twaɣit, deg wakud deg ugar n 1,6 d amelyun n yimdanen ay irewlen seg yixxamen-nsen, ugar n 600.000 niḍen ay irewlen ɣer tmura tinaragin (tijiratin) yerna azal n 4,6 n yimelyunen n yimdanen ay ixuṣṣen učči, ɣef wakken ay yesḥassef Mass Ban. « Mazal tezmer Sudan n Unẓul ad d-tettwassukkes ma qeblen sin n yidisan ay yemxaṣamen ad d-kken nnig nnfeɛ-nsen, yerna ad sɛun tabɣest d tmelwi », ɣef wakken ay d-yenna umaru amatu. ɣef leḥsab-nnes, talwit deg Sudan n Unẓul teḥwaǧ daɣ aɛawen n yinaragen-nnes (ljiran). « Ad d-greɣ tiɣri i uselway (n Uganda) Museveni d uselway (n Sudan) Bachir akken ad sqedcen tazrirt-nsen akken ad ssiwḍen idisan ay terza temsalt ad faken imenɣi-a », ɣef wakken ay d-yerna.

tṭrad aɣarim d tekriḍt deg Sudan n Unẓul bdan-d deg Dujembeṛ n 2013. Ula ma yella-d lmeǧhud aserti i uḥbas n ṭṭrad-a, werɛad ur d-yegli s wacemma n lfayda.