Asebter amenzawi

Mali: ma ulac arkad d talwit, ad yernu laẓ

NEW YuRK (Iɣlanen Yeddukklen) – Asemyuddas alsan amnaḍan n Yiɣlanen Yeddukklen i Ssaḥel, Toby Lanzer, iɛeyyen-d d akken lemmer wid yemxaṣamen deg taluft n Mali ur ttḍafaren ara abrid n talwit d urkad, ala timerniwt ara yernu laẓ deg tmurt-a.

Mass Lanzer yenna-d, deg yiwen n ulɣu ay d-yeffɣen ass n ssebt deffir yiwet n terzi n 5 n wussan ay iga ɣef tmurt-a d akken amɣiwan agraɣlan la yettkemmil la yettɛawan imezdaɣen yenḍerren n Mali, maca yebded daɣ ɣer yidis n lmeǧhud i lmend n talwit d tneflit.

Yenna-d, seg yidis niḍen, d akken « yeqqel-as-d ussirem mi iwala d akken imɣiwanen imaliyen d tmetti taɣarimt ɛewwlen akken ad nadin ad ḥudden azalen n umsuref d umsefham deg tmetti ».

« S umɛawen d unabaḍ d yicriken n tneflit, yessefk ad nebded ɣer yidis n medden akken ad asen-neḍmen tameddurt yelhan, taneflit d tɣellist (laman) », ɣef wakken ay d-yenna. « Amɣiwan agraɣlan yessefk ad ikemmel ad yettɛawan tineggiwin talsanin akken ad sɛunt ayen ḥwaǧent i ussukkes n medden am wakken ay yessefk ad sselhun tafulmant n tegrawin ay yenḍerren s waṭas », ɣef wakken ay tt-id-yexdem Mass Lanzer.

Azal n 3,1 n yimelyunen n Yimaliyen ay mazal ddren deg laẓ, gar-asen 410.000 lluẓen mliḥ yerna ḥwaǧen lemɛawna war leɛḍil, deg wakud deg azal n 15.000 n yigerdan ay izemren ad nḍerren mliḥ seg lexṣaṣ n wučči, ɣef wakken ay d-tenna Tnarit n Yiɣlanen Yeddukklen i ussemyuddes n tɣawsiwin talsanin (OCHA) ay d-yennan d akken tagnit tessagad ugar deg temnaḍt n Timbuktu anda amḍan n wid yelluẓen iɛedda i uswir n tuɛjilin.

ɣef leḥsab n Mbaranga Gasarabwe, Tasumyuddast n Yiɣlanen Yeddukklen deg Mali, « lqella n tɣellist (laman) deg kra n temnaḍin n tmurt tusa-d d aɛewwiq i ussiweḍ n lemɛawna ɣer din, ladɣa ɣer kra n yimɣiwanen yenḍerren, yerna d aya ay yeǧǧan imdanen-a ad rnun ad nḍerren ugar ».

« Yessefk ad d-yili usserked d tɣellist akken ad zemren yimezdaɣen ad sɛun imeẓla (ssrabes) n llsas d wayen ay ḥwaǧen akken ad ddren », ɣef wakken ay d-tenna.