Asebter amenzawi
Taɣerdayt: tiɣri i yilemẓiyen akken ad fernen abrid n talwit deg ferru n wuguren-nsen
LEZZAYER TAMANEɣT – Aneɣlaf n uwanak, aneɣlaf n tɣawsiwin n uzɣar d umyalel agraɣlan, Ramtane Lamamra, iger-d tiɣri ass n lexmis deg Lezzayer Tamaneɣt i yilemẓiyen n Tɣerdayt akken ad smenyifen abrid n talwit deg ferru n wuguren-nsen yerna ad ḍefren tinṣiḥin n yimasnagen.
Mi yettwatter Mass Lamamra ɣef wassaɣen idelsanen ay yellan gar Tselṭna n Ɛuma d Lezzayer (ladɣa d Tɣerdayt), yenna-d uneɣlaf deg yiwen n usarag n tɣemsa ay d-iga d umtil-nnes aɛumani Youcef Ben Alaoui Ben Abdallah d akken « ilemẓiyen d aḥric s wazal-nnes deg wakk timettiyin », yerna iger-d tiɣri i ufran n talwit deg ferru n wuguren d uḍfar n tenṣiḥin n yimasnagen n temnaḍt-a (Taɣerdayt).
« Mi d-yettwabder d akken yella-d ufus abeṛṛani deg Tɣerdayt, maci d Taselṭna n Ɛuman ay d-yettwaqesden », yerna tamurt-a cerken-tt wassaɣen n tegmat d Lezzayer, ɣef wakken ay d-yenna Lamamra, am wakken ay d-yerna d akken « win ara d-yessukken tiṭ ɣef wamek ay tedda tenbaḍt deg tmurt-a, ad iẓer d akken Ɛuman, am Lezzayer, tettakf azal i ussebded n tgadda gar akk iɣermanen-nnes yerna tekkat akken ad d-tḥettem tiɣɣermi deg wakk timnaḍin n Tsenlṭna. Yella yella ula deg Lezzayer », ɣef wakken ay d-yenna.
Mass Lamamra yenna-d daɣ d akken snat-a n tmura ttqadarent lqanun deg wayen yerzan ferru n wuguren idiganen, akken bɣun ilin.
Lezzayer « la tesseḥbibir ɣef tugdut deg ara ttekkin akk medden, amnekni deg tneflit deg wakk timnaḍin n tmurt d ussugget n lmeǧhud n wakk medden akken ad frun wuguren n tmurt s uqader n lqanun ay d-yekkan nnig akk medden », ɣef wakken ay d-yenna Mass Lamamra.
Seg yidis-nnes, Mass Youcef Ben Alaoui Ben Abdallah yefṛeḥ s « wassaɣen idelsanen ay yeqqnen tamurt-nnes d Lezzayer, tamurt taweltmat, d temnaḍt n Tɣerdayt », am wakken ay d-yenna d akken Taselṭna n Ɛuman « teẓra d akken Lezzayer d tamurt taɛṛabt taweltmat ay yekkaten akken ad tesnefli akk imedzaɣen d temnaḍin-nnes ».
Dɣa, deg temsalt-a, iger-d tiɣri i « wakk iɣermanen, akken yebɣu yili yidles-nsen, akken ad myeqbalen, ad xedmen akken yerna ad mɛawanen », am wakken ay d-yerna d akken anabaḍ d uwanak n Lezzayer « zemren ad frun akk uguren yerna ad d-ssersen amsefham gar yilemẓiyen n temnaḍt-a ».
