Asebter amenzawi
Uraren Ulimpiyen n 2016: Amar Brahmia deg temlilit n yimḍebbren deg Rio
LDZAYER TAMANEɣT – Imkellef s ussewjed ulimpi deg Useqqamu Ulimpi d Unaddal n Ldzayer (COA), Amar Brahmia, ad yettekki deg temlilit n yimḍebbren n tuɣdaḍin deg Rio de Janeiro gar 18 d 21 ɣuct i lmend n ussewjed n Wuraren Ulimpiyen n unebdu n 2016, ɣef wakken ay aɣ-d-ixebber ass n lḥedd.
Timlilit-a ay yessuddes useqqamu n ussuddes (LOCOG) ad ttekkin deg-s yigensasen n 200 n yiseqquma iɣelnawen ulimpiyen i lmend n ussewjed n Wuraren Ulimpiyen 2016 ara d-yilin deg Rio (Brizil).
Iɣellaten n tuɣdaḍin d nitni ay d imḍebbren n tmegliwin tiɣelnawin n waddalen d yimḍebbren n teɣlamin n tmura-nsen ara yettekkin deg Wuraren. Timlilit-a n yiɣellaten n tuɣdaḍin ad teqqim 4 n wussan yerna ad sqerdcen deg-s aṭas n temsal am ussezdeɣ n yinaddalen, amesni, aqbal unṣib d tmeɣriwin gar temsal niḍen ay yessefken ad tent-id-swejden. Timlilit-a ad d-tili qrib aseggas uqbel ma bdan Wuraren-a Ulimpiyen.
Iɣellaten-a n tuɣdaḍin ad rzun daɣ ɣef yimukan ay yettwaqeblen i lmend n wuraren-a, yerna amkan amezwaru d Afrag ulimpi d taddart n yinaddalen.
« Ta d timlilit ara aɣ-yeǧǧen ad nessefqed imukan-a yerna ad ten-nennam, am wakken ara nennam tamdint n Rio d umesni-nnes. Aya d yili am usarag aydeg ara aɣ-d-xebbren ɣef wayen yellan d amaynu ɣef Wuraren Ulimpiyen n Rio n 2016 akken ad swejdent iman-nsent tmagliwin-nneɣ mliḥ », ɣef wakken ay d-yenna Amar Brahmia, am wakken ay d-yenna dakken tiɣimit-a deg Brizil ad teǧǧ iɣellaten n tuɣdaḍt ad frun seg tazwara kra n wuguren ay izemren ad d-ilin deg wussan-nni n wuraren.
« Timlilit-a tesɛa azal acku ad tɛawen timura n umaḍal akken ma llant akken ad swejdent inaddalen-nsen i Wuraren Ulimpiyen n useggas ay d-yetteddun. Ulac ccek dakken Aseqqamu n Ussuddes ad yeg akk ayen umi yezmer akken ad iɛawen inaddalen yerna ad yeḍmen assuddes igerrzen n Wuraren-a imeqranen », ɣef wakken ay tt-id-yextem uɣella n tmagla tadzayrit ara yettekken deg teẓrigt tis 28 n Wuraren Ulimpiyen ara d-yilin gar 5 d 21 ɣuct 2016.
