ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⴰⵙⵙⴻⵏⵇⴻⵙ ⴷⴻⴳ ⵙⵙⵓⵎⴰ ⵏ ⵢⵉⵙⴻⵔⵖⴰ ⵓⵔ ⵉⵃⴻⴱⴱⴻⵙ ⴰⵔⴰ
ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⴰⵏⴰⴱⴰⴹ ⵓⵔ ⵍⴰ ⵢⴻⵙⵙⴻⴼⵔⴰⵢ ⴰⵔⴰ ⴰⴷ ⵢⴻⵃⴱⴻⵙ ⴰⵙⵙⴻⵏⵇⴻⵙ ⴷⴻⴳ ⵙⵙⵓⵎⴰⵜ ⵏ ⵢⵉⵙⴻⵔⵖⴰ, ⴷ ⴰⵛⵓ ⴽⴰⵏ, ⵍⴰ ⵢⴻⵙⵙⴻⴼⵔⴰⵢ ⴰⴷ ⵢⴻⵔⵔ ⵉⵏⴻⵀⵀⴰⵕⴻⵏ ⵜⵜⴻⴽⴽⴰⵏ ⴷⴻⴳ ⵓⵛⵓⵃⵃⵓ ⵖⴻⴼ ⵢⵉⵙⴻⵔⵖⴰ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴰⵙⵙ ⵏ ⵜⵜⵍⴰⵜⴰ ⵓⵏⴻⵖⵍⴰⴼ ⵏ ⵜⴻⴷⵔⵉⵎⵜ, ⴰⴱⴷⴻⵔⵔⴰⵀⵎⴰⵏⴻ ⴱⴻⵏⴽⵀⴰⵍⴼⴰ ⴷⴻⴳ ⵢⵉⵡⴻⵜ ⵏ ⵜⴷⵉⵡⴻⵏⵏⵉⵜ ⴰⵢ ⵉⴳⴰ ⴷ ⵜⵏⴻⴳⴳⴰ ⵏ ⵢⵉⵙⴰⵍⴰⵏ ⵏ ⵍⴻⵣⵣⴰⵢⴻⵔ.
« ⵜⴰⵙⵡⵉⵄⵜ-ⴰ, ⴰⵢⴰ (ⴰⵃⴱⴰⵙ ⵏ ⵓⵙⵙⴻⵏⵇⴻⵙ ⵏ ⵙⵙⵓⵎⴰ ⵏ ⵢⵉⵙⴻⵔⵖⴰ) ⵓⵔ ⴷ-ⵢⴻⵍⵍⵉ ⴰⵔⴰ ⴷⴻⴳ ⵡⴰⵀⵉⵍ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ ⵓⵏⴻⵖⵍⴰⴼ, ⵢⴻⵔⵏⴰ ⵢⴻⵏⵏⴰ-ⴷ ⴷ ⴰⴽⴽⴻⵏ ⵓⵍⴰ ⵎⴰ ⵜⴻⵏⵇⴻⵙ ⵙⵙⵓⵎⴰ ⵏ ⵓⵒⵉⵜⵕⵓⵍ, ⵍⴻⵣⵣⴰⵢⴻⵔ ⵜⴻⵣⵎⴻⵔ ⴰⴷ ⵜⵇⴰⴱⴻⵍ ⵜⴰⴳⵏⵉⵜ-ⴰ.
« ⴰⴷ ⵏⴽⴻⵎⵎⴻⵍ ⴰⴷ ⵏⴻⵜⵜⵚⴻⵔⵔⵉⴼ ⵎⴰⵛⴰ ⵢⴻⵙⵙⴻⴼⴽ ⴰⴷ ⵏⴻⵙⵙⴻⵃⴱⵉⴱⴻⵔ ⴰⴽⴽⴻⵏ ⵓⵔ ⵏⴻⵙⵙⴻⵅⵚⴰⵔ ⴰⵔⴰ ⴰⵟⴰⵙ ⵏ ⵢⵉⴷⵔⵉⵎⴻⵏ (…). ⵢⴻⵙⵙⴻⴼⴽ ⴰⴷ ⵏⴻⵃⴱⴻⵙ ⴰⵙⵙⴻⵅⵚⴻⵔ ⵏ ⵢⵉⴼⴰⵔⵉⵙⴻⵏ ⴷ ⵜⴻⵖⴱⵓⵍⴰ ⴰⵢ ⴷ-ⵢⴻⵙⵙⵉⵔⵅⵉⵙ ⵓⵏⴰⴱⴰⴹ ⴰⵎ ⵙⵙⴽⴻⵕ, ⵣⵣⵉⵜ, ⵍⴼⴰⵕⵉⵏⴰ, ⵜⵔⵉⵙⵉⵜⵉ ⴷ ⵢⵉⵙⴻⵔⵖⴰ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵉⵃⴻⵜⵜⴻⵜ.
ⵖⴻⴼ ⵍⴻⵃⵙⴰⴱ ⵏ ⵓⵏⴻⵖⵍⴰⴼ ⵏ ⵜⴻⴷⵔⵉⵎⵜ, ⵉⴷⵣⴰⵢⵔⵉⵢⴻⵏ ⵢⴻⵙⵙⴻⴼⴽ ⴰⴷ ⵜⵜⴻⴽⴽⵉⵏ ⴷⴻⴳ ⵡⴰⵢⴰ. ⴰⵡⴰⵏⴰⴽ (ⴷⴷⵓⵍⴰ) ⴰⴷ ⵉⵛⵉⵃⵃ ⵉ ⵜⴻⵖⴱⵓⵍⴰ ⴰⵢ ⵢⴻⵙⵄⴰⵏ ⴰⵣⴰⵍ ⵢⴻⵔⵏⴰ ⵓⵔ ⵢⴻⵜⵜⵚⴻⵔⵔⵉⴼ ⴰⵔⴰ ⴼⴻⵍⵍ-ⴰⵙⴻⵏⵜ ⵡⴰⵔ ⵍⴻⵃⵙⴰⴱ, ⵍⴰⴷⵖⴰ ⵉⵎⵉ ⴰⵎⴰⵔⵓⴷ ⵏ ⵓⵡⴰⵏⴰⴽ ⵍⴰ ⵜⵜⵡⴰⴽⴽⴰⵙⴻⵏ ⵙⴻⴳ-ⵙ ⵢⵉⴷⵔⵉⵎⴻⵏ ⴷ ⵉⵎⴻⵇⵔⴰⵏⴻⵏ ⵉ ⵓⵅⴻⵍⵍⴻⵚ ⵏ ⵢⵉⴱⵓⵕⵙⵢⵓⵏⴻⵏ.
ⴰⵏⴻⵖⵍⴰⴼ ⵢⴻⵏⵏⴰ-ⴷ ⴷ ⴰⴽⴽⴻⵏ ⵓⵍⴰ ⵎⴰ ⵜⴻⵖⵍⵉ ⵙⵙⵓⵎⴰ ⵏ ⵓⵒⵉⵜⵕⵓⵍ, ⵍⴻⵣⵣⴰⵢⴻⵔ ⵎⴰⵣⴰⵍ ⵜⴻⵙⵄⴰ ⵉⴷⵔⵉⵎⴻⵏ ⴰⵢⵢⴻⵙ ⴰⵔⴰ ⵜⵇⴰⴱⴻⵍ ⵜⴰⴳⵏⵉⵜ-ⴰ ⵢⴻⵔⵏⴰ ⵓⵔ ⵜⵜ-ⵜⴻⵙⵙⴰⵡⴻⴹ ⴰⵔⴰ ⵜⴻⴳⵏⵉⵜ ⴰⵔⵎⴰ ⵜⴳⴰ-ⴷ ⵜⴰⵙⴻⵔⵜⵉⵜ ⵏ ⵛⵛⴻⵃⵃⴰ ⴷ ⵓⵃⴱⴰⵙ ⵏ ⵓⵙⵙⴻⵏⵇⴻⵙ ⵏ ⵙⵙⵓⵎⴰⵜ.
ⵖⴻⴼ ⵍⴻⵃⵙⴰⴱ-ⵏⵏⴻⵙ, ⵍⴻⵣⵣⴰⵢⴻⵔ ⵜⴻⵙⵙⴰⵡⴻⴹ ⵖⴻⵔ ⵜⴻⴳⵏⵉⵜ-ⴰ ⵉⵎⵉ ⴰⵢ ⵜⵅⴻⵍⵍⴻⵚ ⴹⴹⵍⴰⴱⴰ-ⵏⵏⴻⵙ ⵜⴰⴱⴻⵕⵕⴰⵏⵉⵜ ⵢⴻⵔⵏⴰ ⵜⴻⵊⵎⴻⵄ ⵉⴷⵔⵉⵎⴻⵏ ⴷ ⵉⵎⴻⵇⵔⴰⵏⴻⵏ.
« ⵏⴻⴷⴷⴻⵎ ⵉⵃⴻⵣⵣⵉⴱⴻⵏ ⴰⴽⴽⴻⵏ ⴰⴷ ⵏⴻⵙⵙⴻⵇⵄⴻⴷ ⴰⵎⴰⵔⵓⴷ ⵢⴻⵔⵏⴰ ⴰⴷ ⵏⴻⵙⵙⴻⵕⵛⴻⴷ ⴰⵚⴻⵔⵔⴻⴼ ⴰⵏⴰⴳⴷⵓⴷ. ⵏⵏⵉⴳ ⵡⴰⵢⴰ, ⴰⵇⵍ-ⴰⵖ ⴰⴷ ⴷ-ⵏⴻⵙⵙⴻⵡⵍⵉⵡⴻⵍ ⴰⴽⴽ ⵜⵉⵣⴻⵎⵎⴰⵔ ⵏ ⵜⴻⴷⵔⵉⵎⵜ ⴰⵢ ⵢⴻⵍⵍⴰⵏ ⴱⴻⵕⵕⴰ ⵉ ⵜⴱⴰⵏⴽⵉⵡⵉⵏ » ⵉ ⵓⵙⵙⴻⴵⵀⴻⴷ ⵏ ⵜⵏⴻⴼⵍⵉⵜ ⵜⴰⴷⴰⵎⵙⴰⵏⵜ, ⵢⴻⵔⵏⴰ ⵢⴻⵙⵙⴻⵎⵄⴻⵏ-ⴷ ⵙ ⵡⴰⵢⴰ ⵖⴻⴼ ⵍⵇⴰⵏⵓⵏ ⵏ ⵓⵙⵙⵎⴰⴷ ⵏ ⵜⴻⴷⵔⵉⵎⵜ ⵏ 2015 ⴰⵢ ⵉⴳⴰⵏ ⵉⴼⴰⴷⴷⴻⵏ ⵉ ⵡⵉⴷ ⵢⴻⵙⵄⴰⵏ ⵕⴰⵙⴻⵍⵎⴰⵍ ⴱⴻⵕⵕⴰ ⵉ ⵜⴱⴰⵏⴽⴰ ⴰⴽⴽⴻⵏ ⴰⴷ ⵙⵙⴻⵔⵙⴻⵏ ⵉⴷⵔⵉⵎⴻⵏ-ⵏⵙⴻⵏ ⴷⴻⴳ ⵜⴱⴰⵏⴽⵉⵡⵉⵏ ⵢⴻⵔⵏⴰ ⴰⴷ ⵅⴻⵍⵍⵚⴻⵏ ⴽⴰⵏ ⵍⴻⵖⵔⴰⵎⴰ ⵏ 7%.
« ⵜⴰⵙⴻⵔⵜⵉⵜ ⵜⴰⵏⵎⴻⵜⵜⵉⵜ ⵏ ⵍⴻⵣⵣⴰⵢⴻⵔ ⴰⴷ ⵜⴽⴻⵎⵎⴻⵍ, ⵜⴰⵙⵡⵉⵄⵜ-ⴰ, ⵙ ⵜⵙⴻⵔⵜⵉⵜ ⵏ ⵓⵏⴰⴱⴰⴹ ⴰⵢ ⵢⴻⵙⵙⴻⵃⵙⴰⴱⴻⵏ ⵖⴻⵔ ⵙⴷⴰⵜ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴻⵖⵍⴰⴼ.
ⴷ ⴰⵛⵓ ⴽⴰⵏ, ⴰⵏⴻⵖⵍⴰⴼ ⵉⵄⴻⵢⵢⴻⵏ-ⴷ ⴷ ⴰⴽⴽⴻⵏ ⵉⴷⵣⴰⵢⵔⵉⵢⴻⵏ ⵢⴻⵙⵙⴻⴼⴽ ⴰⴷ ⵍⴻⵎⴷⴻⵏ ⵓⵔ ⵙⵙⴻⵅⵚⴰⵔⴻⵏ ⴰⵔⴰ ⴰⴽⴽⴻⵏ ⴰⴷ ⴳⴻⵏ ⵍⴻⵇⵔⴰⵔ ⵉ ⵜⴻⵖⴱⵓⵍⴰ ⵢⴻⵔⵏⴰ ⴰⴷ ⵛⵉⵃⵃⴻⵏ ⵉ ⵜⵣⴻⵎⵎⴰⵔ ⵏ ⵜⵎⵓⵔⵜ.
