Asebter amenzawi
Lamamra yefka tabṛat n uselway Bouteflika i uselway atunsi
LEZZAYER –Aneɣlaf n uwanak, aneɣlaf n tɣawsiwin n uzɣar d umyalel agraɣlan, Ramtane Lamamra, yefka ass n ttlata i uselway atunsi Beji Caid Essebsi yiwet n tebṛat n uselway Abdelaziz Bouteflika deg ukatar n umciweṛ gar snat-a n tmura, ɣef wakken ay d-yenna ass n laṛebɛa yiwen n ulɣu n uɣlif n tɣawsiwin n uzɣar.
Mass Lamamra yefka tabṛat-a deg yiwen n umyager d uselway atunsi ay d-yellan i lmend n terzi-nnes n umahil (axeddim) ay iga ussan n 13 d 14 Yulyu ɣef Tunes, d tirzi ay yudfen n ukatar n « umciweṛ gar snat-a n tmura deg tegnit-a tuzzigt d yicriqqrwen ay d-iḥettem rrebrab, rnu ɣer waya tagnit deg yessefk ad d-yili umagil i usseǧhed n wassaɣen ucriken d ussugget n ussemyuddes gar snat-a n tmura tiysetmatin », ɣef wakken ay d-yenna ulɣu-a.
Amyager-a yeǧǧa sin-a n yidisan ad d-ssukken tiṭ ɣef « waṭas n temsal n llsas yesɛan nnfeɛ ucrik ».
Mass Lamamra yemmuger-it yiɣef n unabaḍ atunsi, Habib Essid yerna yessawel daɣ d umtil-nnes atunsi, Taieb Baccouche. Deg yiwet n tseɣrut i tɣemsa, Mass Lamamra yennan-d d akken « Lezzayer tebded yerna temsetlel d Tunes deg tegnit-a taweɛṛant, ladɣa seg wasmi ay d-tella txazabit-nni tarebrabt tucmit ay iḥuzan tamdint n Susa ».
Aneɣlaf n tɣawsiwin n uzɣar n Lezzayer iɛezza, daɣ, imḍebbren itunsiyen yerna yesenfali-asen-d abdad n Lezzayer ɣer yidis n lmeǧhud d usfel ay ttakfen yiɣallen n tɣellist (laman) d yigen n Tunes », yerna yenna-d d akken « aɣref atunsi yezmer ad yeṣber deg yimenɣi-nnes mgal rrebrab ».
« Rrebrab labudd ad yettwernu acku aya d taɣawsa yexḍan azalen-nneɣ », ɣef wakken ay d-iwekked Mass Lamamra, ay d-yernan d akken « ulac d acu n tmara ay yerran i usseqdec n tekriḍt neɣ i uḥettem n kra n tmuɣli ɣef umur ameqran seg uɣref ama deg Tunes, ama deg Lezzayer ».
Seg yidis niḍen, Mass Lamamra yenna-d d akken asqerdec-nnes d yimḍebbren itunsiyen yeǧǧa-t « ad yembaddel timuɣliwin ɣef temsal yerzan tasertit, taɣellist d tdamsa, ad d-yessukk tiṭ yerna ad iqeyyem lmeǧhud ucrik deg ukatar n ussemyuddes yettkemmilen deg yimenɣi mgal rrebrab. »
« Idiwenniyen ḥuzan-d daɣ tifratin ay yessefken ad d-ilint i tlufa, ladɣa taluft n Libya ay tebɣa Lezzayer ad tt-tefru s tsertit yerna war ma grent-d tmura tibeṛṛaniyin iman-nsent s yiserdasen-nsent ».
Mass Lamamra yenna-d d akken assaɣen gar Lezzayer d Tunes « ufraren-d yerna d iqburen », am wakken ay d-iḥettet d akken yessefk « ad d-naf ttawilat imgerrzen akk i ussebded n ticcurka tasuddsant gar snat-a n tmura ».
Mass Lamamra yenna-d d akken yettwasseqneɛ d akken tiɣimit ay d-yetteddun n Tseqqamut tuxliḍt n umyalel (amɛawen) ara d-yilin deg Ṭuber ay d-yetteddun deg Lezzayer Tamaneɣt ad d-frurin seg-sen « yigmaḍ yelhan yerna d wid ara yesǧehden amyalel gar snat-a n tmura.
