Asebter amenzawi
Aseqqamu n laman n Yiɣlanen Yeddukklen iwet-d deg tummɣiwin ay d-yellan deg Burundi
Nyu YuRK (Iɣlanen Yeddukklen) – Aseqqamu n tɣellist n Yiɣlanen Yeddukklen yessaẓer tummɣiwin tineggura ay d-yellan deg Burundi, d tamurt aydeg ay yenker ccwal seg wasmi ay d-yessers uselway Pierre Nkurunziza iman-nnes ɣer tefranin i tikkelt tis kraḍt.
« Ulac amkan i tekriḍt yerna imaslaḍen n useqqamu gren-d tiɣri i wakk idisan ay terza temsalt akken ad heddnen iman-nsen », ɣef wakken ay d-yenna Useqqamu n tɣellist n Yiɣlanen Yeddukklen deg yiwen n ulɣu ay d-iga i tɣemsa.
« Imaslaḍen n Useqqmau n tɣellist tecɣeb-iten temsalt deg wayen yerzan tagnit n tɣellist ay la ixeṣṣren s tɣawla deg Burundi, d tagnit ay d-yellan deffir tallit n tefranin aydeg ay d-yella ccwal d urkaḍ n yizerfan n umdan », ɣef wakken ay d-yenna ulɣu-a.
Aseqqamu n tɣellist iger-d tiɣri i unabaḍ n Burundi d wakk idisan isertiyen ay terza temsalt akken ad d-uɣalen s tɣawla ɣer umciweṛ.
Ass n lḥedd, ajiniṛal Adolphe Nshimirimana, imḍebber n tɣellist deg Burundi yerna d yiwen seg uqriben imeqranen n uselway Pierre Nkurunziza, yettwenɣ deg Bujumbura mi qerrsen fell-as s tmeẓdit.
Ass n letniyen, d yiwen n umḥaddi yettwassnen n yizerfan nn umdan, ameɣnas Pierre-Claver Mbonimpa, ay ijerḥen mi ɛerḍen ad t-nɣen.
Burundi tudef deg ccwal aserti d ameqran seg tgara n Yebrir, mi d-bdant tmesbaniyin ɣef lǧal n uselway Pierre Nkurunziza ay d-yessersen iman-nnes ɣer tefranin i tikkelt tis kraḍt.
Ula ma yella-d ccwal aydeg mmuten azal n 100 n medden yerna ɛerḍen ad gen tuttya deg tlemmast n Mayu, Mass Nkurunziza (ay iḥekmen tamurt seg 2005) iɛawed yettwafren deg tgara n Yulyu, deg yiwet n tefrant ayyes ur testeɛṛef ara tenmegla, tmetti taɣarimt d waṭas n tmura tutrimin.
