Asebter amenzawi
Yemmut baba-s n ulufan-bnni afalesṭini ay sserɣen d amuddir (imḍebber)
NABLUS (Agemmaḍ Utrim) – Yemmut baba-s n ulufan-nni afalesṭini ay sserɣen yimharsen iṣrayiliyen d amuddir dduṛt yezrin, ɣef wakken ay d-yenna ass n ssebt yiwen n yimḍebber afalesṭini.
« Saad Dawabcheh yemmut yerna la d-ssewjaden i temḍelt-nnes deg Nablus », yellan d tamdint tameqrant ay d-yezgan sdat taddart n Duma anda ay sserɣen tawacult n Dawabcheh d tamuddirt, ɣef wakken ay d-yenna Ghassan Daghlas, d imḍebber deg Udabu afalesṭini deg ugafa n Ugemmaḍ Utrim.
Nnan-d daɣ dakken « iduba ifalesṭiniyen gan anermis d yiduba n tuḍḍfa tisṛayilit akken ad d-awen tafekka n urgaz-a i lmend n temḍelt-nnes ».
Deg tfejrit n wass n 31 Yulyu, usan-d yimharsen isṛayiliyen ɣer uxxam n twacult n Dawabcheh yerna zellin-d tiqerɛunin n tmes akken ad sserɣen axxam-nni ameẓyan.
Ali, yiwen n ulufan n 18 n wayyuren, yerɣa d amuddir, ma d yemma-s Riham (26 n yiseggasen deg tmeddurt-nnes), d baba-s Saad rɣan s tṣeddart tis 3 deg 90% seg tfekka-nsen yerna wwin-ten ɣer usbiṭar.
Yemma-s n ulufan-nni mazal-itt gar tmeddurt d tmettant, ma d memmi-s wis sin, Ahmed, yesɛan 4 n yiseggasen, yebda la yettejji ussan-a ineggura, yerna nnan-d ttawilat n yisalan idiganen dakken yebda la d-ireẓẓem tiṭṭawin-nnes yerna d-yettini kra n wawalen.
