ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵍⵇⴰⵏⵓⵏ ⴰⵎⴰⵢⵏⵓⵜ ⵉ ⵓⵙⵙⴻⵇⵄⴻⴷ ⵏ ⵓⵅⴻⴷⴷⵉⵎ ⵏ ⵜⴽⴻⴱⴱⴰⵏⵉⵢⵉⵏ ⴰⵢ ⵢⴻⵙⵏⵓⵣⵓⵢⴻⵏ ⵜⵉⴽⴻⵕⵕⵓⵙⵉⵏ ⵜⵉⵎⴰⵢⵏⵓⵜⵉⵏ

ⵍⴻⵣⵣⴰⵢⴻⵔ – ⵛⵛⵓⵔⵓⴹ ⵏ ⵓⵅⴻⴷⴷⵉⵎ ⵏ ⵜⴽⴻⴱⴱⴰⵏⵉⵢⵉⵏ ⴰⵢ ⵢⴻⵙⵏⵓⵣⵓⵢⴻⵏ ⵜⵉⴽⴻⵕⵕⵓⵙⵉⵏ ⵜⵉⵎⴰⵢⵏⵓⵜⵉⵏ ⴰⴷ ⵜⵜⵡⴰⵙⵇⴻⵄⴷⴻⵏ ⵙ ⵍⵇⴰⵏⵓⵏ ⴰⴳⵔⴰⵖⵍⵉⴼ ⴰⵎⴰⵢⵏⵓ ⴰⵢ ⴷ-ⵢⴻⴼⴼⵖⴻⵏ ⴷⴻⴳ ⵓⵖⵎⵉⵙ ⵓⵏⵚⵉⴱ ⵡⵉⴷ 41.

ⵍⵇⴰⵏⵓⵏ-ⴰ ⴷ ⵡⵉⵏ ⴰⵢ ⵢⴻⵙⵔⴻⴽⴷⴻⵏ ⵛⵛⵓⵔⵓⴹ ⵏ ⵓⵙⵙⴻⵏⵣⵉ ⵏ ⵜⴽⴻⵕⵕⵓⵙⵉⵏ, ⵢⴻⵔⵏⴰ ⵢⴻⵙⴱⴰⵏ-ⴷ ⵛⵛⵓⵔⵓⴹ ⵏ ⵡⴰⴵⴰⵡ ⵏ ⵜⴽⴻⵕⵕⵓⵙⵉⵏ ⵜⵉⵎⴰⵢⵏⵓⵜⵉⵏ ⵙⴻⴳ ⵜⵎⵓⵔⴰ ⵏ ⵓⵣⵖⴰⵔ ⴷ ⵍⴻⴽⵡⴰⵖⴻⴹ ⴰⵢ ⵢⴻⵙⵙⴻⴼⴽ ⴰⴷ ⴷ-ⵜⵜⵡⴰⵙⵡⴻⵊⴷⴻⵏ ⵉ ⵓⵙⵙⴻⵣⴷⴻⵖ ⴷⴻⴳ ⵜⴱⴰⵏⴽⴰ.

ⵍⵇⴰⵏⵓⵏ-ⴰ ⵢⴻⵙⴱⴰⵏⴰⵢ-ⴷ ⴷⴰⵖ ⵛⵛⵓⵔⵓⴹ ⵏ ⵓⵅⴻⵍⵍⴻⵚ ⵏ ⵍⴻⵖⵔⴰⵎⴰ ⵏ ⵜⴻⴷⵡⴰⵏⵜ ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵜⵉⴽⴻⵕⵕⵓⵙⵉⵏ ⴰⵢ ⴷ-ⵢⴻⵜⵜⵡⴰⵣⵏⴻⵏ ⵙⵔⵉⴷ ⵖⴻⵔ ⵍⴻⵣⵣⴰⵢⴻⵔ ⵓⵇⴱⴻⵍ 15 ⵢⴻⴱⵔⵉⵔ 2015.

ⵉⵃⵓⵣⴰⵏ-ⴷ ⴷⴰⵖ ⵍⵇⴰⵏⵓⵏ-ⴰ ⵜⵉⴽⴻⵕⵕⵓⵙⵉⵏ ⵜⵉⵎⴰⵢⵏⵓⵜⵉⵏ ⴰⵢ ⵢⴻⵜⵜⵡⴰⵙⵇⴻⴷⵛⴻⵏ ⵙⴻⴳ ⵍⴻⵄⴹⵉⵍ ⴷⴻⴳ ⵢⵉⵙⴻⵏⴼⴰⵔⴻⵏ ⵉⵏⴰⴳⴷⵓⴷⴻⵏ ⵓⵇⴱⴻⵍ 15 ⵢⴻⴱⵔⵉⵔ ⵏ ⵓⵙⴻⴳⴳⴰⵙ-ⴰ, ⴷ ⵜⴽⴻⵕⵕⵓⵙⵉⵏ ⵏ ⵢⵉⵎⴻⵥⵍⴰ (ⵙⵙⵔⴰⴱⴻⵙ) ⵏ ⵓⵡⴰⵏⴰⴽ, ⵏ ⵜⵎⴰⵣⴷⴰⵢⵉⵏ ⵜⵉⴷⵉⴳⴰⵏⵉⵏ ⴷ ⵢⵉⵖⵙⵓⵔⴻⵏ ⵉⴷⴻⴱⵍⴰⵏⴻⵏ.

ⵜⵜⵡⴰⴱⴻⴷⵔⴻⵏ-ⴷ ⴷⴰⵖ ⴷⴻⴳ ⵍⵇⴰⵏⵓⵏ-ⴰ ⵍⴻⴽⵡⴰⵖⴻⴹ ⴰⵢ ⴷ-ⵢⴻⵙⵙⴽⴰⵏⴰⵢⴻⵏ ⴷ ⴰⴽⴽⴻⵏ ⵜⴰⴽⴻⵕⵕⵓⵙⵜ ⵜⵡⴰⵜⴰ ⵛⵛⵓⵔⵓⴹ ⴰⵢ ⴷ-ⵢⴻⵛⵔⴻⴹ ⵍⵇⴰⵏⵓⵏ ⵢⴻⵔⵏⴰ ⵢⴻⵙⵙⴻⴼⴽ ⴰⴷ ⵜⵜⵓⵏⴻⴼⴽⴻⵏ ⴷⴻⴳ ⵓⴽⴰⵔⴰⵎ ⵏ ⵓⵙⵙⴻⵣⴷⴻⵖ ⴷⴻⴳ ⵜⴱⴰⵏⴽⴰ.

ⵙ ⵡⴰⵢⴰ, « ⵜⵉⴽⴻⵕⵕⵓⵙⵉⵏ ⵜⵉⵎⴰⵢⵏⵓⵜⵉⵏ ⴰⵢ ⴷ-ⵢⴻⵜⵜⵡⴰⵣⵏⴻⵏ ⵖⴻⵔ ⵍⴻⵣⵣⴰⵢⴻⵔ ⵓⵇⴱⴻⵍ 15 ⵢⴻⴱⵔⵉⵔ 2015 –ⵙ ⵜⵜⴱⵓⵜ ⵏ ⵍⴻⴽⵡⴰⵖⴻⴹ ⵏ ⵓⵎⴻⵙⵏⵉ- ⵓⵔ ⵜⴻⵏ-ⵢⴻⵔⵣⵉ ⴰⵔⴰ ⵓⵃⴻⵣⵣⵉⴱ ⵏ ⵓⵎⴰⴳⵔⴰⴷ ⵡⵉⵙ 23 ⵏ ⵜⴻⵎⵔⵓⵣⵜ 1, ⵏ ⵡⴰⵍⵓⴳ ⵏ ⵛⵛⵓⵔⵓⴹ ⴰⵢ ⴷ-ⵢⴻⵜⵜⵡⴰⵙⵙⴻⴼⵔⴰⵏ ⴷⴻⴳ ⵎⴻⵖⵔⴻⵙ ⵢⴻⵣⵔⵉⵏ ».

ⴰⵎⴰⴳⵔⴰⴷ 23 ⵏ ⵍⵇⴰⵏⵓⵏ-ⴰ ⵢⴻⵏⵏⴰ-ⴷ ⴷ ⴰⴽⴽⴻⵏ « ⵜⵉⴽⴻⴱⴱⴰⵏⵉⵢⵉⵏ ⵏ ⵓⵙⵙⴻⵏⵣⵉ ⵏ ⵜⴽⴻⵕⵕⵓⵙⵉⵏ ⵓⵔ ⵙⵄⵉⵏⵜ ⴰⵔⴰ ⵜⵜⴻⵙⵔⵉⵃ ⴰⴷ ⵙⵙⴻⵏⵣⴻⵏⵜ ⵜⵉⴽⴻⵕⵕⵓⵙⵉⵏ ⴰⵢ ⴷ-ⵢⴻⵜⵜⵡⴰⴵⵡⴻⵏ ⵙⴻⴳ ⵓⵣⵖⴰⵔ ⴰⵔⵎⴰ ⵙⵄⴰⵏⵜ ⵜⴽⴻⵕⵕⵓⵙⵉⵏ-ⴰ ⵛⵛⵓⵔⵓⴹ ⵏ ⵜⵖⴻⵍⵍⵉⵙⵜ (ⵍⴰⵎⴰⵏ) ⵢⴻⵜⵜⵡⴰⵇⴰⴷⴰⵔⴻⵏ ⴷⴻⴳ ⵓⵎⴰⴹⴰⵍ, ⵢⴻⵔⵏⴰ ⵢⴻⵙⵙⴻⴼⴽ ⵜⴽⴻⵕⵕⵓⵙⵉⵏ-ⴰ ⴰⴷ ⵏⵣⴻⵏⵜ ⴷⴻⴳ ⵓⵥⴻⴹⴹⴰ ⵏ ⵓⴼⵔⴰⵇ ⴰⵢ ⵢⴻⵙⵄⴰⵏ ⵜⵜⴻⵙⵔⵉⵃ ⵏ ⵢⵉⵎⴻⵥⵍⴰ ⵏ ⵓⵖⵍⵉⴼ ⵏ ⵜⴻⵎⴳⵓⵔⵉ ».

ⵜⵉⴽⴻⵕⵕⵓⵙⵉⵏ ⵜⵉⵎⴰⵢⵏⵓⵜⵉⵏ ⵢⴻⵙⵙⴻⴼⴽ ⴰⴷ ⴷ-ⴰⴷⴼⴻⵏⵜ ⵖⴻⵔ ⵜⵎⵓⵔⵜ ⵎⴰ ⴰⵟⴰⵙ 6 ⵏ ⵡⴰⵢⵢⵓⵔⴻⵏ ⴷⴻⴼⴼⵉⵔ 23 ⵎⴻⵖⵔⴻⵙ 2015, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⴱⴷⴻⵔ ⵍⵇⴰⵏⵓⵏ-ⴰ.

« ⵜⵉⴽⴻⵕⵕⵓⵙⵉⵏ ⵏⵉⴹⴻⵏ ⵓⵔ ⵢⴻⵔⵣⵉ ⴰⵔⴰ ⵡⴰⵢⴰ ⴷ ⵜⵉⴷ ⴰⵢ ⴷ-ⵢⴻⵜⵜⵡⴰⴵⵡⴻⵏ ⵉ ⵍⵎⴻⵏⴷ ⵏ ⵢⵉⵙⴻⵏⴼⴰⵔⴻⵏ ⵉⵏⴰⴳⴷⵓⴷⴻⵏ, ⴰⵍⴰ ⵎⴰ ⵢⴻⵍⵍⴰ ⴰⵙⴻⵏⴼⴰⵔ-ⵏⵏⵉ ⵢⴻⵜⵜⵓⵏⴻⴼⴽ ⵙⴻⴳ ⵍⴻⵄⴹⵉⵍ ⴽⴰⵏ, ⴰⵢ ⴷ-ⵢⴻⵍⵍⴰⵏ ⵓⵇⴱⴻⵍ ⵏ 15 ⵢⴻⴱⵔⵉⵔ 2015, ⵎⴰⵛⴰ ⵜⵉⴽⴻⵕⵕⵓⵙⵉⵏ-ⴰ ⵢⴻⵙⵙⴻⴼⴽ ⴰⴷ ⵙⵄⵓⵏⵜ ⵜⵜⴻⵙⵔⵉⵃ ⵏ ⵜⵙⴻⵇⵇⴰⵎⵓⵜ ⵏ ⵡⵓⵍⵣⵓⵣⴻⵏ ⵉⵏⴰⴳⴷⵓⴷⴻⵏ ⴰⵢ ⵜⴻⵔⵣⴰ ⵜⴻⵎⵙⴰⵍⵜ ».

ⵙⴻⴳ ⵢⵉⴷⵉⵙ ⵏⵉⴹⴻⵏ, « ⵜⵉⴽⴻⵕⵕⵓⵙⵉⵏ ⵏ ⵜⴻⴷⴱⴻⵍⵜ ⴰⵢ ⵢⴻⵜⵜⵡⴰⵡⴻⵀⵀⴰⵏ ⵉ ⵢⵉⵎⴻⵥⵍⴰ ⵏ ⵓⵡⴰⵏⴰⴽ, ⵜⵉⵎⴰⵣⴷⴰⵢⵉⵏ ⵜⵉⴷⵉⴳⴰⵏⵉⵏ, ⵉⵖⵙⵓⵔⴻⵏ ⵉⴷⴻⴱⵍⴰⵏⴻⵏ ⴷ ⵜⵙⵓⴷⴰ ⴷ ⵡⵓⴷⵓⵙⴻⵏ ⵉⵏⴰⴳⴷⵓⴷⴻⵏ ⴰⵢ ⴷ-ⵢⴻⵜⵜⴰⵡⵉⵏ ⴰⴽⴽ ⵉⴷⵔⵉⵎⴻⵏ-ⵏⵙⴻⵏ ⵙⴻⴳ ⵓⵡⴰⵏⴰⴽ ⴷⴷⴰⵡ ⵍⵇⴰⵏⵓⵏ ⴰⵖⵍⵉⴼⴰⵏ ⵏ ⵢⵓⵍⵢⵓ 2010, ⵓⵔ ⵜⴻⵏ-ⵢⴻⵔⵣⵉ ⴰⵔⴰ ⵍⵇⴰⵏⵓⵏ-ⴰ ⵏ ⵎⴻⵖⵔⴻⵙ 2015 ».

ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⴰⵙⵙⴻⵣⴷⴻⵖ ⴰⴱⴰⵏⴽⴰⵏ, « ⴰⴽⴽⴻⵏ ⴰⴷ ⵜⵜ-ⵜⴻⴳ ⵜⴽⴻⴱⴱⴰⵏⵉⵜ, ⵢⴻⵙⵙⴻⴼⴽ ⴰⴷ ⴷ-ⵜⴻⴼⴽ ⴰⴽⴰⵔⴰⵎ ⴷⴻⴳ, ⵎⴻⵏⵖⵉⵔ ⵍⴻⴽⵡⴰⵖⴻⴹ ⴰⵢ ⵢⴻⵛⵔⴻⴹ ⵍⵇⴰⵏⵓⵏ ⵢⴻⵍⵍⴰⵏ ⴷⴻⴳ ⵍⴼⴻⵄⵍ, ⴰⴷ ⵉⵍⵉⵏ ⴷⴰⵖ ⵍⴻⴽⵡⴰⵖⴻⴹ ⴰⵢ ⴷ-ⵢⴻⵙⴱⴰⵏⴰⵢⴻⵏ ⴷ ⴰⴽⴽⴻⵏ ⵜⴰⴽⴻⵕⵕⵓⵙⵜ ⵍⵍⴰⵏ ⴷⴻⴳ-ⵙ ⵛⵛⵓⵔⵓⴹ ⴰⵢ ⵉⴹⴻⵎⵎⵏⴻⵏ ⵜⴻⵍⵊⵀⴰ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⴹⵔⵉⵙ-ⴰ ⵏ ⵍⵇⴰⵏⵓⵏ.

ⵓⵎⵓⵖ ⵏ ⵍⴻⴽⵡⴰⵖⴻⴹ ⴰⵢ ⴷ-ⵢⴻⵙⴱⴰⵏⴰⵢⴻⵏ ⴰⵇⴰⴷⴻⵔ ⵏ ⵜⴽⴻⵕⵕⵓⵙⵜ ⵉ ⵛⵛⵓⵔⵓⴹ ⴰⴷ ⴷ-ⵢⴻⴼⴼⴻⵖ ⴷⴻⴳ ⵢⵉⵡⴻⵜ ⵏ ⵍⴻⵡⵚⴰⵢⴰ ⵏ ⵓⵖⵍⵉⴼ ⵏ ⵍⵎⵉⵏⴰⵜ.