Asebter amenzawi

Talɣuɣa n Tefriqt n ddaw n 23 n yiseggasen (timlilit n wuɣal): Chitta ad yezmer ad yurar mgal Sierra Leone

LEZZAYER – Oussama Chitta, amarir alemmas agraɣlan ulimpi n Lezzayer, yuɣ-itent ass n lḥedd mi yurar deg temlilit gar Lezzayer d Sierra Leone deg taɣlamt taɣelnawt terbeḥ s 2 ɣer 0, d acu kan, ixeddamen itekniyen n teɣlamt-a nnan-d ass n ttlata i Tnegga n Yisalan n Lezzayer d akken amarir-a ad yezmer ad yurar deg temlilit n wuɣal ara d-yilin ass n ssebt deg Leblida.

Amarir-a n MC Lezzayer (Tamɣunt 1/Lezzayer) ur ifuk ara timlilit-nni acku yuɣ-itent deg tkeɛbet n uḍar, d acu kan, tiyita ay yuɣ ur tewɛiṛ ara ɣef wakken ay d-tenna teɣbalut-a.

Chitta ur ifuk ara tasemhuyt yezrin acku yuɣ-itent yagi uqbel, maca yettban-d d akken yebda la t-id-yettuɣal lǧehd yerna iban-d waya deg wurar-nnes yelhan deg temlilit ay d-yellan mgal Sierra Leone, ɣef wakken ay d-nnan yimanayen.

Lezzayer terna Sierra Leone s sin n yiswan ay yessadef Abdelhakim Amokrane yerna attan imir-a la tettṛaju timlilit n wuɣal ara d-yilin ssebt-a deg Leblida.

Sierra Leone yettwagdel-as ad tessuddes timliliyin tunṣibin n tcirt n uḍar ɣef lǧal n waḍḍan n unfafad n Ebola ay iḥuzan tamurt-a ugar n useggas aya.

Timlilit n wuɣal ad yili deg-s Usinigali Daouda Gueye d anefray, yerna ad t-ɛawnen warraw n tmurt-nnes Serigne Cheikh Toure d El Hadji Abdulaziz Gueye.

Talɣuɣa n Tefriqt 2015 n ddaw n 23 n yiseggasen ad tt-uraren deg Sinigal gar 5 d 19 Dujembeṛ ay d-yetteddun. Tiɣlamin ara d-yezgen d timezwura deg tedyant-a ad ttekkint deg Wuraren Ulimpiyen n 2016 n Rio de Janeiro, yerna taɣlamt tulimpit tadzayrit n tcirt n uḍar ur tettekka ara deg Wuraren Ulimpiyen seg wasmi ay d-llan deg Musku deg 1980.