Asebter amenzawi
Nijir tefka azal i lmeǧhud azzayri « ameqran » i ferru n ccwal deg temnaḍt
NIAMEY- Nijir tefka azal i lmeǧhud « ameqran » ay tetteg Lezzayer akken « ad tesserked » tamnaḍt n Ssaḥel, yerna yettban-d waya s Umtawa n talwit d umsuɣal deg Mali, ɣef wakken ay d-tenna ass n letniyen deg Niamey tneɣlaft tanijirit n tɣawsiwin n uzɣar, n umyalel d unnummed afriqi d Yinijiriyen n uzɣar, Massa Kane Aichatou Boulama.
« Nefka azal i lmeǧhud ameqran n Lezzayer ay yessawḍen ad teg lmeǧhud d ameqran akken ad terked temnaḍt (n Ssaḥel) yerna ad tili deg-s talwit s Umtawa n talwit d umsuɣal deg Mali », ɣef wakken ay d-tenna Massa Boulama i tɣemsa deffir adiwenni-nni ay tga d umtil-nnes adzayri Ramtane Lamamra, d tɣimit-nni n uxeddim ay d-yellan gar tmagliwin n Lezzayer d Nijir.
« Nekkni nettekka deg tebdammast-nni yellan ddaw ṛṛay n Lezzayer yerna nessaweḍ, deg wayyuren-nni ɣezzifen n lemcawṛat, ad nessen azal Mass Lamamra d dduṛ ay yurar akken ad nessiweḍ ɣer umtawa-a », ɣef wakken ay d-tenna tneɣlaft-a.
Taneɣlaft tenna-d d akken Nijir tettɣimi dima tewjed akken ad tkemmel lmeǧhud-nnes deg ukatar n useqqamu n uḍfar n ussefɛel n umtawa-a.
Taneɣlaft n tɣawsiwin n uzɣar n Nijirn tenna-d d akken deg temsalt-a, Nijir mazal-itt la tettemɛawan mliḥ d Lezzayer deg wakk inurar ay yeqqnen ɣer tɣellist d urkad deg temnaḍt-a ama deg wayen yerzan taluft n Mali neɣ tin n Libya.
Massa Boulama tenna-d, seg yidis niḍen, d akken tiɣimit tis 5 n Useqqamu ucrik n tlisa ad d-yili deg Niamey ussan n 30 d 31 seg wayyur-a yerna d ineɣlafen n tɣawsiwin n daxel n Lezzayer d Nijir ara yesselwin timlilit-a.
« Aseqqamu-a ad d-yebder timsal n tlisa yerna ad iḥezzeb i wakk uguren ay izemren ad d-ilin gar tmura-nneɣ deg wayen yerzan tilisa, yerna yessefk ad tili temlilit-a d tameṛkantit yerna d tin ara d-yawi lfayda », ɣef wakken ay d-tenna.
Massa Boulamou tenna-d d akken Lezzayer d Nijir tecrek-itent talast n wazal n 1000 n yikilumitren, yerna snat-a n tmura sɛant « tamuɣli tucrikt » ɣef temsal timeqranin ay yerzan taneflit deg Tefriqt.
Seg yidis niḍen, taneɣlaft tanijirit n tɣawsiwin n uzɣar tenna-d d akken tesqerdec timsal tucrikin d Mass Lamamra.
« Yella umɛawen d aneẓẓaw yerna deg yinurar yemgerraden, ama deg tsertit neɣ deg temḥaddit, neɣ deg tɣellist (laman) » ɣef wakken ay d-tenna.
Taneɣlaft tebder-d daɣ inurar n teẓwert d lminat, tafellaḥt, tadawsa, assileɣ amsadur d taggazin n tezrawt. I usmekti, Lezzayer tefka, aseggas-a, 200 n taggazin n tezrawt i yinelmaden inijiriyen.
