Asebter amenzawi
Takebbanit n tmacinin n SNTF ur tettnuzu ara (aneɣlaf)
LEZZAYER – Takebbanit taɣelnawt n umesni s ubrid n wuzzal (SNTF) ad tuɣal d tagrawt seg-a ɣer 2020, yerna ur tettnuzu ara i tkebbaniyin tusligin, acku tesɛa amkan d « asuddsan », ɣef wakken ay d-yenna uɣlif n umesni deg yiwen n ulɣu.
« Takebbanit taɣelnawt n umesni s ubrid n wuzzal (SNTF) ad teqqel d tagrawt n tkebbaniyin tinagdudin yerna ṛaselmal-nnes ad yeqqim s lekmal-nnes d ayla n uwanak (ddula). S waya, werǧin ad tenz i tkebbaniyin tusligin, akken yebɣu ilint, ladɣa imi ay tesɛa amkan d asuddsan deg tmurt swaswa am ussegmi (tteṛbeyya), tadawsa d yiḥricen niḍen », ɣef wakken ay d-tenna teɣbalut-a.
Yenna-d uɣlif, deg temsalt-a, d akken anrar n umesni s ubrid n wuzzal d umesni n yimsiklen (imṣafren) yettɛawan-it uwanak s tedrimt.
S waya, tagrawt-a tamaynut yessefk ad tessedday ṛaselmal n tkebbaniyin-nnes ula d tid yellan d tucrikin yerna ad d-yili waya ddaw ṛṛay n uwanak.
ɣef leḥsab n ulɣu-a, asseddu n wakk lecɣal n Tkebbanit taɣelnawt n umesni s ubrid n wuzzal d tkebbaniyin ay yeqqnen ɣer-s yessefk ad ɛawden ad d-ssukken fell-as tamuɣli, tagrawt-a tamaynut ara d-yennulfun ssefrayen ad tt-id-gen deg tizi n 2020, yerna assebded n tegrawt-a yessefk ad t-ḍefren yimazzayen.
Tuddsa ay ssefrayen ad tt-gen i SNTF d tin ara yeǧǧen takebbanit-a « ad d-tessidef idrimen, ad tennerni yerna ad tdum, war ma tečča seg yidrimen n uwanak », ɣef wakken ay d-yessefhem ulɣu-a.
Aya ad yeǧǧ daɣ ad d-nnulfun 3000 n yimukan n umahil (axeddim), am wakken ara ttwaferqen 300 n yixeddamen ɣef leḥsab n yimukan deg watan ad xedmen d wayen deg d-ttwassilɣen, am wakken ara d-snulfun iɣerbazen yemmuzzgen deg uṣeggem n tmacinin d ṣṣenɛat yemgerraden n ubrid n wuzzal.
Tuddsa n ṣṣenf-a tella yagi deg tkebbaniyin niḍen n Lezzayer am tegrawt n Sonelgaz, Sonatrach, Air Algerie, SNVI, Saidal d tegrawin timguranin ay d-yennulfan seg melmi kan, ɣef wakken ay d-iḥettet uɣlif, am wakken ay d-yesmekti d akken aṭas n tegrawin tigraɣlanin ay igan tuddsa am ta yerna « rebḥent ».
Abeddel n SNTF iswi-nnes d asselhu n ussefrek n lecɣal-nnes deg ttekkant 10 n tkebbaniyin d 4 n yifurkawen ay yettekkan deg ṛaselmal-nnes yerna xeddment deg ṣṣenɛat yemgerraden (talujistit, igalisen, tibṛatin tuɛjilin, trisiti n ubrid n wuzzal, atg.), ɣef wakken ay d-tenna teɣbalut-a.
Aya yella-d deg ukatar n usnefli n tkebbanit-a ay yebɣan ad tessemɣer aẓeḍḍa-nnes n ubrid n wuzzal seg 4000 n yikilumitren ɣer 12.500 n yikilumitren deg yiseggasen ay d-yetteddun, yerna tebɣa ad tessemɣer lmizan n sselɛa ay tessawaḍ seg 4,5 n yimelyunen n yiṭunen deg useggas (akken yella ass-a) ɣer 30 n yimelyunen n yiṭunen deg useggas deg tizi n 2020. Amḍan n yimsiklen ay yetteddun s tmacint ad yernu daɣ seg 32 n yimelyunen deg useggas (akken yella ass-a) ɣer 80 n yimelyunen deg useggas deg tizi n 2020, ɣef leḥsab n ulɣu-a.
