Asebter amenzawi

Tuḍḍfa n yimeṛhan deg Mali: mmuten 12 gar-asen yiwen seg Tefriqt n Unẓul

BAMAKO – Mraw sin (12) n medden ay yemmuten, gar-asen yiwen n ubeṛṛani seg Tefriqt n Unẓul, am wakken ay d-ttwaslellin 4 n yimdanen niḍen ass n ssebt deg yiwet n tuḍḍfa n yimeṛhan ay d-yellan deg yiwen n usensu deg temdint n Sevare, deg tlemmast n Mali. Tuḍḍfa-a n yimeṛhan tfuk mi ẓedmen fell-as yiserdasen imaliyen, ɣef wakken ay d-nnant teɣbula tiɣellisanin d tdiplumatiyin.

« Mraw sin n yimdanen ay yemmuten s ujemmal » deg temhal tiserdasiyin, ay d-yenna yiwen n yimḍebber aserdasi amali ɣef wakken ay d-tenna tnegga n AFP: « Semmus n yiserdasen n Fama (iɣallen imsellḥen imaliyen), semmus n yirebraben d sin n yibeṛṛaniyen » ay werɛad ur ttwaɛeqlen ara s ttbut.

Gar « sin-a n yibeṛṛaniyen, yiwen seg-sen tɛeḍḍel tfekka-nnes sdat usensu, yerna yella mazal-it din ass n lǧemɛa taṣebḥit ».

Snat n teɣbula tiserdasiyin niḍen ay d-iwekkden tacrawt-a. Ɣef leḥsab n yiserdasen imaliyen, 5 n yibeṛṛaniyen ay yettwaḍḍfen d imeṛhan deg usensu n Byblos n Sevare, ay d-yusan 620 n yikilumitren deg ugafa-agmuḍan n Bamako, d asensu anda ay nnumen ttnusun yixeddamen ibeṛṛaniyen.

Ass n lǧemɛa, nnant-d teɣbula tiserdasiyin timaliyin niḍen dakken ma ulac, 5 n yibeṛṛaniyen, gar-asen 3 seg Tefriqt n Unẓul, yiwen n Ufṛensis d 1 n Wukṛani, ay yellan deg usensu-nni uqbel ma ẓedmen yiserdasen.

Ass n lǧemɛa tameddit, ameṛhun-nni ukṛani yessaweḍ ad d-yerwel seg usensu, ɣef wakken ay d-tenna yiwet n teɣbalut taserdasit tamalit yerna yenna-d dakken, uqbel ma ẓedmen yiserdasen, yeẓra din « 3 n yixeddamen seg Tefriqt n Unẓul d yiwen n uxeddam arusi ».

Seg yidis niḍen, yiwen n uneṭṭaq n tmahelt tarusit deg Mali ixebber-d tanegga tarusit n RIA Novosto dakken yella yiwen n Urusi deg usensu-nni, ssukksen-t-id yerna wwin-t ɣer tnariyin n Yiɣlanen Yeddukklen, ma d irebraben-nni ay igan tuḍḍfa-a n yimeṛhan « ttwenɣen ».

Irebraben-a ay werɛad ur ttwaɛeqlen ara, ẓedmen ɣef usensu n Byblos ass n lǧemɛa ɣef 7s00 n tṣebḥit (akud adigan d wakud n Greenwich).

D aya ay yeǧǧan iɣallen imaliyen ad medlen tamnaḍt-a yerna ɛerḍen ad d-ssuffɣen irebraben-nni. Ɣef leḥsab n waṭas n teɣbula tiserdasiyin timaliyin, iɣallen imaliyen ssawḍen ad frun tuḍḍfa-a n yimeṛhan deg yiḍ n lǧemɛa d ssebt.

Tamhelt ay d-yellan mgal yimaḍḍafen-a n yimeṛhan gan-tt yiɣallen uzzigen n temsetla tamalit, « s uɛawen n yicriken » n Mali, ɣef wakken ay d-tenna yiwet n teɣbalut deg uɣlif amali n temḥaddit. D aya ay yessawḍen ɣer « uslelli n kuẓ-nni n yimeṛhan », ɣef wakken ay d-tenna teɣbalut-a.

Ass n ssebt tameddit, Tafriqt n Unẓul twekked-d dakken llan, deg Sevare, 3 n yiɣermanen inẓulefriqiyin, yerna yemmut yiwen seg-sen, ma d sin-nni niḍen atni deg tɣellist (laman).

Aneɣlaf afṛensis n tɣawsiwin n uzɣar yenna-d, seg yidis-nnes, dakken « yessefqed » ma yella yiwen n uɣerman afṛensis deg usensu-nni neɣ gar wid yemmuten.

Yemmut, ma ulac, yiwen seg yixeddamen n Tuɣdaḍt n Yiɣlanen Yeddukklen (Minusma) deg tummɣa-a, ɣef wakken ay d-tenna Tuɣdaḍt-a.

Tamdint n Sevare tebɛed s 12 n yikilumitren ɣef Mopti yerna tusa-d deg umkan asuddsan ladɣa imi ay tesɛa anafag yesɛan azal deg temnaḍt-a, d win ay sseqdacen ama d iɣallen imaliyen, ama d iɣallen igraɣlanen.