Asebter amenzawi
Ldzayer « tezga teḥdeṛ » deg uxeddim n uzraɛ n talwit deg Ssaḥel
LDZAYER – Ldzayer d tamurt ay « yezgan teḥdeṛ » deg umahil n uzraɛ n talwit d tɣellist (laman) deg temnaḍt n Ssaḥel, ladɣa deg Mali d Libya, ɣef wakken ay d-yenna ass n lḥedd deg Ldzayer umaru amatu n uɣlif anijiri n tɣawsiwin n uzɣar, n umyalel, n unnummed afriqi d Yinijiriyen deg uzɣar, Ibrahim Sani Abani.
Deg yiwet n tseɣrut i tɣemsa deffir ma ifuk adiwenni-nnes d umaru amatu n uɣlif n tɣawsiwin n uzɣar, Mass Sani Abani yeckeṛ-d attekki n Ldzayer deg yiriri n talwit d tɣellist deg Mali, d lmeǧhud ay yessawḍen ɣer ustenyi n umtawa n talwit d umsuɣal, d uttekki-nnes daɣ deg unadi n tifrat ara idumen deg Libya.
Imḍebber-a anijiri yenna-d dakken adiwenni-nnes d umtil-nnes adzayri d win aydeg ay d-ssukken tiṭ ɣef tegnit n umyalel (amɛawen) gar snat-a n tmura, am wakken ay d-yesmekti dakken tirzi ay d-iga deg Yennayer yezrin uselway anijiri (Mahamadou Issoufou) ɣef Ldzayer teǧǧa-t ad yeg « ambaddel yesɛan lfayda » d uselway Abdelaziz Bouteflika.
Msefhamen sin-a n yiselwayen « ad d-sduqqsen amyalel ucrik yerna ad ɣellten tizemmar timeqranin ay yellan deg unrar-a », ɣef wakken ay d-yenna.
Mass Sani Abani yenna-d daɣ dakken yessukk-d tiṭ, d Mass Senouci Bereksi, ɣef umyalel deg ulmud d ussegmi (tteṛbeyya), am wakken ay d-yeckeṛ ttejṛiba n Ldzayer deg unrar-a, ladɣa imi « tagrawt tameqrant akk n Yinijiriyen ay la izerrwen deg uzɣar attan deg Ldzayer », ɣef wakken ay d-yenna.
« Nebder-d daɣ 3 n yisenfaren imeqranen, wi d asenfar n uqadus n lgaz, abrid ara yekken ɣef Uneẓruf Ameqran d usɛeddi n yisirgen isekdanen », ɣef wakken ay d-yenna.
Mi yettwatter ɣef tuggza n tegrawt tarebrabt n « Boko Haram » deg temnaḍt-a, yenna-d dakken Nijir « la txeddem ɣer yidis n tmura n Tseqqamut n temda n ugelmim n Čad i ussenger n tegrawt-a tuḥqirt n Boko Haram ».
Iɣfawen n uwanak n Tseqqamut n temda n ugelmim n Čad la d-tessewjad iɣallen i ussenger n Boko Haram i lebda », ɣef wakken ay d-yenna, am wakken ay d-yeckeṛ « tamsetlelt n Ldzayer ay ibedden ɣer yidis n tmura n temnaḍt-a ».
