ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵢⴰⵎⴰⵏ: ⴰⴷ ⵢⴻⵃⴱⴻⵙ ⵢⵉⵎⴻⵏⵖⵉ 5 ⵏ ⵡⵓⵙⵙⴰⵏ ⵉ ⵓⵄⴰⵡⴻⵏ ⵏ ⵎⴻⴷⴷⴻⵏ
ⵔⵉⵢⴰⴹ– ⵜⴰⵎⵙⵉⵙⵉⵜ ⵢⴻⵍⵍⴰⵏ ⴷⴷⴰⵡ ⵕⵕⴰⵢ ⵏ ⵜⴳⴻⵍⴷⴰ ⵜⴰⵙⴰⵄⵓⴷⵉⵜ ⵢⴻⵔⵏⴰ ⵜⴻⵜⵜⵏⴰⵖ ⵎⴳⴰⵍ ⵢⵉⵃⵓⵜⵉⵢⴻⵏ ⵜⴻⵏⵏⴰ-ⴷ ⴰⵙⵙ ⵏ ⵙⵙⴻⴱⵜ ⴷⴰⴽⴽⴻⵏ ⴰⴷ ⴷ-ⵢⵉⵍⵉ ⵓⵃⴱⴰⵙ ⵏ ⵢⵉⵎⴻⵏⵖⵉ ⵏ ⵙⴻⵎⵎⵓⵙ ⵏ ⵡⵓⵙⵙⴰⵏ ⵙⴻⴳ ⵡⴰⵙⵙ ⵏ ⵍⵃⴻⴷⴷ ⴷ ⴰⵙⴰⵡⴻⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵜⵏⴻⴳⴳⴰ ⵏ ⵢⵉⵙⴰⵍⴰⵏ ⵜⴰⵙⴰⵄⵓⴷⵉⵜ.
ⴰⵃⴱⴰⵙ-ⴰ ⵏ ⵢⵉⵎⴻⵏⵖⵉ ⵓⵄⴹⵉⵍ ⵢⴻⵍⵍⴰ-ⴷ ⵙ ⵓⵙⵙⵓⵜⴻⵔ ⵏ ⵓⵙⴻⵍⵡⴰⵢ ⴰⵢⴰⵎⴰⵏⵉ ⵉⵎⴻⵏⵏⴻⵊⵍⵉ ⴰⴱⴻⴷ ⵔⴰⴱⴱⵧ ⵎⴰⵏⵙⵧⵓⵔ ⵀⴰⴷⵉ, ⴷ ⴰⵙⵙⵓⵜⴻⵔ ⴰⵢ ⵢⵓⵣⴻⵏ ⴷⴻⴳ ⵜⴻⴱⵕⴰⵜ ⵉ ⵓⴳⴻⵍⵍⵉⴷ ⵙⴰⵍⵎⴰⵏ ⴱⵉⵏ ⴰⴱⴷⵓⵍⴰⵣⵉⵣ ⴰⵍ ⵙⴰⵓⴷ ⵏ ⵜⴳⴻⵍⴷⴰ ⵜⴰⵙⴰⵄⵓⴷⵉⵜ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵜⴻⵖⴱⴰⵍⵓⵜ-ⴰ.
ⴷ ⴰⵛⵓ ⴽⴰⵏ, ⵜⴰⵎⵙⵉⵙⵉⵜ ⵜⴻⵏⵏⴰ-ⴷ ⴷⴰⴽⴽⴻⵏ ⵎⴰ ⵢⴻⵍⵍⴰ ⵉⵎⴻⵏⵖⴰⵏ ⵉⵃⵓⵜⵉⵢⴻⵏ ⴷ ⵢⵉⵖⴰⵍⵍⴻⵏ ⴰⵢ ⵢⴻⴷⴷⴰⵏ ⵢⵉⴷ-ⵙⴻⵏ ⵓⴳⵉⵏ ⴰⴷ ⵃⴻⴱⵙⴻⵏ ⵉⵎⴻⵏⵖⵉ ⴷⴻⴳ ⵜⴰⵍⵍⵉⵜ-ⴰ ⵏ ⵓⵃⴱⴰⵙ, ⴰⴷ ⴷ-ⵃⴻⵜⵜⵎⴻⵏ ⴼⴻⵍⵍ-ⴰⵙⴻⵏ ⵜⴰⵔⴳⵓⵍⵜ ⵙⴻⴳ ⵢⵉⴳⴻⵏⵏⵉ ⴷ ⵍⴻⴱⵃⴻⵕ.
ⵎⴰⵛⵉ ⴷ ⵡⴰ ⴰⵢ ⴷ ⴰⵃⴱⴰⵙ ⵏ ⵢⵉⵎⴻⵏⵖⵉ ⴰⵎⴻⵣⵡⴰⵔⵓ ⴰⵔⴰ ⴷ-ⵢⵉⵍⵉⵏ ⵉ ⵍⵎⴻⵏⴷ ⵏ ⵓⵄⴰⵡⴻⵏ ⵏ ⵡⵉⴷ ⵢⴻⵏⴹⴻⵔⵔⴻⵏ, ⴷ ⴰⵛⵓ ⴽⴰⵏ, ⴰⴽⴽ ⵉⵃⴱⴰⵙⴻⵏ ⵏⵉⴹⴻⵏ ⵓⵔ ⵄⴻⴹⴹⵍⴻⵏ ⴰⵔⴰ ⵉⵎⵉ ⵓⵍⴰ ⴷ ⵢⵉⵡⴻⵏ ⵏ ⵢⵉⴷⵉⵙ ⵓⵔ ⵉⵇⵓⴷⴻⵔ ⵙ ⵜⵉⴷⴻⵜ ⵉⵃⴱⴰⵙⴻⵏ-ⵏⵏⵉ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵏⵏⴰⵏ ⵢⵉⵎⴰⵏⴰⵢⴻⵏ ⵉⴷⵉⴳⴰⵏⴻⵏ. ⴰⵔ ⵉⵎⵉⵔ-ⴰ, ⵉⵃⵓⵜⵉⵢⴻⵏ ⵡⴻⵔⵄⴰⴷ ⵓⵔ ⴷ-ⵏⵏⵉⵏ ⴰⵔⴰ ⵎⴰ ⴰⴷ ⵇⴰⴷⵔⴻⵏ ⴰⵃⴱⴰⵙ-ⴰ ⵏ ⵢⵉⵎⴻⵏⵖⵉ ⵏⴻⵖ ⵓⵀⵓ.
ⵜⴰⵎⵙⵉⵙⵉⵜ ⵢⴻⵍⵍⴰⵏ ⴷⴷⴰⵡ ⵕⵕⴰⵢ ⴰⵙⴰⵄⵓⴷⵉ ⵜⴻⴱⴷⴰ-ⴷ ⵟⵟⵔⴰⴷ ⵎⴳⴰⵍ ⵢⵉⵃⵓⵜⵉⵢⴻⵏ ⴷⴻⴳ ⵎⴻⵖⵔⴻⵙ ⵢⴻⵣⵔⵉⵏ ⴰⴽⴽⴻⵏ ⴰⴷ ⴷ-ⵜⴻⵔⵔ ⴰⴷⴰⴱⵓ ⵏ ⵓⵙⴻⵍⵡⴰⵢ ⵀⴰⴷⵉ ⵖⴻⵔ ⵜⵎⵓⵔⵜ-ⴰ, ⵢⴻⵔⵏⴰ ⴰⵎⵓⵔ ⴰⵎⴻⵇⵔⴰⵏ ⵙⴻⴳ ⵡⴰⴽⴰⵍ ⵏ ⵢⴰⵎⴰⵏ ⴰⵜⴰⵏ ⴳⴰⵔ ⵢⵉⴼⴰⵙⵙⴻⵏ ⵏ ⵢⵉⵃⵓⵜⵉⵢⴻⵏ.
ⴷⴻⴼⴼⵉⵔ 3 ⵏ ⵡⴰⵢⵢⵓⵔⴻⵏ ⵏ ⵜⵢⵉⵜⵉⵡⵉⵏ ⵜⵉⴳⴻⵏⵡⴰⵏⵉⵏ ⴷ ⵟⵟⵔⴰⴷ ⴰⵖⴰⵔⵉⵎ, ⵢⴰⵎⴰⵏ ⵉⵃⵓⵣⴰ-ⵜⵜ ⵓⵅⴻⵚⵚⴰⵔ ⴷ ⴰⵎⴻⵇⵔⴰⵏ ⵢⴻⵔⵏⴰ ⴷⴻⴳ ⵜⵎⵓⵔⵜ-ⴰ ⵏ 24 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⵎⴻⵣⴷⴰⵖⴻⵏ, 80% ⵙⴻⴳ ⵎⴻⴷⴷⴻⵏ ⴰⵢ ⵢⴻⵏⴹⴻⵔⵔⴻⵏ ⵢⴻⵔⵏⴰ ⵃⵡⴰⴵⴻⵏ ⵍⴻⵎⵄⴰⵡⵏⴰ. ⵓⴳⴰⵔ ⵏ 3000 ⵏ ⵢⵉⵎⴷⴰⵏⴻⵏ ⴰⵢ ⵢⴻⵜⵜⵡⴻⵏⵖⴻⵏ ⵢⴻⵔⵏⴰ ⵓⴳⴰⵔ ⵏ ⵓⵎⴻⵍⵢⵓⵏ ⴰⵢ ⵢⴻⴼⴼⵖⴻⵏ ⵙⴻⴳ ⵢⵉⵅⵅⴰⵎⴻⵏ-ⵏⵙⴻⵏ.
