ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵓⴳⴰⵔ ⵏ 27.000 ⵏ ⵜⵃⵓⵏⴰ ⴰⵔⴰ ⵉⵔⴻⵥⵎⴻⵏ ⴷⴻⴳ ⵍⵄⵉⴷ ⵜⴰⵎⴻⵥⵢⴰⵏⵜ

ⵍⴻⵣⵣⴰⵢⴻⵔ – ⵙ ⵓⵊⴻⵎⵎⴰⵍ, 27.114 ⵏ ⵜⵃⵓⵏⴰ ⴰⵔⴰ ⵉⵔⴻⵥⵎⴻⵏ ⴰⴽⴽⴻⵏ ⴰⴷ ⴹⴻⵎⵏⴻⵏⵜ ⴰⵙⵙⴻⵏⵣⵉ ⵏ ⵜⵓⵞⵞⵉⵜ ⴷⴻⴳ ⵙⵉⵏ ⵏ ⵡⵓⵙⵙⴰⵏ ⵏ ⵍⵄⵉⴷ ⵜⴰⵎⴻⵥⵢⴰⵏⵜ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵢⵉⵡⴻⵏ ⵏ ⵢⵉⵎⴹⴻⴱⴱⴻⵔ ⵏ ⵓⵖⵍⵉⴼ ⵏ ⵜⵏⴻⵣⵣⵓⵜ ⵉ ⵜⵏⴻⴳⴳⴰ ⵏ ⵢⵉⵙⴰⵍⴰⵏ ⵏ ⵍⴻⵣⵣⴰⵢⴻⵔ.

ⴳⴰⵔ ⵜⵃⵓⵏⴰ-ⴰ ⵍⵍⴰⵏⵜ 4.506 ⵏ ⵜⵏⴻⵖⵔⵓⵎⵉⵏ, 15.791 ⵏ ⵜⵃⵓⵏⴰ ⵏ ⵜⵓⵞⵞⵉⵜ ⵜⴰⵎⴰⵜⵓⵜ, ⵏ ⵍⵅⴻⴹⵔⴰ ⴷ ⵍⴼⴰⴽⵢⴰ, 6.417 ⵏ ⵜⵃⵓⵏⴰ ⵏ ⵢⵉⵎⴻⵥⵍⴰ (ⵙⵙⵔⴰⴱⴻⵙ) ⵢⴻⵎⴳⴻⵔⵔⴰⴷⴻⵏ ⴷ 400 ⵏ ⵜⵢⵓⵏⵉⵏ ⵏ ⵓⴼⴰⵔⴻⵙ ⴳⴰⵔ-ⴰⵙⴻⵏⵜ 133 ⵏ ⵍⵍⵓⵣⵉⵏⴰⵜ ⵏ ⵓⴽⴻⴼⴼⴰⵢ, 235 ⵏ ⵜⴻⵙⵙⵢⴰⵔ ⵏ ⵓⵡⵔⴻⵏ ⴷ 32 ⵏ ⵍⵍⵓⵣⵉⵏⴰⵜ ⵏ ⵡⴰⵎⴰⵏ ⵏ ⵜⵇⴻⵔⵄⵓⵏⵜ.

ⵏⵏⵉⴳ ⵡⴰⵢⴰ, 2.010 ⵏ ⵢⵉⵎⴻⴳⴳⵉⵢⴻⵏ ⵏ ⵓⵙⵙⴻⴼⵇⴻⴷ ⴰⵔⴰ ⴷ-ⵢⴻⴼⴼⵖⴻⵏ ⵖⴻⵔ ⵓⵏⵔⴰⵔ ⴰⴽⴽⴻⵏ ⴰⴷ ⵄⴰⵙⵙⴻⵏ ⵜⵉⵃⵓⵏⴰ-ⴰ. ⴰⵀⵉⵍ-ⴰ ⵏ ⵓⵔⵥⴰⵎ ⵏ ⵜⵃⵓⵏⴰ ⴷⴻⴳ ⵍⵄⵉⴷ ⵢⴻⴱⴷⴰ-ⴷ ⴷⴻⴳ 2013.

« ⴰⴷ ⵏⵄⴰⵇⴻⴱ ⵙ ⵜⴻⵇⵙⴻⵃ ⵡⵉⴷ ⴰⵔⴰ ⵉⵔⴻⴽⴹⴻⵏ ⵍⵇⴰⵏⵓⵏ-ⴰ ⵡⴰⵔ ⵎⴰ ⵜⴻⵍⵍⴰ-ⴷ ⵜⵙⴻⴱⴱⴰ ⵏ ⵜⵉⴷⴻⵜ ⴰⵔⴰ ⴰⵙⴻⵏ-ⵢⴻⴽⴽⵙⴻⵏ ⵓⵔ ⵔⴻⵥⵥⵎⴻⵏ ⴰⵔⴰ ⵜⵉⵃⵓⵏⴰ-ⵏⵙⴻⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴻⵖⵍⴰⴼ ⵏ ⵜⵏⴻⵣⵣⵓⵜ (ⵜⵜⵊⴰⵕⴰ), ⴰⵎⴰⵔⴰ ⴱⴻⵏⵢⵧⵓⵏⴻⵙ ⴷⴻⴳ ⵢⵉⵡⴻⵜ ⵏ ⵜⵙⴻⵖⵔⵓⵜ ⵉ ⵜⵏⴻⴳⴳⴰ ⵏ ⵢⵉⵙⴰⵍⴰⵏ ⵏ ⵍⴻⵣⵣⴰⵢⴻⵔ. ⵍⵇⴰⵏⵓⵏ ⵏ ⵛⵛⵓⵔⵓⴹ ⵏ ⵜⵏⴻⵣⵣⵓⵜ (ⵜⵜⵊⴰⵕⴰ) ⵢⴻⵏⵏⴰ-ⴷ ⴷ ⴰⴽⴽⴻⵏ ⵡⵉⵏ ⴰⵔⴰ ⵉⵔⴻⴽⴹⴻⵏ ⴰⵢⴰ ⴰⴷ ⴰⵙ-ⵜⴻⵜⵜⵡⴰⵖⵍⴻⵇ ⵜⵃⴰⵏⵓⵜ-ⵏⵏⴻⵙ ⴰⵢⵢⵓⵔ ⵢⴻⵔⵏⴰ ⴰⴷ ⵉⵅⴻⵍⵍⴻⵚ ⵍⴻⵅⴹⴻⵢⵢⴰ ⵏ ⴳⴰⵔ 30.000 ⴷ 200.000 ⵏ ⵢⵉⴷⵉⵏⴰⵕⴻⵏ.