Asebter amenzawi

Aḥbas n ussidef n yimariren ibeṛṛaniyen: Raissi yeqbel ṛṛay n Tfidiṛalit

LEZZAYER TAMANEƔT – Aselway n teɣlamt n MC Lezzayer (Tamɣunt 1ut tadzayrit n tcirt n uḍar) Abdelkrim Raissi yeqbel ass n ttlata ṛṛay n Tfidiṛalit tadzayrit n tcirt n uḍar ay igedlen (imenɛen) assidef n yimariren ibeṛṛaniyen seg tegrest ay d-yetteddun.

« Ttwaliɣ d akken ṛṛay-a ad yeǧǧ imariren iɣelnawen ad sɛun azal meɣɣren ugar, yerna qesdeɣ-d ladɣa ilemẓiyen, imi tikkal, tiɣlamin aydeg ay lemden ad uraren ttaǧǧant-ten yerna ttawint-d imariren ibeṛṛaniyen deg umur-nsen, yili imariren-a, s umata, ur d-ttawin acemma izaden », ɣef wakken ay d-yenna uselway n Muludeyya n Tmaneɣt i Tnegga n Yisalan n Lezzayer.

Tanarit tafidiṛalit n Tfidiṛalit tadzayrit n tcirt n uḍar temlal ass n ssebt deg yiwet n tɣimit tanumant yerna teɛzem ad tegdel assidef n yimariren ibeṛṛaniyen ɣer teɣlamin timsadurin seg tegrest ay d-yetteddun.

Imariren ibeṛṛaniyen ay yesɛan yagi leɛqudat zemren ad kemmlen ad uraren arma fuken leɛqudat-nsen d teɣlamin-nsen, ɣef wakken ay d-tenna teɣbalut-a.

« S uḥezzib-a amaynu, ad neqqel ur nesṛuḥuy ara imariren-nneɣ ilemẓiyen yerna d nitni ay d azekka n teɣlamin-nsen. D acu kan, cikkeɣ d akken maci dindin kan ara d-tban lfayda n ṛṛay-a », ɣef wakken ay d-yenna Raissi.

Taɣlamt n MC Lezzayer llan deg-s 3 n yimariren ibeṛṛaniyen, wi d amḥaddi akamruni Patrick Ngoula, amenṭag ityupi Salaheddine Saidi d ulemmas abrizili Roberson.

Imariren-a ad ffɣen seg teɣlamt-a asmi ara faken leɛqudat-nsen.