Asebter amenzawi

Lezzayer-OMC : amhaz n umciwer ur ‘’ifaz ara’’

Lezzayer – Akala n umciwer gar Lezzayer d Tuddsa tamaḍlant n Tnezzut (OMC) ur yemhiz ara s tɣara ifazen, i t-yewzen, ass n larebɛa deg tmaneɣt, uneɣlaf n Tnezzut, Bakhti Belaïb, yessaram ad tili ‘’tmuɣli yettwafrazen’’ ɣef yizerfan i yessefk ad ten-tessutert tmurt-nneɣ.

‘’Ɛerḍeɣ, ddeqs n yimalas aya, ad zerweɣ akaram-a n (unekcum neɣ altaɣ n Lezzayer ɣer OMC d uqaren gar uddad ideg teǧǧiɣ ugar n 16 iseggasen aya d win n wass-a : ur yemhiz ara s waṭas’’, i d-yenna deg yiwet n tnemselt ɣef Yimtawayen n OMC yerzan ikaten idawsanen d wid n ugama d wuguren itwilanen n tnezzut.

Mass Belaïb, i sersen ɣef uqerru n uɣlif n Tnezzut deg wayyur n yulyu yezrin, yeṭṭef yakan amḍiq-a aɣlifan gar useggas 1996 d 1999, aya yessaweḍ-it ad yili, deg useggas 1998, ɣef uqerru n tmagla tazzayrit deg temlilit tamezwarut n udefrir n umahil n unekcum n Lezzayer ɣer OMC, i d-nesmekta.

‘’Deg tallit-nni, mi lliɣ sɛiɣ tuɣdaḍt n usegzi n yimtawayen n OMC d lfayda n Lezzayer ma yella tekcem, tameslayt-iw ur tettwafham ara acku ur netḥekkem ara deg ukaram-a’’, i yerna yenna-d, yenna-d daɣen yessefk ad nessegget tigawin n yisalan d usegzi deg ubrid-a.