Asebter amenzawi
Imenɣi mgal rrebrab: Lezzayer d tacrikt n « uswir unnig mliḥ » deg Tefriqt n Ugafa
LEZZAYER – Lezzayer d tacrikt n « uswir unnig mliḥ » deg Tefriqt n Ugafa deg yimenɣi mgal rrebrab, ɣef wakken ay d-tenna ass n lexmis i Tnegga n Yisalan n Lezzayer tiɣeft n tmagla tamarikanit, Paige Alexander deg Usarag n Lezzayer ɣef yimenɣi mgal tiṭṭurfa d tukksa-nnes.
Ɣef leḥsab n Massa Alexander, ay yessawlen d Tnegga n Yisalan n Lezzayer deg yijifeṛ n usarag-nni, « Lezzayer tesɛa aṭas n ttejṛiba d umezruy deg yimenɣi-nnes mgal rrebrab. Attan deg ṣṣef amezwaru deg temnaḍt-a », dɣa d aya ay yerran tamurt-a n Tefriqt n Ugafa d « tacrikt n uswir unnig » deg temnaḍt.
« Nessawel aṭas d Lezzayer d yicriken niḍen deg temnaḍt ɣef tegnit n tɣellist (laman). Dɣa nwala d akken d ayen yesɛan azal ad nexdem yerna ad nesseqdec timussniwin-nneɣ tumyifin deg uxeddim, ɣer yidis n Lezzayer ay nettwali d tacrikt meɣɣer wazal-nnes yerna d unnig uswir-nnes (deg Tefriqt n Ugafa) ».
Alexander terra tajmilt i Lezzayer imi ay d-tessuddes asarag-a yerna twekked-d d akken amyager-a agraɣlan yella-d « d tagnit yelhan i tmurt-a deg d-yella usarag (Lezzayer) d tid yettekkan deg-s akken ad cerkent ttejṛibat-nsent deg yimenɣi mgal rrebrab ».
« Nessaram ad yessiweḍ yal yiwen ad d-yelmed seg wayeḍ yerna ad d-nessewjed taftart n yixeddimen ay iwatan ay d-telhu yid-sen ama d Lezzayer, ama d icriken niḍen ay iḥedṛen deg Usarag-a », ɣef wakken ay d-tenna Massa Alexander ay yellan daɣ d tamalalt n unedbal n tnarit n Tnegga tamarikanit n tneflit tagraɣlant (USAID).
Mi tettwatter ɣef tsertit tamarikanit deg yimenɣi mgal rrebrab, Massa Alexander twekked-d d akken Iwanaken Yeddukklen n Marikan sɛan anagraw aserdasi n wumel n tɣellist akken ad nnaɣen mgal tiṭṭurfa tukriḍt, d acu kan tenna-d d akken « aya ur d-yettqam ara ».
« Yessefk ad nexdem ɣef tudsiwin tinabḍanin d tenmettiyin niḍen akken ad nessiweḍ ad nefhem ssebbat n tiṭṭurfa tukriḍt », ɣef wakken ay d-tenna, am wakken ay d-terna d akken yella-d aṭas n wawal ɣef uḥezzeb deg yisaragen ay d-gan deg umyager-a.
Massa Alexander tger tamawt d akken imuzzag ḥetteten-d d akken yessefk ad tettwafhem tarrayt n teɣwalt d yiznan ay sseqdacent tegrawin tirebrabin s yiẓeḍwan inmettiyen i lmend n usmal n lecɣal d tesnakta-nsen.
Deg wayen yerzan amɛawen gar Lezzayer d Yiwanaken Yeddukklen deg unrar n tɣellist deg temnaḍt n Ssaḥel, tiɣeft n tmagla tamarikanit tenna-d d akken snat-a n tmura la ttemɛawanent mliḥ deg yimenɣi mgal rrebrab.
Asarag n Lezzayer ssefran ad ifak ass n lexmis s uheyyi n teftart ɣef « uɛahed, assewjed d ticcurka ara yesfeɛlen ayen ay d-yettwalemdeb seg yiskasiyen » n usarag-a.
Lewṣayat n teftart-a n Lezzayer ad ttunefkent i tqacuct n Yiɣlanen Yeddukklen ara d-yilin deg Ctembeṛ ay d-yetteddun deg Washington ɣef yimenɣi mgal tiṭṭurfa tukriḍt.
