Asebter amenzawi
Asarag agraɣlan ɣef yimenɣi mgal tiṭṭuṛfa d tukksa-nnes ass n laṛebɛa deg Lezzayer
LEZZAYER – Ad d-yili ussan n laṛebɛa d lexmis Usarag agraɣlan ɣef yimenɣi mgal tiṭṭuṛfa d tukksa-nnes deg Lezzayer Tamaneɣt s uḥdaṛ n yigensasen n wugar n 50 n tmura d tuddsiwin tigraɣlanin yemmuzzgen (yettxeṣṣeṣen).
Amyager-a d Lezzayer ay d-iḍebbren ad d-yili, ula d Iɣlanen Yeddukklen sbeɣsen assuddes-nnes yerna ad yili d tagnit i uqeddem n tigawin timeqranin ay tga Lezzayer deg yimenɣi mgal rrebrab d tiṭṭuṛfa.
Asarag-a ad d-yili d akemmel n tiddit ayɣef d-ḍebbren deg Tqacuct n Uxxam Amellal ay d-yellan deg Fuṛaṛ yezrin deg Washington, ladɣa deg wayen yerzan asseqdec yelhan n umɛawen deg yimenɣi mgal tiṭṭuṛfa tukriḍt.
Lezzayer tebɣa daɣ, s ussuddes n usarag-a ameqran, ad ad tettekki deg Tqacuct ɣef « tiṭṭuṛfa tukriḍt » ara d-yilin deg temlilit n Ugraw amatu n Yiɣlanen Yeddukklen deg Ctembeṛ ay d-yetteddun deg New York.
Asarag n Lezzayer ad d-iḥaz 8 n temsal timeqranin yerna yal tamsalt ad sqerdcen fell-as deg temlilit i yiman-nnes. Timsal-a d « Aqeddem n wazal d dduṛ ay yesɛa yimenɣi mgal tiṭṭuṛfa tukriḍt d tukksa n tiṭṭuṛfa deg yimenɣi mgal rrebrab », « Dduṛ n lqanun deg tukksa n tiṭṭuṛfa ula deg leḥbas » d « Dduṛ n tsuda n ddin deg tukksa n tiṭṭuṛfa ».
Timsal niḍen nitenti d « Tukksa n tiṭṭuṛfa, aɛawed n tukci n yizerfan d tririt ɣer tmetti », « Tukksa n tiṭṭuṛfa d lmeǧhud n yimenɣi mgal tiṭṭuṛfa tukriḍt s ussegmi d usmal n tarrayin n usselmed, n ussileɣ amsadur d ussemres » d « Dduṛ n ttawilat n yisalan am tregwa n ugensa d tesgilin n ddin deg tukksa n tiṭṭuṛfa ».
Ad d-yili daɣ uslaso ɣef temsal yeqqnen ɣer « Dduṛ n tmetti taɣarimt deg tukksa n tiṭṭuṛfa » d « Tukksa n tiṭṭuṛfa d ukṛah n yibeṛṛaniyen d Lislam ».
Wid ara yettekkin ad nadin ɣef wuguren ucriken ay yessefk ad ttwakksen seg ubrid i lmend n tukksa n tiṭṭuṛfa d yimenɣi mgal tiṭṭuṛfa tukriḍt, d lecɣal ay izemren ad ssifessen amɛawen deg Yiɣlanen Yeddukklen neɣ deg Unmager Amaḍlan n yimenɣi mgal rrebrab.
Asarag-a yerẓem i tmura yettekkan deg Unmager Amaḍlan n yimenɣi mgal rrebrab, i tmura n temnaḍt n Ssaḥel, i yimaslaḍen n Useqqamu n tɣellist n Yiɣlanen Yeddukklen, i yigensasen n tuddsiwin n Yiɣlanen Yeddukklen ay d-yelhan d yimenɣi mgal rrebrab, i yicriken ibeṛṛaniyen n temnaḍt d tuddsiwin timnaḍanin d tegraɣlanin.
Ad ḥedṛen daɣ deg umyager-a yimḍebbren unnigen d yimazzayen, ladɣa deg unrar n teɣdemt, n tedrimt, n temsulta, n ussegmi, n ddin d ttawilat n yisalan ay ixeddmen deg unrar i yimenɣi mgal tiṭṭuṛfa tukriḍt.
