ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴰⵙⴻⵇⵇⴰⵎⵓ ⵏ ⵍⴰⵎⴰⵏ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵉⵡⴻⵜ-ⴷ ⴷⴻⴳ ⵜⵓⵎⵎⵖⵉⵡⵉⵏ ⴰⵢ ⴷ-ⵢⴻⵍⵍⴰⵏ ⴷⴻⴳ ⴱⵓⵔⵓⵏⴷⵉ

ⵏⵢⵓ ⵢⵓⵔⴽ (ⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ) – ⴰⵙⴻⵇⵇⴰⵎⵓ ⵏ ⵜⵖⴻⵍⵍⵉⵙⵜ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵢⴻⵙⵙⴰⵥⴻⵔ ⵜⵓⵎⵎⵖⵉⵡⵉⵏ ⵜⵉⵏⴻⴳⴳⵓⵔⴰ ⴰⵢ ⴷ-ⵢⴻⵍⵍⴰⵏ ⴷⴻⴳ ⴱⵓⵔⵓⵏⴷⵉ, ⴷ ⵜⴰⵎⵓⵔⵜ ⴰⵢⴷⴻⴳ ⴰⵢ ⵢⴻⵏⴽⴻⵔ ⵛⵛⵡⴰⵍ ⵙⴻⴳ ⵡⴰⵙⵎⵉ ⴰⵢ ⴷ-ⵢⴻⵙⵙⴻⵔⵙ ⵓⵙⴻⵍⵡⴰⵢ ⵒⵉⴻⵔⵔⴻ ⵏⴽⵓⵔⵓⵏⵣⵉⵣⴰ ⵉⵎⴰⵏ-ⵏⵏⴻⵙ ⵖⴻⵔ ⵜⴻⴼⵔⴰⵏⵉⵏ ⵉ ⵜⵉⴽⴽⴻⵍⵜ ⵜⵉⵙ ⴽⵔⴰⴹⵜ.

« ⵓⵍⴰⵛ ⴰⵎⴽⴰⵏ ⵉ ⵜⴻⴽⵔⵉⴹⵜ ⵢⴻⵔⵏⴰ ⵉⵎⴰⵙⵍⴰⴹⴻⵏ ⵏ ⵓⵙⴻⵇⵇⴰⵎⵓ ⴳⵔⴻⵏ-ⴷ ⵜⵉⵖⵔⵉ ⵉ ⵡⴰⴽⴽ ⵉⴷⵉⵙⴰⵏ ⴰⵢ ⵜⴻⵔⵣⴰ ⵜⴻⵎⵙⴰⵍⵜ ⴰⴽⴽⴻⵏ ⴰⴷ ⵀⴻⴷⴷⵏⴻⵏ ⵉⵎⴰⵏ-ⵏⵙⴻⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵙⴻⵇⵇⴰⵎⵓ ⵏ ⵜⵖⴻⵍⵍⵉⵙⵜ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⴷⴻⴳ ⵢⵉⵡⴻⵏ ⵏ ⵓⵍⵖⵓ ⴰⵢ ⴷ-ⵉⴳⴰ ⵉ ⵜⵖⴻⵎⵙⴰ.

« ⵉⵎⴰⵙⵍⴰⴹⴻⵏ ⵏ ⵓⵙⴻⵇⵇⵎⴰⵓ ⵏ ⵜⵖⴻⵍⵍⵉⵙⵜ ⵜⴻⵛⵖⴻⴱ-ⵉⵜⴻⵏ ⵜⴻⵎⵙⴰⵍⵜ ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵜⴰⴳⵏⵉⵜ ⵏ ⵜⵖⴻⵍⵍⵉⵙⵜ ⴰⵢ ⵍⴰ ⵉⵅⴻⵚⵚⵔⴻⵏ ⵙ ⵜⵖⴰⵡⵍⴰ ⴷⴻⴳ ⴱⵓⵔⵓⵏⴷⵉ, ⴷ ⵜⴰⴳⵏⵉⵜ ⴰⵢ ⴷ-ⵢⴻⵍⵍⴰⵏ ⴷⴻⴼⴼⵉⵔ ⵜⴰⵍⵍⵉⵜ ⵏ ⵜⴻⴼⵔⴰⵏⵉⵏ ⴰⵢⴷⴻⴳ ⴰⵢ ⴷ-ⵢⴻⵍⵍⴰ ⵛⵛⵡⴰⵍ ⴷ ⵓⵔⴽⴰⴹ ⵏ ⵢⵉⵣⴻⵔⴼⴰⵏ ⵏ ⵓⵎⴷⴰⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵍⵖⵓ-ⴰ.

ⴰⵙⴻⵇⵇⴰⵎⵓ ⵏ ⵜⵖⴻⵍⵍⵉⵙⵜ ⵉⴳⴻⵔ-ⴷ ⵜⵉⵖⵔⵉ ⵉ ⵓⵏⴰⴱⴰⴹ ⵏ ⴱⵓⵔⵓⵏⴷⵉ ⴷ ⵡⴰⴽⴽ ⵉⴷⵉⵙⴰⵏ ⵉⵙⴻⵔⵜⵉⵢⴻⵏ ⴰⵢ ⵜⴻⵔⵣⴰ ⵜⴻⵎⵙⴰⵍⵜ ⴰⴽⴽⴻⵏ ⴰⴷ ⴷ-ⵓⵖⴰⵍⴻⵏ ⵙ ⵜⵖⴰⵡⵍⴰ ⵖⴻⵔ ⵓⵎⵛⵉⵡⴻⵕ.

ⴰⵙⵙ ⵏ ⵍⵃⴻⴷⴷ, ⴰⵊⵉⵏⵉⵕⴰⵍ ⴰⴷⵧⵍⵒⵀⴻ ⵏⵙⵀⵉⵎⵉⵔⵉⵎⴰⵏⴰ, ⵉⵎⴹⴻⴱⴱⴻⵔ ⵏ ⵜⵖⴻⵍⵍⵉⵙⵜ ⴷⴻⴳ ⴱⵓⵔⵓⵏⴷⵉ ⵢⴻⵔⵏⴰ ⴷ ⵢⵉⵡⴻⵏ ⵙⴻⴳ ⵓⵇⵔⵉⴱⴻⵏ ⵉⵎⴻⵇⵔⴰⵏⴻⵏ ⵏ ⵓⵙⴻⵍⵡⴰⵢ ⵒⵉⴻⵔⵔⴻ ⵏⴽⵓⵔⵓⵏⵣⵉⵣⴰ, ⵢⴻⵜⵜⵡⴻⵏⵖ ⴷⴻⴳ ⴱⵓⵊⵓⵎⴱⵓⵔⴰ ⵎⵉ ⵇⴻⵔⵔⵙⴻⵏ ⴼⴻⵍⵍ-ⴰⵙ ⵙ ⵜⵎⴻⵥⴷⵉⵜ.

ⴰⵙⵙ ⵏ ⵍⴻⵜⵏⵉⵢⴻⵏ, ⴷ ⵢⵉⵡⴻⵏ ⵏ ⵓⵎⵃⴰⴷⴷⵉ ⵢⴻⵜⵜⵡⴰⵙⵙⵏⴻⵏ ⵏ ⵢⵉⵣⴻⵔⴼⴰⵏ ⵏⵏ ⵓⵎⴷⴰⵏ, ⴰⵎⴻⵖⵏⴰⵙ ⵒⵉⴻⵔⵔⴻ-ⵛⵍⴰⵠⴻⵔ ⵎⴱⵧⵏⵉⵎⵒⴰ, ⴰⵢ ⵉⵊⴻⵔⵃⴻⵏ ⵎⵉ ⵄⴻⵔⴹⴻⵏ ⴰⴷ ⵜ-ⵏⵖⴻⵏ.

ⴱⵓⵔⵓⵏⴷⵉ ⵜⵓⴷⴻⴼ ⴷⴻⴳ ⵛⵛⵡⴰⵍ ⴰⵙⴻⵔⵜⵉ ⴷ ⴰⵎⴻⵇⵔⴰⵏ ⵙⴻⴳ ⵜⴳⴰⵔⴰ ⵏ ⵢⴻⴱⵔⵉⵔ, ⵎⵉ ⴷ-ⴱⴷⴰⵏⵜ ⵜⵎⴻⵙⴱⴰⵏⵉⵢⵉⵏ ⵖⴻⴼ ⵍⴵⴰⵍ ⵏ ⵓⵙⴻⵍⵡⴰⵢ ⵒⵉⴻⵔⵔⴻ ⵏⴽⵓⵔⵓⵏⵣⵉⵣⴰ ⴰⵢ ⴷ-ⵢⴻⵙⵙⴻⵔⵙⴻⵏ ⵉⵎⴰⵏ-ⵏⵏⴻⵙ ⵖⴻⵔ ⵜⴻⴼⵔⴰⵏⵉⵏ ⵉ ⵜⵉⴽⴽⴻⵍⵜ ⵜⵉⵙ ⴽⵔⴰⴹⵜ.

ⵓⵍⴰ ⵎⴰ ⵢⴻⵍⵍⴰ-ⴷ ⵛⵛⵡⴰⵍ ⴰⵢⴷⴻⴳ ⵎⵎⵓⵜⴻⵏ ⴰⵣⴰⵍ ⵏ 100 ⵏ ⵎⴻⴷⴷⴻⵏ ⵢⴻⵔⵏⴰ ⵄⴻⵔⴹⴻⵏ ⴰⴷ ⴳⴻⵏ ⵜⵓⵜⵜⵢⴰ ⴷⴻⴳ ⵜⵍⴻⵎⵎⴰⵙⵜ ⵏ ⵎⴰⵢⵓ, ⵎⴰⵙⵙ ⵏⴽⵓⵔⵓⵏⵣⵉⵣⴰ (ⴰⵢ ⵉⵃⴻⴽⵎⴻⵏ ⵜⴰⵎⵓⵔⵜ ⵙⴻⴳ 2005) ⵉⵄⴰⵡⴻⴷ ⵢⴻⵜⵜⵡⴰⴼⵔⴻⵏ ⴷⴻⴳ ⵜⴳⴰⵔⴰ ⵏ ⵢⵓⵍⵢⵓ, ⴷⴻⴳ ⵢⵉⵡⴻⵜ ⵏ ⵜⴻⴼⵔⴰⵏⵜ ⴰⵢⵢⴻⵙ ⵓⵔ ⵜⴻⵙⵜⴻⵄⵕⴻⴼ ⴰⵔⴰ ⵜⴻⵏⵎⴻⴳⵍⴰ, ⵜⵎⴻⵜⵜⵉ ⵜⴰⵖⴰⵔⵉⵎⵜ ⴷ ⵡⴰⵟⴰⵙ ⵏ ⵜⵎⵓⵔⴰ ⵜⵓⵜⵔⵉⵎⵉⵏ.