Asebter amenzawi

Tikeṛṛusin: ugar n 5,4 n yimelyunen n tkeṛṛusin deg Ldzayer deg 2014

LezZAYER – Ajemmal n tkeṛṛusin yellan deg Ldzayer yewweḍ ɣer 5.425.558 n tkeṛṛusin deg tgara n 2014, dɣa yerna s 5,89% ɣef leḥsab n sendilindi, ɣef wakken ay d-tenna Tnarit taɣelnawt n taddadanin (ONS) i Tnegga n Yisalan n Ldzayer.

Timerniwt-a n ufrag aɣelnaw n tkeṛṛusin tella-d imi aṭas n tkeṛṛusin timaynutin ay yettwakelsen deg 2014, yerna d aklas n tkeṛṛusin timaynutin ay d-yesskanayen melmi ay bdant tiddit.

D acu kan, amḍan n tkeṛṛusin timaynutin ay yettwakelsen deg 2014 yenqes-d ɣer 301.722 deg 2014, yili deg 2013, ttwakelsent 314.872 n tkeṛṛusin. S waya, amḍan n tkeṛṛusin timaynutin ay yettwakelsen yenqes-d s 4,14 % deg 2014 ɣef wakken ay d-tebder Tnarit taɣelnawt n taddadanin.

Amur ameqran seg tkeṛṛusin timaynutin ay yebdan tiddit deg 2014 ttwaleksent deg uzgen wis sin n useggas-a yerna amḍan-nsent yewweḍ ɣer 197.301 n tkeṛṛusin (ugar n 65% seg tkeṛṛusin ay yettwakensen deg 2014).

Amur ameqran seg tkeṛṛusin ay d-yettwaǧwen seg uzɣar deg 2014 ur ttwakelsent ara deg useggas-nni aydeg d-ttwaǧwent.

Gar 439.637 n tkeṛṛusin ay d-yettwaǧwen aseggas yezrin, 301.722 ttwakelsent deg useggas-nni (68,6%), ma d 137.915 n tkeṛṛusin ttwajemɛent.

Deg 2014, yenqes waǧaw n tkeṛṛusin s 21% ɣef leḥsab n 2013 aydeg d-ttwaǧwent 554.269 n tkeṛṛusin.

Afrag aɣelnaw n tkeṛṛusin yerna s waṭas deg 2011 asmi ay ttwakenselt (neɣ ulsen aklas n) 1,04 d amelyun n tkeṛṛusin, gar-asent 234.889 n n tkeṛṛusin timaynutin (22,46% seg ujemmal n tkeṛṛusin-a).

Aǧaw-a n tkeṛṛusin yettekka deg ussidef n waṭas n tkeṛṛusin timaynutin ɣer Ldzayer, yerna yewweḍ ufmiḍi n uslemẓi n ufrag aɣelnaw n tkeṛṛusin ɣer 21,6 deg kraḍ-a n yiseggasen ineggura.

Afrag aɣelnaw n tkeṛṛusin llant deg-s ladɣa tikeṛṛusin n tmerrit (3.483.047 n tkeṛṛusin, 64,2% seg ujemmal), tikamyunin (1.083.990, 20% seg ujemmal), ikamyunen (396.277, 7,3%), itrakturen n tfellaḥt (146.041, 2,7%), izuɣiren (134.019, 2,47%), lkiṛan (82.376, 1,52%), imuṭuten (20.380, 0,38%) d tkeṛṛusin tuzzigin (4.756, 0,1%).

Ma d aserɣu ay sseqdacent tkeṛṛusin n ufrag aɣelnaw, Tanarit taɣelnawt n taddadanin tenna-d dakken amur ameqran seg tkeṛṛusin n tmurt sseqdacent tumast (65%), ma d amur ay d-yeqqimen (34%) yesseqdac agazwal.