Amseqdac:Imedyazen
Xemsa n yixeddamen n Yiɣlanen Yeddukklen ay yemmuten deg usensu n Mali
BAMAKO – Semmus (5) n yixeddamen ay ixeddmen ɣer tkebbaniyin ay wekklen Yiɣlanen Yeddukklen deg Mali (Minusma) ay yemmuten deg tummɣa-nni ay d-yellan ɣef usensu n Sevare, deg tlemmast n Mali, ɣef wakken ay d-tebder ass n ssebt Tuɣdaḍt n Yiɣlanen Yeddukklen deg Mali. Ixeddamen-a d yiwen n Umali, yiwen n Unipali, sin n Wukṛaniyen d yiwen seg Tefriqt n Unẓul yerna mmuten mi teẓdem yiwet n tegrawt timselleḥt ɣef usensu-nni.
« Tuɣdaḍt n Yiɣlanen Yeddukklen deg Mali tɛawed twekked-d assiẓer-nnes iǧehden mgal tummɣa tarebrabt tuḥqirt ay d-yellan deg Sevare yerna tesḥassef ɣef yimdanen-nni ay yemmuten deg yigi-a n tejrimt » ay iḥuzan asensu n Byblos, ɣef wakken ay d-tenna deg yiwen n ulɣu, am wakken ay d-tenna dakken mmuten-as « kra n yixeddamen ay ixeddmen deg tkebbaniyin ay twekkel ».
« Semmus (5) ay yemmuten yerna tebda-d tsestant akken ad d-iban swaswa wamek ay mmuten deg tedyant-a. Ixeddamen-a d yiwen n Umali », d anehhaṛ, « yiwen n Unipali, yiwen seg Tefriqt n Unẓul d sin n Wukṛaniyen. Ttwaddmen yiḥezziben i ussiweḍ n tfekkiwin-nsen ɣer Bamako », ɣef wakken ay d-tenna Tuɣdaḍt n Yiɣlanen Yeddukklen.
Irebraben-a werɛad ur ttwaɛeqlen ara seg yidis unṣib am wakken werɛad ur yettwassen ara umḍan-nsen. Mmɣen ɣef usensu n Byblos n Sevare ɣef 7s00 n tṣebḥit (akud adigan d Greenwich) anda ay nnummen ttnusun yixeddamen ibeṛṛaniyen.
Maca iɣallen imaliyen (gar-asen yiwet n tayunt n yiɣallen uzzigen n temsetla) wten-ten deg yiḍ n lǧemɛa d ssebt.
Tuɣdaḍt n Yiɣlanen Yeddukklen tebder-d daɣ dakken 4 n yibeṛṛaniyen ay iselken: sin seg Tefriqt n Unẓul, yiwen n Urusu d yiwen n Wukṛani.
Kuẓ-a (4) n yixeddamen ay iselken « ttwaddmen seg usensu n Byblos mi fuken lecɣal-nni » n yiɣallen n tɣellist (laman) yerna wwin-ten ɣer tnariyin n Tuɣdaḍt n Yiɣlanen Yeddukklen deg temdint n Sevare, « anda ay ten-mazal, seg leɛḍil ad ten-awin ɣer Bamako ».
« Atni bxir. Irebraben-nni ay yemmɣen ɣef usensu ur asen-faqen ara din ay llan yerna Tuɣdaḍt n Yiɣlanen Yeddukklen deg Mali teqqim deg unermis yid-sen seg mi ay d-tebda tummɣa-nni armi ay tefra », ɣef wakken ay d-tenna.
S tedyanin-a, iban-d dakken leḥsab n wid yemmuten yugar anect ay d-yenna unabaḍ d teɣbula tiserdasiyin, am wakken tiɣbula-a mgerradent daɣ deg ttfaṣil yerzan tiɣtas.
Ass n lǧemɛa tameddit, mi mazal tuḍḍfa-nni n yimeṛhan, anabaḍ yenna-d dakken mmuten 7 n yimdanen (5 n yiserdasen d sin seg wid yemmɣen). Ass n ssebt, deffir ma tfuk tummɣa-nni, tiɣbula tiserdasiyin timaliyin bedrent-d dakken mmuten 12 n yimdanen (5 n yiserdasen, 5 seg wid yemmɣen d sin n « yimellalen » ɣef leḥsab-nsen), war ma rnan-d ugar n ttfaṣil.
Ass n ssebt tameddit, deg Kiev (Ukṛanya), aneɣlaf n tɣawsiwin n uzɣar yenna-d dakken yemmut yiwen n Wukṛani deg tummɣa ay d-yellan deg Mali. Ma d Tafriqt n Unẓul twekked-d dakken llan deg temdint n Sevare 3 seg yiɣermanen-nnes, yerna yemmut yiwen seg-sen, ma d sin-nni niḍen atni deg tɣellist.
