ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⴱⴰⵏ ⴽⵉ-ⵎⵧⵧⵏ ⵉⴳⴻⵔ-ⴷ ⵜⵉⵖⵔⵉ ⵉ ⵜⵓⴽⵛⵉ ⵏ ⵢⵉⴷⵔⵉⵎⴻⵏ ⵉ ⵜⵏⴻⴳⴳⴰ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⴰⵢ ⵢⴻⵜⵜⵄⴰⵡⴰⵏⴻⵏ ⵉⴼⴰⵍⴻⵙⵟⵉⵏⵉⵢⴻⵏ
ⵏⵢⵓ ⵢⵓⵔⴽ – ⴰⵎⴰⵔⵓ ⴰⵎⴰⵜⵓ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ, ⴱⴰⵏ ⴽⵉ-ⵎⵧⵧⵏ ⵉⴳⴻⵔ-ⴷ ⵜⵉⵖⵔⵉ ⴷ ⵜⵓⵄⵊⵉⵍⵜ ⵉ ⵢⵉⴷⵉⵙⴰⵏ ⴰⵢ ⵜⴻⵔⵣⴰ ⵜⴻⵎⵙⴰⵍⵜ ⴰⴽⴽⴻⵏ ⴰⴷ ⴷ-ⵚⴻⴷⴷⵇⴻⵏ 100 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴷⵓⵍⴰⵕⴻⵏ ⵉ ⵜⵏⴻⴳⴳⴰ ⵏ ⵓⵏⵔⵡⴰ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⴰⵢ ⵢⴻⵜⵜⵄⴰⵡⴰⵏⴻⵏ ⵉⵣⵔⵓⵣⴰⵖ ⵉⴼⴰⵍⴻⵙⵟⵉⵏⵉⵢⴻⵏ.
ⴷⴻⴳ ⵢⵉⵡⴻⵏ ⵏ ⵓⵍⵖⵓ ⴰⵢ ⴷ-ⵢⴻⴼⴼⵖⴻⵏ ⴰⵙⵙ ⵏ ⵜⵜⵍⴰⵜⴰ, ⵎⴰⵙⵙ ⴱⴰⵏ ⵉⴳⴻⵔ-ⴷ ⵜⵉⵖⵔⵉ ⵉ « ⵡⴰⴽⴽ ⵉⵎⵚⴻⴷⴷⵇⴻⵏ ⴰⴽⴽⴻⵏ ⴰⴷ ⴷ-ⵙⵙⵉⵡⴹⴻⵏ 100 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴷⵓⵍⴰⵕⴻⵏ ⴰⵢ ⵜⴻⵃⵡⴰⵊ ⵜⵏⴻⴳⴳⴰ ⵏ ⵓⵏⵔⵡⴰ ⵙ ⵜⵖⴰⵡⵍⴰ ⵉ ⵓⵄⴰⵡⴻⵏ ⵏ ⵢⵉⴳⴻⵔⴷⴰⵏ ⵉⴼⴰⵍⴻⵙⵟⵉⵏⵉⵢⴻⵏ ⴰⴽⴽⴻⵏ ⴰⴷ ⴱⴷⵓⵏ ⴰⵙⴻⴳⴳⴰⵙ-ⵏⵙⴻⵏ ⴰⵖⵓⵔⴱⵉⵣ ⵏ 2015-2016 ⵡⴰⵔ ⵍⴻⵄⴹⵉⵍ ».
ⴰⵎⴰⵔⵓ ⴰⵎⴰⵜⵓ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵢⴻⵏⵏⴰ-ⴷ ⴷ ⴰⴽⴽⴻⵏ « ⵢⴻⵙⵙⴰⵡⴻⵍ ⵏⴻⵜⵜⴰ ⵙ ⵜⵉⵎⵎⴰⴷ-ⵏⵏⴻⵙ ⵖⴻⴼ ⵜⴻⵎⵙⴰⵍⵜ-ⴰ ⴷ ⵡⴰⵟⴰⵙ ⵏ ⵢⵉⵎⴹⴻⴱⴱⵔⴻⵏ ⵏ ⵜⵎⵓⵔⴰ ⵏ ⵓⵎⴰⴹⴰⵍ ⴷⴻⴳ ⵍⴻⴷⵡⴰⵕ-ⴰ ⵜⵉⵏⴻⴳⴳⵓⵔⴰ », ⵎⴰⵛⴰ ⵓⵔ ⴷ-ⵢⴻⴱⴷⵉⵔ ⴰⵔⴰ ⴰⵏⵡⵉ ⴰⵢ ⴷ ⵉⵎⴹⴻⴱⴱⵔⴻⵏ-ⴰ.
ⵎⴰⵙⵙ ⴱⴰⵏ ⵢⴻⵏⵏⴰ-ⴷ ⴷ ⴰⴽⴽⴻⵏ « ⵜⴻⵛⵖⴻⴱ-ⵉⵜ ⴰⵟⴰⵙ ⵜⴻⴳⵏⵉⵜ ⵏ ⵜⴻⴷⵔⵉⵎⵜ ⵏ ⵜⵏⴻⴳⴳⴰ-ⴰ, ⴷ ⵢⵉⵅⴻⵚⵚⴰⵔⵉⵏ ⴰⵢ ⵉⵣⴻⵎⵔⴻⵏ ⴰⴷ ⵃⴰⵣⴻⵏ ⵡⵉⴷ ⵢⴻⵏⴹⴻⵔⵔⴻⵏ ⴷⴻⴳ ⵜⵎⴻⴷⴷⵓⵔⵜ-ⵏⵙⴻⵏ ⴷ ⵡⴰⵢⴻⵏ ⴰⵢⵢⴻⵙ ⴰⵢ ⵢⴻⵣⵎⴻⵔ ⴰⴷ ⴷ-ⵢⴻⴳⵍⵓ ⵡⴰⵢⴰ ⵙⴻⴳ ⵢⵉⴷⵉⵙ ⴰⵙⴻⵔⵜⵉ ⴷ ⵡⵉⵏ ⵏ ⵜⵖⴻⵍⵍⵉⵙⵜ ».
ⵓⵏⵔⵡⴰ ⴷ ⵏⴻⵜⵜⴰⵜ ⴰⵢ ⴷ « ⵜⵉⴳⴻⵊⴷⵉⵜ ⵏ ⵓⵔⴽⴰⴷ » ⴷⴻⴳ ⵜⵎⴻⴷⴷⵓⵔⵜ ⵏ 5 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⵣⵔⵓⵣⴰⵖ ⵉⴼⴰⵍⴻⵙⵟⵉⵏⵉⵢⴻⵏ ⴰⵢ ⵢⴻⴷⴷⵔⴻⵏ ⴷⴻⴳ ⵓⴳⵎⵓⴹ ⵓⵇⵔⵉⴱ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵍⵖⵓ-ⴰ.
ⵜⴰⵏⴻⴳⴳⴰ ⵜⵄⴻⵢⵢⴻⵏ-ⴷ ⴰⵙⵙ ⵏ ⵍⴻⵜⵏⵉⵢⴻⵏ ⴷ ⴰⴽⴽⴻⵏ ⵢⴻⵣⵎⴻⵔ ⵍⵃⴰⵍ ⵓⵔ ⵜⵣⴻⵎⵎⴻⵔ ⴰⵔⴰ ⴰⴷ ⵜⵄⴰⵡⴻⵏ ⴰⵣⴰⵍ ⵏ ⵓⵣⴳⴻⵏ ⵏ ⵓⵎⴻⵍⵢⵓⵏ ⵏ ⵢⵉⴱⴰⵍⵎⵓⴷⴻⵏ ⵉⴼⴰⵍⴻⵙⵟⵉⵏⵉⵢⴻⵏ, ⵢⴻⵔⵏⴰ ⵓⴳⴰⵔ ⵏ ⵓⵣⴳⴻⵏ ⵙⴻⴳ-ⵙⴻⵏ ⴷⴷⵔⴻⵏ ⴷⴻⴳ ⵜⴻⵙⴼⵉⴼⵜ ⵏ Ɣⴻⵣⵣⴰ, ⵉⵎⵉ ⴰⵢ ⵅⵓⵚⵚⴻⵏ ⵢⵉⴷⵔⵉⵎⴻⵏ.
« ⵜⴰⵙⵡⵉⵄⵜ-ⴰ, ⵓⵔ ⴷ-ⵢⴻⵍⵍⵉ ⴰⵔⴰ ⴰⴽⴽ ⵕⵕⴰⵢ ⵉ ⵓⵡⴻⵅⵅⴻⵔ ⵏ ⵡⵓⵖⴰⵍ ⵖⴻⵔ ⵓⵖⴻⵔⴱⴰⵣ » ⴰⴽⴽⴻⵏ ⴰⴷ ⴷ-ⵢⵉⵍⵉ ⵛⵡⵉⵟ ⵏ ⵡⴰⴽⵓⴷ ⵉ ⵓⵊⵎⴰⵄ ⵏ ⵢⵉⴷⵔⵉⵎⴻⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ, ⵙⴻⴳ ⵢⵉⴷⵉⵙ-ⵏⵏⴻⵙ, ⵙⴰⵏⴷⵔⴰ ⵎⵉⵜⵛⵀⴻⵍⵍ, ⵜⵉⵎⴹⴻⴱⴱⴻⵔⵜ ⵜⵉⵙ ⵙⵏⴰⵜ ⵏ ⵜⵏⴻⴳⴳⴰ-ⴰ ⴷⴻⴳ Ɣⴻⵣⵣⴰ.
