Asebter amenzawi
SAFAB-MB n Tiheṛt: tagrawt tamezwarut n tkeṛṛusin tikanrarin (4x4) teffeɣ-d i ssrabes n laman
TIHEṚT – Teffeɣ-d, ass n laṛebɛa deg Tiheṛt, tegrawt tamezwarut n tkeṛṛusin tikanrarin (4x4, kuẓ deg kuẓ) seg lluzin n Tkebbanit tadzayrit n usseɣref n tkeṛṛusin « Mercedes Benz » (SAFAV-MB) n Ɛin Bucqif, yerna d Tamehla tamatut n tɣellist taɣelnawt ara tt-yaɣen.
Tagrawt-a n tkeṛṛusin n « tserkemt G » llant deg-s 110 n tkeṛṛusin, yerna tettunefk deg yiwet n tfugla deg yeḥdeṛ unemhal n temguriyin tiserdasiyin deg uɣlif n temḥaddit, ajiniṛal-amajuṛ Chouaki Rachid, anemhal n tedbelt tamatut n Tmehla tamatut n tɣellist taɣelnawt, asefqad n temsulta Noui Sifi d uselway n useqqamu n tedbelt n tkebbanit n SAFAB-MB, aknaner Smail Krikrou.
Deg yiwet n tseɣrut i tɣemsa, anemhal n temguriyin tiserdasiyin deg uɣlif n temḥaddit taɣelnawt iwekked-d d akken lluzin n tkeṛṛusin n Mercedes-Benz tudef deg wahil n semmus n yiseggasen 2015-2014 n uselway n tegduda, yerna iswi-nnes netta d asduqqes n temguri taɣelnawt.
Ajiniṛal-amajuṛ Chouaki Rachid yerna-d d akken lebni n lluzin-a yella-d d assefɛel n lewṣayat n unmazul n uneɣlaf n temḥaddit taɣelnawt, iɣef n yiɣallen imsellḥen n yigen aɣelnaw aɣerfan, ajiniṛal n tfekka n yigen, Ahmed Gaid Salah, yerna yella-d waya akken ad zemrent tsuda n uwanak am Yigen aɣelnaw aɣerfan, Tamehla tamatut n tɣellist taɣelnawt, tadwant d uḥuddu aɣarim ad d-aɣent tikeṛṛusin deg ssuq aɣelnaw.
« Nessaweḍ ɣer yiswi-nneɣ s lebni n lluzin-a, d iswi deg d Idzayriyen yeɣran deg Lalman d Tutrict ara d-ixeddmen tikeṛṛusin, am wakken ay tesɛa tkebbanit-a asudu n ussileɣ deg tetwilin n tkeṛṛusin », ɣef wakken ay d-yenna, am wakken ay d-yerna d akken assileɣ n yilemẓiyen n twilayt n Tiheṛt d « lfayda tameqrant. »
« Seg-a ɣer sdat, ilemẓiyen-a ad ssnen ama d afares n tkeṛṛusin, ama d azrar n uṛekkeb-nsen », ɣef wakken ay d-yenna s tumert (lfeṛḥ).
Seg yidis-nnes, anemhal n tedbelt tamatut n Tmehla tamatut n tɣellist taɣelnawt, asefqad n temsulta Noui Sifi, yenna-d d akken ccɣel-a d aḥric seg lewṣayat n unzaḍ n Tmehla n tɣellist taɣelnawt i lmend n usnerni n umɛawen gar tsuda d uttekki deg tneflit n temguri taɣelnawt.
Ma d aselway n useqqamu n tedbelt n Tkebbanit tadzayrit n uɣraf n tkeṛṛusin n « Mercedes-Benz », aknaner Smail Krikrou, iger-d tiɣri i tkebbaniyin tinagdudin d tusligin akken ad d-ttaɣent tikeṛṛusin ay yettwaxedment deg lluzin n SAFAV-MB s uqader n yilugan igraɣlanen.
