ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵎⴰⵚⴻⵔ: ⵜⴻⵜⵜⵡⴰⵔⵥⴻⵎ ⵜⴻⵔⴳⴰ ⵜⴰⵎⴰⵢⵏⵓⵜ ⵏ ⵙⵙⵡⵉⵣ

ⵉⵙⵎⴰⵉⵍⵉⴰ (ⵎⴰⵚⴻⵔ) – ⴰⵙⴻⵍⵡⴰⵢ ⴰⵎⴰⵚⵔⵉ ⴰⴱⴷⴻⵍ ⴼⴰⵜⵜⴰⵀ ⴰⵍ-ⵙⵉⵙⵙⵉ ⵢⴻⵔⵥⴻⵎ, ⴰⵙⵙ ⵏ ⵍⴻⵅⵎⵉⵙ, ⵜⴰⵔⴳⴰ ⵜⴰⵎⴰⵢⵏⵓⵜ ⵏ ⵙⵙⵡⵉⵣ (ⵖⴻⵔ ⵢⵉⴷⵉⵙ ⵏ ⵜⴻⵔⴳⴰ ⵜⴰⵇⴱⵓⵔⵜ) ⴷⴻⴳ ⵜⴻⵎⴷⵉⵏⵜ ⵏ ⵉⵙⵎⴰⵉⵍⵉⴰ, ⵢⴻⵔⵏⴰ ⵜⴰ ⴷ ⵜⴰⵔⴳⴰ ⴰⵔⴰ ⵢⴻⵇⵇⵏⴻⵏ ⵉⵍⴻⵍ ⴰⴳⵔⴰⴽⴰⵍ ⵖⴻⵔ ⵢⵉⵍⴻⵍ ⴰⵣⴻⵡⵡⴰⵖ. ⵜⴰⴼⵓⴳⵍⴰ-ⴰ ⵏ ⵓⵔⵥⴰⵎ ⵜⴻⵍⵍⴰ-ⴷ ⵙ ⵓⵃⴷⴰⵕ ⵏ ⵡⴰⵟⴰⵙ ⵏ ⵢⵉⵖⴼⴰⵡⴻⵏ ⵏ ⵓⵡⴰⵏⴰⴽ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵜⵏⴻⴳⴳⴰ ⵏ ⵜⵖⴻⵎⵙⴰ ⵜⴰⵎⴰⵚⵔⵉⵜ ⵏ ⵎⵉⵏⴰ.

ⴰⵙⴻⵍⵡⴰⵢ ⵏ ⵜⴻⴳⴷⵓⴷⴰ, ⴰⴱⴷⴻⵍⴰⵣⵉⵣ ⴱⵧⵓⵜⴻⴼⵍⵉⴽⴰ, ⵉⵙⴻⵎⵎⴰ-ⴷ ⴰⵙⴻⵍⵡⴰⵢ ⵏ ⵓⵙⴻⵇⵇⴰⵎⵓ ⵏ ⵓⵖⵍⴰⵏ, ⴰⴱⴷⴻⵍⴽⴰⴷⴻⵔ ⴱⴻⵏⵙⴰⵍⴰⵀ, ⴰⴽⴽⴻⵏ ⴰⴷ ⵢⴻⵃⴷⴻⵕ ⵙ ⵢⵉⵙⴻⵎ-ⵏⵏⴻⵙ ⴷⴻⴳ ⵜⴼⵓⴳⵍⴰ ⵏ ⵓⵔⵥⴰⵎ ⵏ ⵜⴻⵔⴳⴰ-ⴰ ⵜⴰⵎⴰⵢⵏⵓⵜ.

ⵎⴰⵙⵙ ⴱⴻⵏⵙⴰⵍⴰⵀ ⵢⴻⵡⵡⵉ ⴷⴰⵖ ⵜⴰⴱⵕⴰⵜ ⵏ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ ⵉ ⵓⵙⴻⵍⵡⴰⵢ ⴰⵎⴰⵚⵔⵉ, ⵢⴻⵔⵏⴰ ⵢⴻⴷⴷⴰ ⵢⵉⴷ-ⵙ ⵎⴰⵙⵙ ⴰⴱⴷⴻⵍⴽⴰⴷⴻⵔ ⵎⴻⵙⵙⴰⵀⴻⵍ, ⴰⵏⴻⵖⵍⴰⴼ ⵏ ⵜⵖⴰⵡⵙⵉⵡⵉⵏ ⵏ ⵍⵎⴻⵖⵔⴻⴱ, ⵏ ⵜⴷⵓⴽⵍⵉ ⵜⵓⵕⵓⴼⵉⵜ ⴷ ⵜⴻⵎⵖⵓⵏⵜ ⵜⴰⵄⵕⴰⴱⵜ.

ⵍⴻⴱⵏⵉ ⵏ ⵜⴻⵔⴳⴰ-ⴰ ⵢⴻⵍⵍⴰ-ⴷ ⴷ ⴰⵏⴻⵄⵔⵓⴹ ⵉ ⵓⵙⴷⵓⵇⵇⴻⵙ ⵏ ⵜⴷⴰⵎⵙⴰ ⵜⴰⵎⴰⵚⵔⵉⵜ, ⵢⴻⵔⵏⴰ ⵜⴰⵔⴳⴰ-ⴰ ⴷ ⴰⴱⵔⵉⴷ ⴰⵎⴰⵢⵏⵓ ⵢⴻⵍⵍⴰⵏ ⵖⴻⵔ ⵢⵉⴷⵉⵙ ⵏ ⵜⴻⵔⴳⴰ-ⵏⵏⵉ ⵜⴰⵇⴱⵓⵔⵜ (ⵙ ⵜⴻⵖⵣⴻⴼ ⵏ 35 ⵏ ⵢⵉⴽⵉⵍⵓⵎⵉⵜⵔⴻⵏ), ⵢⴻⵔⵏⴰ ⵜⴻⵇⵇⴻⵏ ⵖⴻⵔ ⵜⴻⵔⴳⴰ-ⵏⵏⵉ ⵜⴰⵇⴱⵓⵔⵜ ⵖⴻⵣⵣⵉⴼⴻⵏ 193 ⵏ ⵢⵉⴽⵉⵍⵓⵎⵉⵜⵔⴻⵏ. ⵜⴰⵔⴳⴰ-ⵏⵏⵉ ⵜⴰⵇⴱⵓⵔⵜ ⵙⵙⴰⵀⴻⵔⵡⴻⵏ-ⴰⵙ ⵢⴻⵔⵏⴰ ⵙⵙⴰⵍⵇⵢⴻⵏ-ⴰⵙ 37 ⵏ ⵢⵉⴽⵉⵍⵓⵎⵉⵜⵔⴻⵏ.

ⵜⴰⵔⴳⴰ ⵏ ⵙⵙⵡⵉⵣ ⵔⴻⵥⵎⴻⵏ-ⵜⵜ ⴷⴻⴳ 1869 ⵢⴻⵔⵏⴰ ⵜⴻⵇⵇⴻⵏ ⵉⵍⴻⵍ ⴰⵣⴻⵡⵡⴰⵖ ⵖⴻⵔ ⵢⵉⵍⴻⵍ ⴰⴳⵔⴰⴽⴰⵍ. ⵜⴰⵔⴳⴰ-ⴰ ⴷ ⵢⵉⵡⴻⵏ ⵙⴻⴳ ⵢⵉⴱⵔⵉⴷⴻⵏ ⵉⵎⴻⵇⵔⴰⵏⴻⵏ ⴰⴽⴽ ⵏ ⵜⵏⴻⵣⵣⵓⵜ (ⵜⵜⵊⴰⵕⴰ) ⵜⴰⴳⵔⴰⵖⵍⴰⵏⵜ ⵢⴻⵔⵏⴰ ⴷ ⵢⵉⵡⴻⵜ ⵙⴻⴳ ⵜⴻⵖⴱⵓⵍⴰ ⵜⵉⵎⴻⵇⵔⴰⵏⵉⵏ ⵏ ⵢⵉⴷⵔⵉⵎⴻⵏ ⵉⴱⴻⵕⵕⴰⵏⵉⵢⴻⵏ ⴷⴻⴳ ⵎⴰⵚⴻⵔ ⴰⵢ ⵍⴰ ⵢⴻⵜⵜⵏⴰⴷⵉⵏ ⴰⴷ ⴷ-ⵜⴻⵙⴷⵓⵇⵇⴻⵙ ⵜⴰⴷⴰⵎⵙⴰ-ⵏⵏⴻⵙ ⵙⴻⴳ ⵡⴰⵙⵎⵉ ⴰⵢ ⴷ-ⵜⴻⵍⵍⴰ ⵜⵏⴻⴽⵔⴰ ⵏ 2011.

ⵜⴰⵔⴳⴰ-ⴰ ⵜⴰⵎⴰⵢⵏⵓⵜ ⵖⴻⵣⵣⵉⴼⴻⵜ ⵙ ⵓⵊⴻⵎⵎⴰⵍ 72 ⵏ ⵢⵉⴽⵉⵍⵓⵎⵉⵜⵔⴻⵏ, ⵢⴻⵔⵏⴰ ⴷ ⴰⵢⴰ ⴰⵔⴰ ⵢⴻⴵⴵⴻⵏ ⴰⵎⴹⴰⵏ ⵏ ⵢⵉⵖⴻⵔⵔⵓⴱⴰ ⴰⵢ ⵢⴻⵜⵜⴻⴽⴽⴻⵏ ⵖⴻⴼ ⵙⵙⵡⵉⵣ ⴰⴷ ⵢⴻⵔⵏⵓ ⵙ ⵙⵏⴰⵜ ⵏ ⵜⵉⴽⴽⴰⵍ ⵙⴻⴳ-ⴰ ⵖⴻⵔ 2023. ⵉⵎⵉⵔ-ⵏⵏⵉ, 97 ⵏ ⵢⵉⵖⴻⵔⵔⵓⴱⴰ ⴰⵔⴰ ⵢⴻⵇⵇⵍⴻⵏ ⴰⴷ ⵜⵜⴻⴽⴽⵉⵏ ⵖⴻⴼ ⵜⴻⵔⴳⴰ-ⴰ, ⵢⵉⵍⵉ ⴰⵙⵙ-ⴰ ⴰⵍⴰ 49 ⴰⵢ ⵢⴻⵜⵜⴻⴽⴽⴻⵏ ⴼⴻⵍⵍ-ⴰⵙ.

ⵜⴰⵔⴳⴰ-ⴰ ⵜⴰⵎⴰⵢⵏⵓⵜ ⴰⴷ ⵜⴻⴵⴵ ⵉⵖⴻⵔⵔⵓⴱⴰ ⴰⴷ ⵜⵜⴻⴷⴷⵓⵏ, ⴰⴷ ⵜⵜⴻⵇⵇⴰⵍⴻⵏ ⵖⴻⴼ ⵜⴻⵙⵡⵉⵄⵜ, ⵢⴻⵔⵏⴰ ⵉⵖⴻⵔⵔⵓⴱⴰ ⴰⵢ ⵢⴻⵍⵍⴰⵏ ⵣⵉⴽ ⵜⵜⵕⴰⵊⵓⵏ 18 ⵏ ⵜⵙⴰⵄⵜⵉⵏ ⴰⴽⴽⴻⵏ ⴰⴷ ⵄⴻⴷⴷⵉⵏ, ⴰⴷ ⴷ-ⵢⴻⵏⵇⴻⵙ ⵡⴰⴽⵓⴷ-ⵏⵙⴻⵏ ⵏ ⵜⵎⴻⵕⵊⵉⵡⵜ ⵖⴻⵔ 11 ⵏ ⵜⵙⴰⵄⵜⵉⵏ.

ⴰⵙⴻⴳⴳⴰⵙ-ⴰ, ⵍⴰ ⵙⵙⴻⴼⵔⴰⵢⴻⵏ ⴰⴷ ⴷ-ⴰⴷⴼⴻⵏ 5,3 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⴷⵓⵍⴰⵕⴻⵏ ⵙⴻⴳ ⵜⴻⵔⴳⴰ-ⴰ (4,7 ⵏ ⵢⵉⵎⴻⵍⵢⴰⵕⴻⵏ ⵏ ⵡⵓⵕⵓⵜⴻⵏ), ⵎⴰⵛⴰ ⴷⴻⴳ 2023, ⴰⴷ ⴰⵡⴹⴻⵏ ⵢⵉⴷⵔⵉⵎⴻⵏ ⴰⵢ ⴷ-ⵜⴻⵙⵙⴰⴷⴰⴼ ⵜⴻⵔⴳⴰ ⵖⴻⵔ 13,2 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⴷⵓⵍⴰⵕⴻⵏ (11,7 ⵏ ⵢⵉⵎⴻⵍⵢⴰⵕⴻⵏ ⵏ ⵡⵓⵕⵓⵜⴻⵏ).