ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⴱⵓⵔⵓⵏⴷⵉ: 1.000 ⵏ ⵢⵉⵎⴷⴰⵏⴻⵏ ⴰⵢ ⵉⵔⴻⵡⵡⵍⴻⵏ ⵢⴰⵍ ⴰⵙⵙ ⵙⴻⴳ ⵜⵎⵓⵔⵜ
ⴳⴻⵏⴻⵠⴻ – ⴰⵣⴰⵍ ⵏ 1.000 ⵏ ⵎⴻⴷⴷⴻⵏ ⴰⵢ ⵉⵔⴻⵡⵡⵍⴻⵏ ⵙⴻⴳ ⴱⵓⵔⵓⵏⴷⵉ ⴰⵢ ⵜⵃⵓⵣⴰ ⵜⴰⵍⵓⴼⵜ ⵜⴰⵙⴻⵔⵜⵉⵜ ⴷ ⵜⴰⵎⴻⵇⵔⴰⵏⵜ ⵙⴻⴳ ⵜⴳⴰⵔⴰ ⵏ ⵢⴻⴱⵔⵉⵔ. ⵉⵎⴷⴰⵏⴻⵏ-ⴰ ⵍⴰ ⵔⴻⵡⵡⵍⴻⵏ ⵍⴰⴷⵖⴰ ⵖⴻⵔ ⵜⴰⵏⵣⴰⵏⵢⴰ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴰⵙⵙ ⵏ ⵍⴻⵜⵏⵉⵢⴻⵏ ⵢⵉⵡⴻⵏ ⵏ ⵓⵍⵖⵓ ⵏ ⵜⵓⴷⴷⵙⴰ ⵏ ⵢⵉⵎⵙⵓⵊⵊⵉⵢⴻⵏ ⵡⴰⵔ ⵜⵉⵍⵉⵙⴰ.
« ⵢⴰⵍ ⴰⵙⵙ, 1000 ⵏ ⵢⵉⵎⴷⴰⵏⴻⵏ ⴰⵢ ⵉⵣⴻⴳⴳⵔⴻⵏ ⵜⵉⵍⵉⵙⴰ ⵙⴻⴳ ⵜⴻⵥⴳⵉ ⵢⴻⵍⵍⴰⵏ ⴳⴰⵔ ⴱⵓⵔⵓⵏⴷⵉ ⴷ ⵜⴰⵏⵣⴰⵏⵢⴰ, ⵢⴻⵔⵏⴰ ⴰⵟⴰⵙ ⵙⴻⴳ-ⵙⴻⵏ ⵜⵜⴻⴷⴷⵓⵏ ⴷⴻⴳ ⵜⵉⵍⵍⴰⵙ ⵏ ⵢⵉⴹ, ⵖⴻⴼ ⵓⴹⴰⵔ, ⵡⴰⵔ ⵎⴰ ⵡⵡⵉⵏ ⵍⴻⵃⵡⴰⵍ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵜⵓⴷⴷⵙⴰ ⵏ ⵢⵉⵎⵙⵓⵊⵊⵉⵢⴻⵏ ⵡⴰⵔ ⵜⵉⵍⵉⵙⴰ, ⵡⴰⵔ ⵎⴰ ⵜⴻⵏⵏⴰ-ⴷ ⵙⴻⴳ ⵎⴻⵍⵎⵉ ⴰⵢ ⵢⴻⵡⵡⴻⴹ ⵓⵎⴹⴰⵏ ⵏ ⵢⵉⵣⵔⵓⵣⴰⵖ ⵖⴻⵔ ⵡⴰⵏⴻⵛⵜ-ⴰ ⴰⴽⴽ.
ⴰⵙⵙ ⵏ ⵜⵜⵍⴰⵜⴰ ⴰⵔⴰ ⴷ-ⵉⵍⵉⵏⵜ ⵜⴻⴼⵔⴰⵏⵉⵏ ⵜⵉⵙⴻⵍⵡⴰⵢⴰⵏⵉⵏ ⴷⴻⴳ ⴱⵓⵔⵓⵏⴷⵉ ⴷⴻⴳ ⵜⴻⴳⵏⵉⵜ ⴷ ⵜⴰⵎⴻⵇⵔⴰⵏⵜ ⵏ ⵛⵛⵡⴰⵍ. ⴰⵙⴻⵍⵡⴰⵢ ⵒⵉⴻⵔⵔⴻ ⵏⴽⵓⵔⵓⵏⵣⵉⵣⴰ ⵢⴻⵙⵙⴻⵔⵙ-ⴷ ⵉⵎⴰⵏ-ⵏⵏⴻⵙ ⵉ ⵜⵙⴻⵍⵡⵉⵜ ⵜⵉⵙ 3 ⵢⵉⵍⵉ ⵉⵅⵚⵉⵎⴻⵏ-ⵏⵏⴻⵙ ⵜⵜⵡⴰⵍⵉⵏ ⴰⵢⴰ ⵢⴻⴼⴼⴻⵖ ⵉ ⵜⵎⴻⵏⴹⴰⵡⵜ. ⵎⴰ ⴷ ⵜⴰⵏⵎⴻⴳⵍⴰ ⵜⵖⵓⵏⵣⴰ ⵜⵉⴼⵔⴰⵏⵉⵏ-ⴰ.
ⵜⵉⵎⵎⴰⵣⵡⴻⵔⵜ ⵏ ⵎⴰⵙⵙ ⵏⴽⵓⵔⵓⵏⵣⵉⵣⴰ ⵜⴻⵙⵙⴰⵖ-ⴷ ⵛⵛⴰⵡⵍ ⴷⴻⴳ ⵜⵎⵓⵔⵜ-ⴰ ⵙⴻⴳ ⵜⴳⴰⵔⴰ ⵏ ⵢⴻⴱⵔⵉⵔ, ⵢⴻⵔⵏⴰ ⵜⴻⵍⵍⴰ-ⴷ ⴷⴻⴳ-ⵙ ⵜⴻⴽⵔⵉⴹⵜ ⴰⵢ ⵢⴻⴳⵍⴰⵏ ⵙ ⵡⵓⴳⴰⵔ ⵏ 80 ⵏ ⵜⵎⴻⴷⴷⵓⵔⵉⵏ.
ⵙ ⵓⵊⴻⵎⵎⴰⵍ, 150.000 ⵏ ⵢⵉⵣⵔⵓⵣⴰⵖ ⴰⵢ ⵉⵔⴻⵡⵍⴻⵏ ⵖⴻⵔ ⵜⵎⵓⵔⴰ ⵜⵉⵏⴰⵔⴰⴳⵉⵏ (ⵜⵉⵊⵉⵔⴰⵜⵉⵏ) ⴷⴻⴳ ⵜⴻⴳⵏⵉⵜ-ⵏⵏⵉ ⵉⵅⴻⵚⵔⴻⵏ ⵏ ⵓⵇⴱⴻⵍ ⵜⴻⴼⵔⴰⵏⵉⵏ.
ⴷⴻⴳ ⵜⴰⵏⵣⴰⵏⵢⴰ, ⴰⵎⴰⵣⵉⵔ ⵏ ⵢⵉⵣⵔⵓⵣⴰⵖ ⵏ ⵏⵢⴰⵔⵓⴳⵓⵙⵓ ⵢⴻⵞⵞⵓⵕ ⴷ ⵍⵖⴰⵛⵉ ⵢⴻⵔⵏⴰ « ⵢⴻⵡⵡⴻⴹ ⵖⴻⵔ ⵜⴻⴳⵏⵉⵜ ⴰⵢⴷⴻⴳ ⴰⵔⴰ ⵢⴻⵟⵟⴻⵔⴹⴻⵇ » ⵖⴻⴼ ⵍⴻⵃⵙⴰⴱ ⵏ ⵙⵉⵜⴰ ⵛⴰⵛⵉⵧⵒⵒⴻ, ⵜⴰⵙⴻⵎⵢⴰⴷⴷⴰⵙⵜ ⵏ ⵜⵓⵄⵊⵉⵍⵉⵏ ⴷⴻⴳ ⵜⵓⴷⴷⵙⴰ ⵏ ⵢⵉⵎⵙⵓⵊⵊⵉⵢⴻⵏ ⵡⴰⵔ ⵜⵉⵍⵉⵙⴰ.
ⵜⵓⴷⴷⵙⴰ-ⴰ ⵜⴻⵏⵏⴰ-ⴷ ⴷⴰⴽⴽⴻⵏ ⵍⵍⴰⵏ ⵉⵎⵉⵔ-ⴰ 78.000 ⵏ ⵢⵉⴱⵓⵔⵓⵏⴷⵉⵢⴻⵏ ⴷⴻⴳ ⵓⵎⴰⵣⵉⵔ ⵏ ⵏⵢⴰⵔⵓⴳⵓⵙⵓ ⵢⴻⵔⵏⴰ ⵉⵣⵔⵓⵣⴰⵖ-ⴰ ⵔⵏⴰⵏ ⵖⴻⵔ 64.000 ⵏ ⵢⵉⵣⵔⵓⵣⴰⵖ ⵉⴽⵓⵏⴳⵓⵍⵉⵢⴻⵏ ⴰⵢ ⵢⴻⴷⴷⵔⴻⵏ ⴷⵉⵏ ⵙⴻⴳ 1997, ⴰⵙⵎⵉ ⴰⵢ ⵢⴻⵜⵜⵡⴰⵔⵥⴻⵎ ⵓⵎⴰⵣⵉⵔ-ⵏⵏⵉ ⴰⴽⴽⴻⵏ ⴰⴷ ⵢⴻⵎⵎⴰⴳⴻⵔ, ⵎⴰ ⴰⵟⴰⵙ, 50.000 ⵏ ⵢⵉⵣⵔⵓⵣⴰⵖ ⴰⵢ ⴷ-ⵉⵔⴻⵡⵍⴻⵏ ⵙⴻⴳ ⵟⵟⵔⴰⴷ ⴷⴻⴳ ⵜⴻⴳⴷⵓⴷⴰ ⵜⴰⵎⴻⴳⴷⴰⵢⵜ ⵏ ⴽⵓⵏⴳⵓ.
ⴷⴻⴳ ⵎⴰⵢⵓ, ⵜⵓⴷⴷⵙⴰ ⵏ ⵢⵉⵎⵙⵓⵊⵊⵉⵢⴻⵏ ⵡⴰⵔ ⵜⵉⵍⵉⵙⴰ ⵜⴻⵔⵥⴻⵎ ⴰⵎⵎⴰⵙ ⵏ ⵓⴷⴰⵡⵉ ⵏ ⵓⴱⵓⵛⵃⵉⴹ ⴷⴻⴳ ⵓⵎⴰⵣⵉⵔ-ⴰ.
ⵙⴻⴳ ⵢⵉⵎⵉⵔ-ⵏⵏⵉ, ⵜⵉⵖⵍⴰⵎⵉⵏ ⵏ ⵜⵓⴷⴷⵙⴰ ⵏ ⵢⵉⵎⵙⵓⵊⵊⵉⵢⴻⵏ ⵡⴰⵔ ⵜⵉⵍⵉⵙⴰ ⵛⴻⵔⴹⴻⵏⵜ ⵉ 107.000 ⵏ ⵢⵉⵎⴷⴰⵏⴻⵏ ⵎⴳⴰⵍ ⴰⴹⴹⴰⵏ ⵏ ⵓⴱⵓⵛⵃⵉⴹ ⵢⴻⵔⵏⴰ ⴼⴻⵔⵔⵇⴻⵏⵜ 270.000 ⵏ ⵍⵍⵉⵜⵔⴰⵜ ⵏ ⵡⴰⵎⴰⵏ ⵏ ⵜⵉⵙⵙⵉⵜ ⴷⴻⴳ ⵡⴰⵙⵙ ⴷⴻⴳ ⵓⵎⴰⵣⵉⵔ-ⵏⵏⵉ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵍⵖⵓ-ⵏⵏⵉ.
ⵉⵎⴰⵏⴰⵢⴻⵏ ⵜⴻⵛⵖⴻⴱ-ⵉⵜⴻⵏ ⵜⴰⵍⵓⴼⵜ ⵏ ⵡⵓⵙⵙⴰⵏ-ⴰ ⴷⴻⴳ ⴱⵓⵔⵓⵏⴷⵉ ⵢⴻⵔⵏⴰ ⵓⴳⴰⴷⴻⵏ ⵍⴻⵎⵎⴻⵔ ⴰⴷ ⵜⴻⵙⵙⵉⵡⴻⴹ ⵖⴻⵔ ⵜⴻⴽⵔⵉⴹⵜ ⴷ ⵜⴰⵎⴻⵇⵔⴰⵏⵜ, ⴷⴻⴳ ⵜⵎⵓⵔⵜ-ⴰ ⴰⵢⴷⴻⴳ ⴷ-ⵍⵍⴰⵏⵜ ⵜⵏⴻⴳⵣⴰⵔⵉⵏ ⴷ ⵜⵉⵎⴻⵇⵔⴰⵏⵉⵏ ⴳⴰⵔ ⵢⵉⵀⵓⵜⵓⵜⴻⵏ ⴷ ⵢⵉⵜⵓⵜⵙⵉⵢⴻⵏ. ⵉ ⵓⵙⵎⴻⴽⵜⵉ, ⵜⴰⵎⵓⵔⵜ-ⴰ ⵉⵃⵓⵣⴰ-ⵜⵜ ⵟⵟⵔⴰⴷ ⴰⵖⴰⵔⵉⵎ ⵏ ⵡⵓⴳⴰⵔ ⵏ 10 ⵏ ⵢⵉⵙⴻⴳⴳⴰⵙⴻⵏ ⴰⵢⴷⴻⴳ ⵎⵎⵓⵜⴻⵏ 300.000 ⵏ ⵎⴻⴷⴷⴻⵏ ⴳⴰⵔ 1993 ⴷ 2006.
