ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵉⵃⴻⵣⵣⵉⴱⴻⵏ ⵉⵎⴰⵢⵏⵓⵜⴻⵏ ⵉ ⵓⵙⵙⵉⴼⵙⴻⵙ ⵏ ⵓⵙⵙⴻⴼⵜⵉ ⴷⴻⴳ ⵜⵎⴻⵔⵔⵉⵜ ⴷⴻⴳ ⵛⵜⴻⵎⴱⴻⵕ

ⵄⵉⵏ ⵜⵉⵎⵓⵛⴻⵏⵜ – ⴰⴷ ⵜⵜⵡⴰⵙⴼⴻⵄⵍⴻⵏ ⵢⵉⵃⴻⵣⵣⵉⴱⴻⵏ ⵉⵎⴰⵢⵏⵓⵜⴻⵏ ⵉ ⵓⵙⵙⵉⴼⵙⴻⵙ ⵏ ⵓⵙⵙⴻⴼⵜⵉ ⴷⴻⴳ ⵜⵎⴻⵔⵔⵉⵜ ⵙⴻⴳ ⵛⵜⴻⵎⴱⴻⵕ ⴷ ⴰⵙⴰⵡⴻⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴰⵙⵙ ⵏ ⵍⴻⵅⵎⵉⵙ ⴷⴻⴳ ⵄⵉⵏ ⵜⵉⵎⵓⵛⴻⵏⵜ ⵓⵏⴻⵖⵍⴰⴼ ⵏ ⵓⵀⴻⵢⵢⵉ ⵏ ⵡⴰⴽⴰⵍ, ⵏ ⵜⵎⴻⵔⵔⵉⵜ ⴷ ⵜⴻⵏⴹⵉ, ⴰⵎⴰⵔ ⴳⵀⵧⵓⵍ.

ⵉⵃⴻⵣⵣⵉⴱⴻⵏ-ⴰ ⵔⵣⴰⵏ, ⴳⴰⵔ ⵜⵖⴰⵡⵙⵉⵡⵉⵏ ⵏⵉⴹⴻⵏ, ⴰⵙⵙⴻⴼⵔⴻⴽ ⵏ ⵜⵎⴻⵔⵔⵉⵜ ⴷ ⵜⴻⵎⵏⴰⴹⵉⵏ ⵏ ⵓⵙⵙⴻⵎⵖⴻⵔ ⵏ ⵜⵎⴻⵔⵔⵉⵜ, ⴱⴻⴷⴷⵓ ⵏ ⵢⵉⵙⴻⵏⴼⴰⵔⴻⵏ ⵉⵎⴻⵔⵔⴰⵢⴻⵏ ⴷ ⵉⵎⴻⵇⵔⴰⵏⴻⵏ ⴷⴻⴳ ⵡⴰⵟⴰⵙ ⵏ ⵜⴻⵎⵏⴰⴹⵉⵏ ⵏ ⵜⵎⵓⵔⵜ ⴷ ⵓⵙⵄⴻⴷⴷⵉ ⵏ ⵢⵉⵡⴻⵏ ⵏ ⵍⵇⴰⵏⵓⵏ ⴰⵙⵍⴻⴽⵎⴰⵏ « ⵙ ⵡⴰⵣⴰⵍ-ⵏⵏⴻⵙ » ⴰⵔⴰ ⴷ-ⵢⴻⵙⴱⴰⵏⴻⵏ ⵙ ⵓⴷⴻⵇⵇⴻⵇ ⵛⵛⵓⵔⵓⴹ ⵏ ⵓⵙⵙⴻⴼⵜⵉ, ⴰⵍⵓⴳ ⵏ ⵛⵛⵓⵔⵓⴹ ⴷ ⵜⵙⴻⴽⴽⵉⵔⵉⵏ ⴰⵔⴰ ⵢⴻⵜⵜⵡⴰⵇⴰⴷⵔⴻⵏ ⴷⴻⴳ ⵓⵙⵙⴻⴼⵜⵉ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴻⵖⵍⴰⴼ ⴷⴻⴳ ⵢⵉⵡⴻⵜ ⵏ ⵜⴻⵎⵍⵉⵍⵉⵜ ⴷ ⵜⵖⴻⵎⵙⴰ ⴷⴻⴳ ⵜⴻⴳⵣⵉⵔⵜ ⵏ ⵕⴻⵛⴳⵓⵏ.

« ⴰⴹⵔⵉⵙ-ⴰ ⴰⴷ ⵢⴻⵙⵙⴻⵏⵇⴻⵙ ⴰⵟⴰⵙ ⵏ ⵢⵉⴽⴰⵔⴰⵎⴻⵏ ⵏ ⵓⵙⵙⴻⴼⵜⵉ ⴷ ⵜⴰⵍⵍⵉⵜ ⵏ ⵓⵣⵔⴰⵡ ⵏ ⵢⵉⴽⴰⵔⴰⵎⴻⵏ-ⴰ, ⴰⵎ ⵡⴰⴽⴽⴻⵏ ⴰⵔⴰ ⵉⵄⴰⵡⴻⵏ ⵉⵎⵙⴻⴼⵜⵉⵢⴻⵏ ⴷⴻⴳ ⵓⵏⵔⴰⵔ-ⴰ, ⵢⴻⵔⵏⴰ ⴰⴷ ⵢⴻⴹⴼⴻⵔ ⵜⵉⴷⴷⵉⵜ ⵏ ⵢⵉⵙⴻⵏⴼⴰⵔⴻⵏ ⵏ ⵍⴻⴱⵏⵉ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ, ⴰⵎ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ ⴷ ⴰⴽⴽⴻⵏ « ⵉⴷⵓⴱⴰ ⵉⵏⴰⴳⴷⵓⴷⴻⵏ ⴰⴷ ⵄⴰⵇⴱⴻⵏ ⵉⵎⵙⴻⴼⵜⵉⵢⴻⵏ ⵓⵔ ⵢⴻⵜⵜⵇⴰⴷⴰⵔⴻⵏ ⴰⵔⴰ ⴰⵍⵓⴳⴻⵏ ⵏ ⵛⵛⵓⵔⵓⴹ, ⵢⴻⵔⵏⴰ ⵢⴻⵣⵎⴻⵔ ⴰⴷ ⴰⵙⴻⵏ-ⵢⴻⵜⵜⵡⴰⴽⴽⴻⵙ ⵜⵜⴻⵙⵔⵉⵃ ⴰⴽⴽⴻⵏ ⴰⴷ ⵅⴻⴷⵎⴻⵏ ⴷⴻⴳ ⵓⵙⴻⵏⴼⴰⵔ-ⵏⵏⵉ ⴰⵎ ⵡⴰⴽⴽⴻⵏ ⴰⵢ ⵢⴻⵣⵎⴻⵔ ⴰⴷ ⴰⵙⴻⵏ-ⵢⴻⵜⵜⵡⴰⴽⴽⴻⵙ ⵜⵜⴻⵙⵔⵉⵃ ⵏ ⵓⵙⵙⴻⴼⵜⵉ ».

« ⵓⵍⴰ ⴷ ⴰⴽⴰⵍ ⴰⴷ ⵜ-ⵜⴻⵔⵣⵓ ⵜⴻⵎⵙⴰⵍⵜ ⵏ ⵢⵉⵃⴻⵣⵣⵉⴱⴻⵏ-ⴰ, ⵉⵎⵉ ⴽⵔⴰ ⵏ ⵜⴻⵎⵏⴰⴹⵉⵏ ⵏ ⵓⵙⵙⴻⵎⵖⴻⵔ ⵏ ⵜⵎⴻⵔⵔⵉⵜ ⵢⴻⵍⵍⴰ-ⴷ ⴷⴻⴳ-ⵙⴻⵏⵜ ⵓⵔⴽⴰⴹ ⵏ ⵛⵛⵓⵔⵓⴹ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵔⵏⴰ ⴷ ⴰⴽⴽⴻⵏ ⵉⵙⴻⵏⴼⴰⵔⴻⵏ ⵉⵎⴻⵥⵢⴰⵏⴻⵏ ⵏ ⵓⵙⵙⴻⴼⵜⵉ ⴷ ⵉⴷⵓⴱⴰ ⵉⴷⵉⴳⴰⵏⴻⵏ ⴰⵔⴰ ⵜⴻⵏ-ⵢⴻⵙⴼⴻⵔⴽⴻⵏ ⵢⴻⵔⵏⴰ ⵓⵔ ⵜⴻⵔⵔⵉ ⴰⵔⴰ ⵜⵎⴰⵔⴰ ⴰⴷ ⵜⴻⵏ-ⵢⴻⵙⵙⴻⴼⵔⴻⴽ ⵓⵖⵍⵉⴼ.

ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵙⵙⵓⵎⴰⵜ ⵏ ⵢⵉⵙⴻⵏⵙⴰ, ⴰⵏⴻⵖⵍⴰⴼ ⵢⴻⵏⵏⴰ-ⴷ ⴷ ⴰⴽⴽⴻⵏ ⴰⵜⴻⵏⵜⵉ ⵖⵍⴰⵢⵉⵜ ⵖⴻⴼ ⵍⴵⴰⵍ ⵏ ⵓⵙⵙⵓⵜⴻⵔ ⴰⵎⴻⵇⵔⴰⵏ ⴰⵢ ⴷ-ⵢⴻⴳⴳⵜⴻⵏ ⵖⴻⴼ ⵢⵉⵙⴻⵏⵙⴰ ⴷ ⵍⴻⵅⵚⴰⵚ ⵏ ⵢⵉⵙⴻⵏⵙⴰ. « ⴰⵇⵍ-ⴰⵖ ⵍⴰ ⵏⴻⵙⵙⴻⴵⵀⴰⴷ ⵜⴰⵣⵎⴻⵔⵜ ⵏ ⵓⵎⵎⴰⴳⴻⵔ ⵏ ⵢⵉⵙⴻⵏⵙⴰ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ.

ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵜⵉⴳⵣⵉⵔⵜ ⵏ ⵕⴻⵛⴳⵓⵏ, ⵎⴰⵙⵙ ⴳⵀⵧⵓⵍ ⵢⴻⵏⵏⴰ-ⴷ ⴷ ⴰⴽⴽⴻⵏ ⴰⵖⵍⵉⴼ ⵏ ⵓⵀⴻⵢⵢⵉ ⵏ ⵡⴰⴽⴰⵍ ⴷ ⵜⵎⴻⵔⵔⵉⵜ ⵓⵔ ⵢⴻⵜⵜⵄⴻⴹⴹⵉⵍ ⴰⵔⴰ ⴰⴷ ⵢⴻⵙⵜⴻⵏⵢⵉ ⵍⴻⵄⵇⴻⴷ ⴷ ⵓⵖⵍⵉⴼ ⵏ ⵢⵉⴷⵍⴻⵙ ⴰⴽⴽⴻⵏ ⴰⴷ ⵙⵜⴻⵔⵔⴻⵏ ⵜⵉⴳⵣⵉⵔⵜ-ⴰ ⵢⴻⵔⵏⴰ ⴰⴷ ⵜⵜ-ⵉⴷ-ⵀⴻⵢⵢⵉⵏ ⵉ ⵓⵃⴻⵡⵡⴻⵙ. ⴷⵖⴰ ⵙ ⵡⴰⵢⴰ ⴰⵔⴰ ⵜⴻⵙⵄⵓ ⵉⵎⵏⴻⵏⵏⵉⴹⴻⵏ ⵏ ⵓⵃⴻⵡⵡⴻⵙ ⴰⵔⴰ ⵢⴻⵜⵜⴻⴽⴽⵉⵏ ⴷⴻⴳ ⵡⴰⵀⵉⵍ ⵏ ⵜⵏⴻⴼⵍⵉⵜ ⵏ ⵜⵎⴻⵔⵔⵉⵜ ⵜⴰⵖⴻⵍⵏⴰⵡⵜ ⴷ ⵜⴻⴳⵔⴰⵖⵍⴰⵏⵜ.

ⴰⴷ ⴷ-ⵢⵉⵍⵉ ⴷⴰⵖ ⵍⴻⵄⵇⴻⴷ ⴰⵎ ⵡⴰ ⴷ ⵓⵖⵍⵉⴼ ⵏ ⵜⵖⴰⵡⵙⵉⵡⵉⵏ ⵏ ⴷⴷⵉⵏ ⵢⴻⵔⵏⴰ ⴰⴷ ⵢⴻⵔⵣⵓ ⴰⵃⵔⴰⵣ ⴷ ⵓⵚⴻⴳⴳⴻⵎ ⵏ ⵢⵉⴷⴻⴳⴳⴻⵏ ⴷ ⵉⵎⴻⴷⵔⵓⵣⴻⵏ ⵉⵏⵙⴻⵍⵎⴻⵏ, ⵍⴰⴷⵖⴰ ⵜⴰⵎⴻⵙⴳⵉⴷⴰ ⵜⴰⵎⴰⵢⵏⵓⵜ ⵏ ⵡⴻⵀⵕⴰⵏ.

ⴷ ⴰⵛⵓ ⴽⴰⵏ, ⵜⴰⵎⵀⴻⵍⵜ ⵏ ⵓⵀⴻⵢⵢⵉ ⵏ ⵜⴻⴳⵣⵉⵔⵜ ⵏ ⵕⴻⵛⴳⵓⵏ ⵢⴻⵙⵙⴻⴼⴽ ⴰⴷ ⵜⵇⴰⴷⴻⵔ ⵉⵍⵓⴳⴰⵏ ⵏ ⵓⵃⵔⴰⵣ ⵏ ⵜⵡⴻⵏⵏⴰⴹⵜ ⵢⴻⵔⵏⴰ ⵓⵔ ⵜⴻⵜⵜⴱⴻⴷⴷⵉⵍ ⴰⵔⴰ ⵚⵚⵉⴼⴰⵜ ⵏ ⵜⵡⴻⵏⵏⴰⴹⵜ ⵏ ⵜⴻⴳⵣⵉⵔⵜ-ⴰ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ.

ⵎⵉ ⵢⴻⵔⵣⴰ ⵖⴻⴼ ⵜⴻⴳⵣⵉⵔⵜ ⵏ « ⵍⴰⵉⵍⴰ », ⵎⴰⵙⵙ ⴳⵀⵧⵓⵍ ⵢⴻⵏⵏⴰ-ⴷ ⴷ ⴰⴽⴽⴻⵏ « ⵢⴻⵜⵄⴻⵊⵊⴻⴱ » ⵙ ⵓⴷⴻⴳ-ⴰ ⵢⴻⵔⵏⴰ ⵢⴻⵏⵏⴰ-ⴷ ⴷ ⴰⴽⴽⴻⵏ « ⴰⵙⵖⵓⵏ » ⴰⵎ ⵡⴰ ⵢⴻⵙⵙⴻⴼⴽ ⴰⴷ ⵢⴻⵜⵜⵡⴰⵃⵔⴻⵣ ⵢⴻⵔⵏⴰ ⴰⴷ ⵢⴻⵜⵜⵡⴰⵚⴻⴳⴳⴻⵎ ⴰⴽⴽⴻⵏ ⴰⴷ ⵢⴰⴷⴻⴼ ⴷⴻⴳ ⵡⴰⵀⵉⵍ ⴰⵖⴻⵍⵏⴰⵡ ⴷ ⵓⴳⵔⴰⵖⵍⴰⵏ ⵏ ⵓⵎⵏⴻⵏⵏⵉⴹ ⵏ ⵓⵃⴻⵡⵡⴻⵙ ⴷⴻⴳ ⵜⵎⵓⵔⵜ ⵏ ⵍⴻⵣⵣⴰⵢⴻⵔ.

ⵜⵉⴳⵣⵉⵔⵜ-ⴰ ⵢⴻⵍⵍⴰ ⴷⴻⴳ-ⵙ ⵢⵉⵡⴻⵏ ⵏ ⵓⴼⴻⵏⵙⵓ ⴰⵢ ⵢⴻⵜⵜⵡⴰⴱⵏⴰⵏ ⴷⴻⴳ 1860 ⵢⴻⵔⵏⴰ ⵍⴰ ⴷ-ⵜⴻⵜⵜⵉⵍⵉ ⵜⴻⵣⵔⴰⵡⵜ ⵉ ⵓⵚⴻⴳⴳⴻⵎ-ⵏⵏⴻⵙ. ⵏⵏⵉⴳ ⵡⴰⵢⴰ, ⵜⵉⴳⵣⵉⵔⵜ-ⴰ ⵜⴻⵜⵜⵡⴰⵚⴻⵏⵏⴻⴼ ⴷ ⵜⴰⵎⵏⴰⴹⵜ ⵜⵓⵔⴹⵉⴱⵜ ⵢⴻⵙⵄⴰⵏ ⴰⵣⴰⵍ ⴷ ⴰⴳⵔⴰⵖⵍⴰⵏ ⵖⴻⴼ ⵍⴻⵃⵙⴰⴱ ⵏ ⵓⵎⵜⴰⵡⴰ ⵏ ⵔⴰⵎⵙⴰⵔ ⵏ 1971, ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵜⴽⴻⴱⴱⴰⵏⵉⵜ ⴰⵢ ⵍⴰ ⵢⴻⵙⵙⴻⴼⵔⴰⴽⴻⵏ ⴰⴷⴻⴳ-ⴰ.

ⵎⴰⵙⵙ ⴳⵀⵧⵓⵍ ⵢⴻⵏⵏⴰ-ⴷ, ⵙⴻⴳ ⵢⵉⴷⵉⵙ ⵏⵉⴹⴻⵏ, ⴷ ⴰⴽⴽⴻⵏ ⵎⴰⵣⴰⵍ ⴰⵖⵍⵉⴼ ⵍⴰ ⵉⵅⴻⴷⴷⴻⵎ ⵖⴻⴼ ⵜⴻⵎⵙⴰⵍⵜ ⵏ ⵜⵏⵓⵙⵉ ⵏ ⵢⵉⵎⴻⵔⵔⴰⵢⴻⵏ ⵖⴻⵔ ⵢⵉⵎⴻⵣⴷⴰⵖⴻⵏ ⵢⴻⵔⵏⴰ ⴰⵃⴻⵣⵣⵉⴱ-ⴰ ⵢⴻⴱⴷⴰ ⵢⴻⵜⵜⵡⴰⵙⵙⴻⴼⵄⴰⵍ ⵢⴰⴳⵉ ⴷⴻⴳ ⵙⴹⵉⴼ.

ⴰⵏⴻⵖⵍⴰⴼ ⵢⴻⴱⴷⴰ ⵜⵓⵣⵣⵢⴰ-ⵏⵏⴻⵙ ⵙⴻⴳ ⵜⴷⴰⵢⵕⴰ ⵏ ⴱⵏⵉ ⵚⴰⴼ ⴰⵏⴷⴰ ⴰⵢ ⵢⴻⴷⵍⴰ ⵖⴻⴼ ⵜⴻⵣⵔⴰⵡⵜ ⵏ ⵓⵀⴻⵢⵢⵉ ⵏ ⵜⴻⴼⵜⵉⵙⵜ ⵏ ⵕⴻⵛⴳⵓⵏ 1, ⵢⴻⵔⵏⴰ ⵉⴳⴻⵔ-ⴷ ⵜⵉⵖⵔⵉ ⵉ ⵓⵙⵙⴻⵍⵀⵓ ⵏ ⵓⵎⴽⴰⵏ-ⴰ ⵙ ⵜⴻⵖⵣⴻⴼ ⵏ ⵓⵙⴻⴳⴳⴰⵙ.

ⵉ ⵍⵎⴻⵏⴷ ⵏ ⵡⴰⵢⴰ, ⵢⴻⵙⵙⴻⴼⵇⴻⴷ ⵢⵉⵡⴻⵏ ⵏ ⵓⵙⴻⵏⵙⵓ ⴰⵢ ⵍⴰ ⵜⴱⴻⵏⵏⵓ ⵢⵉⵡⴻⵜ ⵏ ⵜⴽⴻⴱⴱⴰⵏⵉⵜ ⵜⵓⵙⵍⵉⴳⵜ ⵢⴻⵔⵏⴰ ⵢⴻⵙⵙⵓⵜⴻⵔ-ⴰⵙ ⴰⴷ ⵜⵇⴰⴷⴻⵔ ⴰⵍⵓⴳ ⵏ ⵛⵛⵓⵔⵓⴹ ⴷ ⵢⵉⵍⵓⴳⴰⵏ ⵏ ⵍⴻⴱⵏⵉ.

ⵎⵉ ⵢⴻⴷⵍⴰ ⵖⴻⴼ ⵜⴻⵣⵔⴰⵡⵉⵏ ⵏ ⵓⵀⴻⵢⵢⵉ ⵏ ⵜⴻⵎⵏⴰⴹⵜ ⵏ ⵓⵙⵙⴻⵎⵖⴻⵔ ⵏ ⵜⵎⴻⵔⵔⵉⵜ, ⴰⵏⴻⵖⵍⴰⴼ ⵉⵃⴻⵜⵜⴻⵜ-ⴷ ⵖⴻⴼ ⵓⵙⵙⴻⵇⴷⴻⵛ « ⵓⵕⵛⵉⴷ » ⵏ ⵡⴰⴽⴰⵍ ⵉⵎⵉ, ⵖⴻⴼ ⵍⴻⵃⵙⴰⴱ-ⵏⵏⴻⵙ, ⵓⵔ ⵢⴻⵙⵙⴻⴼⴽ ⴰⵔⴰ ⴰⴷ ⵢⴻⵜⵜⵡⴰⵙⵙⴻⵇⴷⴻⵛ ⵉ ⵢⵉⵏⴻⵖⵙⴰⵔⴻⵏ ⴽⴰⵏ ⵏ ⵜⴽⴻⵕⵕⵓⵙⵉⵏ, ⵡⴰⵏⴰⴳ ⵢⴻⵙⵙⴻⴼⴽ ⴰⴷ ⵢⴻⵜⵜⵡⴰⵙⵙⴻⵇⴷⴻⵛ ⵉ ⵢⵉⵎⴻⵥⵍⴰ (ⵙⵙⵔⴰⴱⴻⵙ).

ⴷⴻⴳ ⵜⵎⴰⵏⴻⵖⵜ ⵏ ⵜⵡⵉⵍⴰⵢⵜ (ⵡⴻⵀⵕⴰⵏ), ⴰⵏⴻⵖⵍⴰⴼ ⵢⴻⵙⵙⴻⵔⵙ ⴰⵥⵔⵓ ⴰⵎⴻⵣⵡⴰⵔⵓ ⴷⴻⴳ ⵍⴻⴱⵏⵉ ⵏ ⵓⵅⵅⴰⵎ ⵏ ⵜⵎⴻⵀⵍⴰ ⵏ ⵜⵎⴻⵔⵔⵉⵜ ⴷ ⵜⴻⵏⴹⵉ, ⵙⴰⴽⴽⵉⵏ ⵢⴻⵙⵙⴻⴼⵇⴻⴷ ⵜⴰⵣⵔⴰⵡⵜ ⵏ ⵓⵙⴻⵏⴼⴰⵔ ⵏ ⵍⴻⴱⵏⵉ ⵏ ⵓⵙⵓⴷⵓ ⴰⵖⴻⵍⵏⴰⵡ ⵏ ⵓⵙⵙⵉⵍⴻⵖ ⴷⴻⴳ ⵜⵜⴻⴽⵏⵉⵢⵉⵏ ⵏ ⵜⵎⴻⵔⵔⵉⵜ ⴷ ⵢⵉⵙⴻⵏⵙⴰ, ⴰⵎ ⵡⴰⴽⴽⴻⵏ ⴰⵢ ⵢⴻⵔⵥⴻⵎ ⴰⵅⵅⴰⵎ ⴰⵎⴰⵢⵏⵓ ⵏ ⵜⴻⵏⴹⵉ, ⴷ ⴰⵎⴽⴰⵏ ⴰⵢ ⵢⴻⵜⵜⴰⴽⴼⴻⵏ ⴰⵣⴰⵍ ⵉ ⵜⴻⵏⴹⵉ ⵏ ⵜⵡⵉⵍⴰⵢⵜ-ⴰ.