Asebter amenzawi

Ur d-tettwabder ara « tacirt n uḍar » deg lekwaɣeḍ n SSPA-JSK

TIZI WEZZU – Lekwaɣeḍ n tkebbanit tanaddalt n Yilemẓiyen Inaddalen n Leqbayel (SSPA-JSK) ur yelli ara deg-sen uḥric n « tacirt n uḍar » ɣef wakken ay d-yenna ass n ttlata deg Tizi Wezzu Useqqamu n ussukkes n teɣlamt-a.

Mass Salah Meriem ay d-yessawlen deg yiwen n usarag n tɣemsa, yerna d amaslaḍ n useqqamu n ussukkes n Yilemẓiyen Inaddalen n Leqbayel (d tagrawt yellan mgal uselway n teɣlamt-a yerna tessutur ad yettixer) yenna-d d akken « ulac aḥric n tcirt n uḍar deg lekwaɣeḍ n tkebbanit n SSPA-JSK seg useggas n 2012 ».

Deg lekwaɣeḍ-a ay d-yettunefken i tɣemsa, amagrad wis 6 yenna-d d akken « menɣir aseqqamu n yimfeṛṛǧen, taɣlamt tesɛa yiwen neɣ aṭas n yiḥricen inaddalen yemmuzzgen (yettxeṣṣeṣen): tacirt n ufus, tacirt n uqecwal, tatlitit ».

Maca, « seg useggas n 2013, ticrawin n teɣlamt-a tanaddalt tamaswaḍt beddrent-d d akken ttwaṣerrfen yidrimen s yisem n uḥric n tcirt n uḍar yili aḥric-a ur d-yettwabder ara deg lekwaɣeḍ-a. Wa d aṣerref ay yessefken ad d-yettwassefhem », ɣef wakken ay d-yenna Mass Meriem yellan d abugaṭu aqbur n Yilemẓiyen Inaddalen n Leqbayel.

Taɣawsa niḍen ay d-yettwakecfen deg usarag-a n tɣemsa netta d ḍḍlaba ay tettwalas teɣlamt n Yilemẓiyen Inaddalen n Leqbayel yerna d tin yewwḍen ɣer 944 584 752 n yidinaṛen, d ḍḍlaba ay d-yettwabedren deg tecrawt n useggas adriman n 2013 n SSPA-JSK, yerna tettunefk-d ula d tacrawt-a i tɣemsa.

« Ḍḍlaba-a d tameqrant mliḥ yerna tugar ṛaselmal n SSPA ay yesɛan azal n 800 n yimelyunen n yidinaṛen, yerna aya yesskanay-d tukerḍa n yisseftiyen n tkebbanit-a », ɣef wakken ay d-yenna.

Mass Meriem ixebber-d d akken ccetkan s uselway n Yilemẓiyen Inaddalen n Leqbayel, Mohand-Cherif Hannachi, yerna yettwatthem s tuḍḍfa n umkan ay t-yexḍan d yir asseddu.

Tanegga n Yisalan n Lezzayer ur tessaweḍ ara ad d-teḍḍef Mohand Cherif Hannachi s usawal akken ad tẓer d acu ay yettxemmim ɣef wanect-a.