Asebter amenzawi

Taqerrabt tageldant n Sifaks teḥwaǧ ahil n tigawin akken ad tt-nḥud

ƐIN TIMUCENT – Asmel asenzikan n Siga d tqerrabt tageldant n Sifaks, yellan deg uḥric n tgelda n yimasasilen (Numidya n utaram), i yellan deg twilayt n Ɛin Timucent, teḥwaǧ ahil n tidet n umesten d uḥareb, i d-nnan yimuzzag.

Asmel asenzikan d umezruyan n tqerrabt tageldant n Sifaks (lqern wis 3 qbel talalit n Ɛisa) yers deg tqacuct n tewrirt yesɛan 220 n yimitren i umi ttinin ‘’Skuna’’, ɣef yiri tayeffust n ’’Tafna’’ nnig n usmel n ’’Siga Takembrit’’.

Ters d taṣekka taɣelnawt, deg wayyur n meɣres 2014, tigemmi-a tura deg uɣawas n umesten d tririt n uzal i yisemlen isenzikanen i yesɛedda, deg useggas 2014, Ugraw aɣerfan n twilayt (APW). Llan yimahilen i yessefk ad qelɛen s lɛejlan akken ad ṣegmen asmel-a yesɛan azal agraɣlan, aya daɣen, ad yesseḥbes tigawin n uhuddu n yimsixeṣren i yessawḍen taqerrat-a ɣer liḥala-s.

Arwayen deg yinadiyen i d-yeḍran deg yiẓekwan n tqerrabt, zemren ‘’ad semlellin tamṣuka akken ur tjebber, ad ḍegren ilebda agerruj ayiwnan n tsegda n yiẓekwan imaziɣen d yifiniqen (libyco-punique) yellan (gar lqern wis kraḍ d wis sin qbel talalit n Ɛisa)’’, i d-yenna, Belkeddar Zoheir, d aɛeggal n tiddukla "Les amis de Beni Saf " (imeddukal n Bni Ṣaf).

Igulaz ur d-fkin ara akk lbaḍnat-nsen. Ar ass-a, ḍran-d kan yinadiyen i mmahlen yezzayriyen d yilalmaniyen deg useggas 1978. Aya yessaweḍ ɣer tifin n yiwen uxxam yesɛan ddeqs n texxamin, arqam ɣef leḥyuḍ, ifecka n tfellaḥt d wid n waman, d uqariḍ (idrimen) ideg yella wudem n ugellid Sifaks d mmi-s Firmin. ‘’D aqariḍ amezwaru n tefriqt n ugafa’’, i d-nnan yimuzzag.