Asebter amenzawi

Lezzayer d tacrikt « s wazal-nnes » n Kurya n Unẓul deg Tefriqt (aneɣlaf akuri n tɣawsiwin n beṛṛa)

LEZZAYER – Lezzayer d tacrikt « s wazal-nnes » n Kurya n UnẒul deg Tefriqt deg yinurar yemgerraden, ɣef wakken ay d-yenna ass n laṛebɛa deg Lezzayer Tamaneɣt uneɣlaf n tɣawsiwin n uzɣar n Tegduda n Kurya, Yun Byung-Se.

« Lezzayer d tacrikt-nneɣ ay yesɛan azal deg Tefriqt yerna d nettat ay d tamurt tafriqit tawḥidt wukud nesɛa tasuddest n ticcurka deg yinurar yemgerraden », ɣef wakken ay d-yenna i tɣemsa Mass Byung-Se mi d-yuweḍ ɣer unafag agraɣlan n Houari Boumediene.

Aneɣlaf n tɣawsiwin n uzɣar n Kurya n Unẓul yenna-d, deg tegnit-a, d akken yessaram ad d-yerzu Ramtane Lamamra, aneɣlaf n uwanak, aneɣlaf n tɣawsiwin n uzɣar d umyalel agraɣlan, ɣef Kurya n Unẓul akken ad kemmlen snernin amyalel (amɛawen) gar snat-a n tmura.

Seg yidis niḍen, Mass Byung-Se yeckeṛ-d dduṛ ay « yesɛan azal » ay yetturar Mass Lamamra deg Tefriqt, am wakken ay d-yenna d akken assaɣen gar Lezzayer d Kurya n Unẓul « fazen ».

Mass Byung-Se yemmuger-d Mass Lamamra mi d-yuweḍ ɣer Lezzayer Tamaneɣt.

Tirzi n Mass Byung-Se ɣef Lezzayer ad teḍḍef sin n wussan yerna tudef deg ukatar n usseǧhed n umciweṛ aserti n uswir unnig gar snat-a n tmura, ɣef wakken ay d-yenna ass n ttlata uneɣlaf n tɣawsiwin n uzɣar.

Ad tili daɣ terzi-a d tagnit tamaynut ara faṛsen yimḍebbren idzayriyen d wid n Kurya n Unẓul akken ad d-ssukken tiṭ ɣef wassaɣen ucriken yerna ad mbaddalen timuɣliwin ɣef temsal n nnfeɛ ucrik yerzan tamnaḍt d umaḍal.

Aneɣlaf n tɣawsiwin n uzɣar n Kurya n Unẓul ad d-teddu yid-s tmagla d tameqrant yerna ad awal d yimyagren ara d-yilin gar sin-a n yidisan d wid ara ireẓmen abrid i ussalqey d unewweɛ n umyalel (amɛawen) gar snat-a n tmura s ṛṛuḥ n tseɣrut-nni n ticcurka tasuddsant ay yettwastenyan gar yiselwayen n Lezzayer d Kurya n Unẓul deg 2006, ɣef wakken ay d-yenna uɣlif.