Asebter amenzawi
Iḥezziben imaynuten i ussifses n ussefti deg tmerrit deg Ctembeṛ
ƐIN TIMUCENT – Ad ttwasfeɛlen yiḥezziben imaynuten i ussifses n ussefti deg tmerrit seg Ctembeṛ d asawen, ɣef wakken ay d-yenna ass n lexmis deg Ɛin Timucent uneɣlaf n uheyyi n wakal, n tmerrit d tenḍi, Amar Ghoul.
Iḥezziben-a rzan, gar tɣawsiwin niḍen, assefrek n tmerrit d temnaḍin n ussemɣer n tmerrit, beddu n yisenfaren imerrayen d imeqranen deg waṭas n temnaḍin n tmurt d usɛeddi n yiwen n lqanun aslekman « s wazal-nnes » ara d-yesbanen s udeqqeq ccuruḍ n ussefti, alug n ccuruḍ d tsekkirin ara yettwaqadren deg ussefti, ɣef wakken ay d-yenna uneɣlaf deg yiwet n temlilit d tɣemsa deg tegzirt n Ṛecgun.
« Aḍris-a ad yessenqes aṭas n yikaramen n ussefti d tallit n uzraw n yikaramen-a, am wakken ara iɛawen imseftiyen deg unrar-a, yerna ad yeḍfer tiddit n yisenfaren n lebni », ɣef wakken ay d-yenna, am wakken ay d-iwekked d akken « iduba inagduden ad ɛaqben imseftiyen ur yettqadaren ara alugen n ccuruḍ, yerna yezmer ad asen-yettwakkes ttesriḥ akken ad xedmen deg usenfar-nni am wakken ay yezmer ad asen-yettwakkes ttesriḥ n ussefti ».
« Ula d akal ad t-terzu temsalt n yiḥezziben-a, imi kra n temnaḍin n ussemɣer n tmerrit yella-d deg-sent urkaḍ n ccuruḍ », ɣef wakken ay d-yenna, am wakken ay d-yerna d akken isenfaren imeẓyanen n ussefti d iduba idiganen ara ten-yesferken yerna ur terri ara tmara ad ten-yessefrek uɣlif.
Deg wayen yerzan ssumat n yisensa, aneɣlaf yenna-d d akken atenti ɣlayit ɣef lǧal n ussuter ameqran ay d-yeggten ɣef yisensa d lexṣaṣ n yisensa. « Aql-aɣ la nesseǧhad tazmert n ummager n yisensa », ɣef wakken ay d-iwekked.
Deg wayen yerzan tigzirt n Ṛecgun, Mass Ghoul yenna-d d akken aɣlif n uheyyi n wakal d tmerrit ur yettɛeḍḍil ara ad yestenyi leɛqed d uɣlif n yidles akken ad sterren tigzirt-a yerna ad tt-id-heyyin i uḥewwes. Dɣa s waya ara tesɛu imnenniḍen n uḥewwes ara yettekkin deg wahil n tneflit n tmerrit taɣelnawt d tegraɣlant.
Ad d-yili daɣ leɛqed am wa d uɣlif n tɣawsiwin n ddin yerna ad yerzu aḥraz d uṣeggem n yideggen d imedruzen inselmen, ladɣa tamesgida tamaynut n Wehṛan.
D acu kan, tamhelt n uheyyi n tegzirt n Ṛecgun yessefk ad tqader ilugan n uḥraz n twennaḍt yerna ur tettbeddil ara ṣṣifat n twennaḍt n tegzirt-a, ɣef wakken ay d-yenna.
Mi yerza ɣef tegzirt n « Laila », Mass Ghoul yenna-d d akken « yetɛejjeb » s udeg-a yerna yenna-d d akken « asɣun » am wa yessefk ad yettwaḥrez yerna ad yettwaṣeggem akken ad yadef deg wahil aɣelnaw d ugraɣlan n umnenniḍ n uḥewwes deg tmurt n Lezzayer.
Tigzirt-a yella deg-s yiwen n ufensu ay yettwabnan deg 1860 yerna la d-tettili tezrawt i uṣeggem-nnes. Nnig waya, tigzirt-a tettwaṣennef d tamnaḍt turḍibt yesɛan azal d agraɣlan ɣef leḥsab n umtawa n Ramsar n 1971, ɣef wakken ay d-tenna tkebbanit ay la yessefraken adeg-a.
Mass Ghoul yenna-d, seg yidis niḍen, d akken mazal aɣlif la ixeddem ɣef temsalt n tnusi n yimerrayen ɣer yimezdaɣen yerna aḥezzib-a yebda yettwassefɛal yagi deg Sḍif.
Aneɣlaf yebda tuzzya-nnes seg tdayṛa n Bni Ṣaf anda ay yedla ɣef tezrawt n uheyyi n teftist n Ṛecgun 1, yerna iger-d tiɣri i usselhu n umkan-a s teɣzef n useggas.
I lmend n waya, yessefqed yiwen n usensu ay la tbennu yiwet n tkebbanit tusligt yerna yessuter-as ad tqader alug n ccuruḍ d yilugan n lebni.
Mi yedla ɣef tezrawin n uheyyi n temnaḍt n ussemɣer n tmerrit, aneɣlaf iḥettet-d ɣef usseqdec « uṛcid » n wakal imi, ɣef leḥsab-nnes, ur yessefk ara ad yettwasseqdec i yineɣsaren kan n tkeṛṛusin, wanag yessefk ad yettwasseqdec i yimeẓla (ssrabes).
Deg tmaneɣt n twilayt (Wehṛan), aneɣlaf yessers aẓru amezwaru deg lebni n uxxam n tmehla n tmerrit d tenḍi, sakkin yessefqed tazrawt n usenfar n lebni n Usudu aɣelnaw n ussileɣ deg ttekniyin n tmerrit d yisensa, am wakken ay yerẓem axxam amaynu n tenḍi, d amkan ay yettakfen azal i tenḍi n twilayt-a.
