Asebter amenzawi
Lezzayer twet-d « s lǧehd » deg txazabit ay d-yellan deg tmesgida tasaɛudit
LEZZAYER TAMANEƔT – Lezzayer tessaẓer « s lǧehd » taxazabit tarabrabt ay d-yellan ass n lexmis deg tmesgida n yiserdasen n yiɣallen uzzigen deg tnebḍit n Assir deg Tgelda Tasaɛudit, d tin deg d-llant aṭas n teɣtas.
« Nessaẓer s lǧehd taxazabit-a tarebrabt ay d-yellan ass-a mgal tmesgida n yiɣallen uzzigen deg Abha, deg tnebḍit n Assir, deg Tgelda Tasaɛudit taweltmat, d taxazabit deg d-llant aṭas n teɣtas seg yiɣallen n tɣellist (laman) d yimdanen ay ixeddmen din », ɣef wakken ay d-yenna ass n lexmis uneṭṭaq n uɣlif n tɣawsiwin n uzɣar, Abdelaziz Benali Cherif deg yiwet n tseɣrut ay d-iga i Tnegga n Yisalan n Lezzayer.
« Nettɛezzi tiwaculin ay ixelɛen seg yigi-a n tejrimt am wakken ay d-nessenfalay tamsetlelt-nneɣ ɣer yidis n unabaḍ d uɣref asaɛudi ay ibedden mgal rrebrab ucmit ur yessinen la azalen n talsa, wala azalen n ddin, yerna mazal-it yetɛedday ɣef tmesgidiwin akken ad ineɣ, war akukru, imdanen ilemriyen », ɣef wakken ay d-yenna Mass Benali Cherif.
« Lezzayer tenḍerr seg rrebrab yerna teẓra d akken ur yesɛi ara tilisa, dɣa ɣef waya ay d-tger tiɣri i ussewjed n wakk ttawilat n lqanun yellan d umɛawen gar tmura taɛṛabin, tinselmin d tmura niḍen n umaḍal i uḥbas n tɣawsa-a yellan d tabeṛṛanit ɣef ddin d wazalen-nneɣ », ɣef wakken ay d-yenna uneṭṭaq n uɣlif n tɣawsiwin n uzɣar.
