Asebter amenzawi
Yaman: adabu iɛawed yeḍḍef tamnaḍt n Ɛaden (aneɣlaf amenzu imennejli)
RIYAḌ - Aneɣlaf amenzu ayamani ay yennejlan ɣer Riyaḍ, Khaled Bahah, yenna-d d akken tanebḍit n Ɛaden « tettwaslelli » sdeffir 4 n wayyuren n yimenɣi deg unẓul n Yaman. « Anabaḍ yettxebbir-d d akken tanebḍit n Ɛaden tettwaslelli deg wass amezwaru n lɛid tameẓyant », ɣef wakken ay d-yura deg usebter-nnes n Facebook. « Ad nexdem akken ad d-nerr tudert akken tella deg Ɛaden d wakk timdinin yettwaslellin, yerna ad d-nerr aman d trisiti », ɣef wakken ay d-yenna. Iɣallen n unabaḍ ẓedmen, ass n ttlata, ɣef temdint n Ɛaden, yerna d win ay d aẓdam amezwaru seg wasmi ay tt-udfent temlicin n umussu n Ansaruallah (Iḥutiyen) deg Meɣres, d ayen ay ikemren aselway Abd Rabbo Mansour Hadi d unabaḍ-nnes ad rewlen ɣer Tgelda Tasaɛudit. Aẓdam-a i uɛawed n tuḍḍfa n Ɛaden tga-t yiwet n temsisit umi semman « Azbu aɣerfan », yerna ɛawnen-tt daɣ yiɣallen ay tesleɣma yerna tselleḥ-iten Tgelda Tasaɛudit. Tamurt-a taneggarut d tanaragt (tajaṛet) n Yaman yerna, seg 26 Meɣres d asawen, tenheṛ yiwet n temsisit n tmura taɛṛabin akken ad twet iɣallen n Ansaruallah yerna ur ten-tettaǧǧa ara ad ḍḍfen tamurt s lekmal-nnes. Iḥutiyen bdan-d tummɣa-nsen deg Yulyu 2014 seg wammas-nsen n Saada (deg ugafa) s uɛawen n yiserdasen ay yeqqimen bedden ɣer yidis n uselway aqbur Ali Abdallah Saleh, yerna ssawḍen ad ḍḍfen iḥricen d imeqranen seg tmurt, gar-asen ula d tamaneɣt n Ṣenɛa, am wakken ay ḍḍfen ula d Ɛaden. Seg Meɣres yezrin, imenɣi-a yegla s wugar n 3.200 n tmeddurin, azgen seg-sen d iɣarimen ɣef wakken ay d-nnan Yiɣlanen Yeddukklen. Azal n 80% n yimezdaɣen -21 n yimelyunen n yimdanen- ay yeḥwaǧen lemɛawna neɣ aḥuddu deg tmurt-a tigellilt n Tzunegzirt Taɛṛabt, yerna 10 n yimelyunen seg-sen ay ixuṣṣen učči neɣ aman, ɣef leḥsab n teɣbalut-a. Amur ameqran seg Ɛaden yedrem seg kuẓ-a (4) n wayyuren ineggura n yimenɣi d tyitiwin tigenwanin n temsisit taɛṛabt, yerna d aya ay yeǧǧan Iɣlanen Yeddukklen ad d-gren tiɣri i uḥbas n yimenɣi i uɛawen n wid yenḍerren. Deg tlemmast n Mayu, yeḥbes yimenɣi 5 kan n wussan, sakkin iɛawed yeṭṭerḍeq. Ula ma Iɣlanen Yeddukklen nnan-d d akken yeḥbes yimenɣi dduṛt yezrin i ussiweḍ n lemɛawna, aḥbas-nni werǧin d-yelli.
