Asebter amenzawi

Tiɣin n tnezduɣt tanmettit: ad d-yeffeɣ lqanun ara yessifessen tiɣin

LEZZAYER – Ad d-yeffeɣ, seg-a ɣef snat n ledwaṛ, yiwen n lqanun ara yessifessen tisekkirin tideblanin i lmend n tiɣin n tnezduɣin tinmettiyin yellan wayla n uwanak (ddula) ɣef wakken ay d-yenna ass n lexmis deg Lezzayer Tamaneɣt uneɣlaf n tnezduɣt d uheyyi n temdint, Abdelmadjid Tebboune. « Tamhelt n ussenzi n tnezduɣt tanmettit yellan d ayla n uwanak tebda-d deg 2004. Seg gar 600.000 n tnezduɣin ay d-yersen ɣer ussenzi, ala 120.000 ay yenzan ar ass-a. S waya, ad d-yeffeɣ lqanun ara iserrḥen tagnit-a isebken », ɣef wakken ay d-yenna Mass Tebboune deg yiwet n terzin n ussefqed n yisenfaren n lebni n tnezduɣut deg Lezzayer Tamaneɣt.

Deg Ṭuber n 2014 ay d-ixebber yagi Mass Tebboune deg Ugraw aɣerfan aɣelnaw d akken lqanun-a ad d-yettwaxdem. « Lqanun-a yettwaqbel iḍelli (laṛebɛa) deg useqqamu n unabaḍ, yerna atan imir-a deg tnarit (lbiru) n uneɣlaf amenzu akken ad yettwastenyi. Ad d-yeffeɣ deg uɣmis unṣib seg-a ɣef snat n ledwaṛ », ɣef wakken ay d-yenna.

« Mi ara yettwassefɛel lqanun-a, amdan ay yebɣan ad d-yaɣ tanezduɣt yezmer ad yessuter srid i OPGI (Tanarit n usmal d ussefrek aṣukan). OPGI ad tqeyyem tanezduɣt-nni aqeyyem amezwaru sakken ad tefk ikaramen ɣer yimeẓla n wakal akken ad qeyymen axxam-nni aqeyyem aneggaru », ɣef wakken ay d-yessefhem.

Mass Tebboune iger-d tiɣri i yiɣermanen ay yebɣan ad d-aɣen ixxamen-nsen akken « ad faṛsen tagnit-a » uqbel tgara n Dujembeṛ 2015, acku tamhelt-a (ay d-yellan yagi snat n tikkal) ur d-tettwaɛawad ara deffir tallit-a.

Aneɣlaf n tnezduɣt iɛawed yesduqqes-d tamhelt n ussenzi n tnezduɣin n OPGI deg 2013, d tamhelt ay d-yebdan yagi deg 2004 yerna d tin ay yeǧǧan ikerrayen n tnezduɣin-a ad d-aɣen tinezduɣin-nsen, yerna tamhelt-a tettaǧa akerray ad d-yaɣ axxam s rrxa yerna ad ixelleṣ s lɣerḍ-nnes.

Amḍan n tnezduɣin ay yerza waya yuweḍ ɣer wazal n 571.000, yerna ad ten-yessenz uwanak s ssuma rxisen mliḥ.