Asebter amenzawi

Yaman: mmuten 55 n medden deg yiwet n tyita tagenwant deg Taɛez

ṢENƐA – Mmuten, ma ulac, 55 n medden am wakken ay jerḥent aṭas n tmerwin deg yiwet n tyita tagenwant ay tga temsisit yellan ddaw ṛṛay asaɛudi ɣef temdint n Taɛez, deg tlemmast n Yaman, ɣef wakken ay d-tenna tnegga n yisalan n Saba.

Anṭag-a agenwan iḥukeṛ agmam n Mokha, ɣef leḥsab n yiwet n teɣbalut ay d-tebder Saba, yerna yezmer ad yimɣur leḥsab n wid yemmuten, ɣef wakken ay d-terna teɣbalut-a.

Tamsisit-a yellan ddaw ṛṛay asaɛudi la tekkat imsellḥen n temlicin tiḥutiyin d tyunin tiserdasiyin yeddan d uselway aqbur Ali Abdallah Saleh. Tiyitiwin-a bdant-d seg tgara n Meɣres yerna iswi-nsent netta d iriri n uselway Abd-Rabbou Mansour Hadi ɣer udabu. I usmekti, aselway-a yennejli seg wayyur n Fuṛaṛ ɣer Tgelda Tasaɛudit.

Imenɣan ay yeddan d unabaḍ ɛawden ḍḍfen anafag agraɣlan n Ɛaden d umur ameqran seg temdint-a n yiri n lebḥeṛ deg 14 Yulyu yezrin.

Sin n yisafagen isaɛudiyen ay d-yersen ass n ljemɛa deg unafag n Ɛaden akken ad d-ssiwḍen ttawil ay yessefken i uɛawed n urẓam n unafag-a ay imedlen 4 n wayyuren aya ɣef lǧal n yimenɣi, ɣef leḥsab n ttawilat n yisalan.

Ass n ttlata, Aseqqamu Unnig n Yiɣlanen Yeddukklen i yizerfan n umdan yessumel-d arkaḍ n lqanun alsan agraɣlan ay la d-yettilin sɣur yidisan yemxaṣamen deg Yaman, imi idisan-a zgan kkaten iɣarimen deg wakud aydeg imenɣi la irennu kan deg tmurt-a. ɣef leḥsab n Useqqamu Unnig n yizerfan n umdan, « seg 26 Meɣres yezrin, imenɣi-a yegla s 1693 n yiɣarimen yerna jerḥen 3829 niḍen ».