Amseqdac:Imedyazen
Polisario tger-d tiɣri i Yiɣlanen Yeddukklen akken ad sfeɛlen ayen d-nnan
BUMERDAS – Imḍebber n Terni n Polisario, Salem Lebsir, iger-d tiɣri ass n ssebt i Tuddsa n Yiɣlanen Yeddukklen akken ad tessefɛel war leɛḍil taneɣtust tis 1514 yerzan tukci n uzarug i tmura d yiɣerfan yellan ddaw tehrest, yerna tamezwarut deg-sen d Aneẓruf Utrim yellan d tahrest taneggarut deg Tefriqt.
« Talwit deg temnaḍt-a ur d-ttuɣal ara arma tella-d tifrat tuɣdimt yerna d tamegdayt i taluft yellan gar Uneẓruf Utrim d Meṛṛuk », ɣef wakken ay d-yenna Mass Lebsir (amaslaḍ n tmarit taɣelnawt n Terni n Polisario) deg tgara n teẓrigt tis 6 n tesdawit n unebdu n yikataren n Terni n Polisario d Tegduda taɛṛabt tamegdayt taṣeḥrawit.
Amasay-a yerna-d dakken « aberriḥ n teẓrigt-a tis 6 n tesdawit n unebdu n yikataren n Terni n Polisario d win ay d-yesseknen amihi n tsertiyin n uwanak ahersan ameṛṛuki, d tiddit yebnan ɣef utɛeddi yerna ayen ay tt-yettɛawanen deg waya d afares d ussiǧew n tehyufin ».
« Tisertiyin-a ttekkayent deg ussebded, assidrem d ussebɣes n tmafyiwin n tejrimt yettwassuddsen d tegrawin tirebrabin », ɣef wakken ay d-yenna, am wakken ay d-yerna dakken « aya icewwel akk arkad n temnaḍt n Ssaḥel d ugafa-utrim n Tefriqt ».
Deffir ma yeckeṛ-d lmeǧhud n tnekra ay d-yellan i lmend n uzarug deg temnaḍin yettwaḍḍfen, deg unẓul n Meṛṛuk d tesdawiyin, Mass Lebsir yenna-d dakken « d lɛib imi amɣiwan agraɣlan yeggugem yerna ur la yetteg acemma akken ad yeḥbes arkaḍ n yizerfan n umdan, tukerḍa n lxir n wakal aṣeḥrawi d utɛeddi n uwanak ahersan ameṛṛuki ɣef yiɣarimen iṣeḥrawiyen ur yesɛin acemma ».
Deg tgara n temliliyin-a n tesdawit n unebdu, yenna-d Mass Lebsir dakken yessefk ad tfak tergult-a ay d-iḥettem uwanak ahersan ameṛṛuki i uxnaq n temnaḍt-a, am wakken ay d-iger tiɣri i « tukksa n uɣrab ay yebna usehras, aserreḥ i yimeḥbas n umazir n Gdeim Izik, ay yettwaḍḍfen deg lbaṭel yerna ɛeddan deg ccṛeɛ aserdasi n uwanak ahersan ameṛṛuki, d userreḥ i wakk iṣeḥrawiyen d yimeḥbas isertiyen yellan deg leḥbas imeṛṛukiyen ».
Deg yizen-nnes, Mass Lebsir yerra tajmilt i usfel ameqran d uzbu n yimeḥbas iṣeḥrawiyen « ay yettnaɣen i lmend n tlelli-nsen, nnif d uḥuddu n yizerfan uzrifen n uɣref aṣeḥrawi », am wakken ay d-iger tiɣri i umɣiwan agraɣlan d wakk tuddsiwin d tsuda tigraɣlanin akken ad xedment yerna ad ḥeṛsent ugar Meṛṛuk akken ad tfak assehres-nnes yerna ad d-tebru i wakk imeḥbas iṣeḥrawiyen.
Ifuṛes daɣ yimḍebber-a akken ad d-iger tiɣri i Yiṣeḥrawiyen akken ad sǧehden tadukli d temsetlelt-nsen i uqabel n tsertiyin d yinguzen n uwanak ahersan ameṛṛuki ur yebɣin ara ad yeǧǧ aɣref aṣeḥrawi ad yili yerna yebɣa ad yenkeṛ azref-nnes i ugguccelman d uzarug.
