Asebter amenzawi

Aǧaw n sselɛa: asseḥṛes n ccerḍt n ussezdeɣ deg tbanka

LEZZAYER – Tadwant d tbankiwin ad sǧehdent assefqed-nsent ucrik i ussezdeɣ n temhal n waǧaw n sselɛa seg uzɣar i lmend n uḥaṛeb n ussekki n yidrimen ibeṛṛaniyen ay ttgen kra n yimaǧawen, ɣef wakken ay d-yenna ass n lḥedd unemhal amatu n Tedwant, Mass Kaddour Bentahar, i Tnegga n Yisalan n Lezzayer.

I lmend n unadi igerrzen ugar ɣef yimaǧawen ay yessuffuɣen idrimen ibeṛṛaniyin beṛṛa i lqanun, Tamehla tamatut n tedwant d Tiddukla n tbankiwin d yiɣsuren idrimanen (ABEF) ad stenyint, deg wussan ay d-yetteddun, yiwet n tenwi ara rnunt ɣer leɛqed-nsent n umbaddel n telɣa ay stenyant yagi deg Meɣres n 2014.

S tenwi-a, mi ara yessuter umaǧaw assezdeɣ deg tbanka, ad sfeqden ma yella ur yesɛi ara yagi yiwen.

ɣef leḥsab n Mass Bentahar, tinwi-a d tin ara yeǧǧen tadwant d Tiddukla n tbankiwin d yiɣsuren n tedrimt ad mbaddalent tilɣa ɣef wakk issutren n ussezdeɣ deg tbanka n tkebbaniyin ay ixeddmen deg tnezzut tabeṛṛanit.

Ambaddel-a ad d-yili s uselkim yerna ad yeǧǧ tibankiwin ad sseqdacent inagrawen n usselɣu n tedwant (Sigad) akken ad sfeqden ma yella takebbanit tamaǧawt tesɛa ttesriḥ n waǧaw iṣeḥḥan, yerna ttesriḥ-a d ccerḍ i lmend n ussezdeɣ n waǧaw deg tbanka, ɣef wakken ay d-yenna yiwen n yimḍebber niḍen n Tmehla tamatut n tedwant.