Asebter amenzawi

Iṣeḥrawiyen nḍerren seg urkaḍ n yizerfan n umdan

BUMERDAS – Aɣref aṣeḥrawi « d taɣtest n waṭas n yirkaḍen n yizerfan n umdan ay yetteg unagraw ahersan ameṛṛuki » deg yikalen yettwaḍḍfen, ɣef wakken ay d-yenna ass n ttlata deg Bumerdas uselway n Tseqqamut taɣelanwt taṣeḥrawit n yizerfan n umdan (CNSDH) Said Filali.

Mass Filali, ay d-igan asarag deg ukatar n tesdawit n unebdu n yikataren n Terni n Polisario d Tegduda taɛṛabt taṣeḥrawit tamegdayt ay la d-yettilin deg twilayt n Bumerdas seg 25 Yulyu ɣer 12 Ɣuct, yenna-d deg « assuter n uɣref aṣeḥrawi i ussuddes n tsefrant n ugguccelman la yettaẓ ɣer sdat seg useggas ar aseggas, ula ma asehras ameṛṛuki yessɣer iɣef-nnes yerna yugi aya ».

Dɣa yenna-d, deg temsalt-a, deg Taseqqamut taɣelnawt taṣeḥrawit n yizerfan n umdan tḥeṛṛ-d tiɣawisiwin d timeqranin deg uswir agraɣlan, seg wasmi ay d-tennulfa deg 2014.

Mass Filali iger-d tiɣri i yidisan ay la ixeddmen deg tmetti taɣarimt taṣeḥrawit akken ad d-kecfen akk irkaḍen n yizerfan n umdan d tlelliyin tinagdudin ay yetteg unagraw ameṛṛuki mgal uɣref aṣeḥrawi, yerna ad ten-aznen i tuddsiwin tigraɣlanin ay izemren ad urarent dduṛ iǧehden deg uɛawen n yimenɣi aṣeḥrawi.

Seg yidis-nnes, amanay n yimenɣi aṣeṛhawi, Sadek Bouguetaya, yenna-d deg Meṛṛuk « attan tedder deg tegnit deg tettwaɛzel seg umaḍal seg yidis aserti » imi « ur tettqadar ara lqanun agraɣlan deg temsalt n Uneẓruf Utrim yerna la d-tetteg iɛeqqiwen i lemcawṛat, am wakken ay tugi ad tessefɛel iɣtasen n Yiɣlanen Yeddukklen ay yerzan aya ».