Asebter amenzawi

Ugar n lmeǧhud i ussiweḍ n waman n tissit i yimezdaɣen

LEBLIDA – Aneɣlaf n teɣbula n waman d twennaḍt, Abdelouaham Nouri, iḥettet-d ass n laṛebɛa deg Leblida d akken yessefk ad d-yili wugar n lmeǧhud i ussiweḍ n waman n tissit i yimezdaɣen n temnaḍt-a anda ay ttxaṣṣan waman ladɣa deg unebdu.

Mass Nouri ay igan tirzi n ussefqed d umahil (axeddim) ɣef Leblida, yenna-d d akken awanak (ddula) iḥaz-d tajellabt n 121 n yimelyaṛen n yidinaṛen i usseǧhed n ussiweḍ n waman n tissit deg twilayt-a, maca ur izad wara wayen ay d-yellan deg unrar, imi ay la irennu ussuter n waman ama ɣer yimezdaɣen, ama deg uḥric n tfellaḥt neɣ deg win n tdamsa deg twilayt-a.

Aneɣlaf n teɣbula n waman yenna-d d akken aɣlif-nnes yewjed ad yernu ad d-yeg isenfaren imaynuten i lfayda n twilayt-a s tɣuzi d ujbad n waman seg ddaw tmurt akken « ad yefru lexṣaṣ-a ». Isenfaren-a ad rnun ɣer wid ay d-yellan ya neɣ la d-ttilin, am usenfar n ussiweḍ n 80 000 n yimitren igasasen (m3) n waman seg unagraw n « Ssaḥel 3 n Lezzayer Tamaneɣt ». Ass-a, anagraw-a la d-yessawaḍ yagi 20 000 n yimitren igasasen (m3) n waman i temnaḍt n Leblida Tameqrant i lfayda n 375 000 n yimezdaɣen (d tamnaḍt deg ttekkant tɣiwanin n Wlad Iɛic, Bni Mrad, Leblida d Buɛeṛfa).

Imahilen (ixeddimen) la ttkemmilen s ussersi n yiqudas d lebni n lxeznat n waman i ussiweḍ n wugar n waman ɣer twilayt-a, ɣef wakken ay d-yenna.

Seg yidis niḍen, aneɣlaf iḥettet-d ɣef yimḍebbren idiganen ay d-yelhan s waman akken ad gen ugar n lmeǧhud akken ad ssiwḍen aman ara d-ikafin assuter, yerna ad sḥulfun daɣ imezdaɣen ɣef ucuḥḥu, imi aman sɛan daɣ azal deg ussway n tfellaḥt deg twilayt n Leblida ay yesɛan tajumma n 300 000 n yiqeṭṭaren.