Asebter amenzawi

Ikemmel unqas n waǧaw n yisafaren deg uzgen amezwaru n 2015

LezZAYER – Tafatuṛt n yisafaren tenqes-d ɣer 842,124 n yimelyunen n yidulaṛen deg uzgen amezwaru n 2015, yili aseggas yezrin deg tallit-nni, Ldzayer tuǧew-d 1,2 d amelyaṛ n yidulaṛen.S waya, aǧaw n yisafaren yenqes-d s 30,05% ɣef wakken ay d-tenna Tedwant tadzayrit i Tnegga n Yisalan n Ldzayer.

Ula d tasmekta n yisafaren ay d-yettwaǧwen tenqes, imi 13.434 n yiṭunen ay d-yettwaǧwen deg 6 n wayyuren imezwura n useggas-a, yili deg tallit-a n useggas yezrin ttwaǧwen-d 13.958 n yiṭunen (d anqas n 3,75%) ɣef wakken ay d-yenna Wammas aɣelnaw n tsenselkimt d taddadanin n tedwant (Cnic).

Anqas-a n waǧaw yebda-d seg tazwara n useggas-a, yerna yerza akk leṣnaf n yisafaren, ladɣa isafaren n udawi n yimdanen (95% seg yisafaren ay d-yettwaǧawen).

Tafatuṛt n yisafaren n yimdanen tesqam-d 799,33 n yimelyunen n yidulaṛen (12.280 n yiṭunen) yili ilindi deg tallit-nni, tesqam-d tfatuṛt 1,15 d amelyaṛ n yidulaṛen (13.061 n yiṭunen) (d anqas n 31%).

Ifarisen izunsafranen sqamen-d aseggas-a 27,81 n yimelyunen yili deg uzgen amezwaru n yilindi sqamen-d 33,47 n yimelyunen n yidulaṛen, dɣa neqsen-d s 17%.

Ma d isafaren n yiɣersiwen tenqes-d tfatuṛt-nsen ɣer 14,97 n yimelyunen n yidulaṛen yili ilindi, deg tallit-nni, sqamen-d 15,29 n yimelyunen n yidulaṛen (d andaq n 2,09%).

I usmekti, tafatuṛt n yisafaren tesqam-d 2,6 n yimelyaṛen n yidulaṛen deg 2014 yerna terna 10,44% ɣef leḥsab n 2013.