ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵉⴼⴻⵍⵍⴰⵃⴻⵏ ⴰⴷ ⵇⵇⵍⴻⵏ ⵣⴻⵎⵔⴻⵏ ⴰⴷ ⵙⵙⴻⵏⵣⴻⵏ ⵍⵖⴻⵍⵍⴰ-ⵏⵙⴻⵏ ⵙⵔⵉⴷ ⴷⴻⴳ ⵙⵙⵓⵇ ⵏ ⵓⵊⴻⵎⵎⴰⵍ

ⵚⵟⵉⴼ – ⵍⴰ ⴷ-ⵢⴻⵜⵜⵉⵍⵉ ⵓⵎⵛⵉⵡⴻⵕ ⵓⵙⵙⴰⵏ-ⴰ ⴷ ⵓⵖⵍⵉⴼ ⵏ ⵜⴼⴻⵍⵍⴰⵃⵜ ⵉ ⵍⵎⴻⵏⴷ ⵏ ⵜⵓⴽⵛⵉ ⵏ ⵜⵜⴻⵙⵔⵉⵃ ⵉ ⵢⵉⴼⴻⵍⵍⴰⵃⴻⵏ ⴰⴽⴽⴻⵏ ⴰⴷ ⵙⵙⴻⵏⵣⴻⵏ ⵙ ⵜⵉⵎⵎⴰⴷ-ⵏⵙⴻⵏ ⵍⵖⴻⵍⵍⴰ-ⵏⵙⴻⵏ ⴷⴻⴳ ⵍⴻⵙⵡⴰⵇ ⵏ ⵓⵊⴻⵎⵎⴰⵍ ⵏ ⵍⵅⴻⴹⵔⴰ ⴷ ⵢⵉⴳⵓⵎⵎⴰ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴰⵙⵙ ⵏ ⵜⵜⵍⴰⵜⴰ ⴷⴻⴳ ⵚⵟⵉⴼ ⵓⵏⴻⵖⵍⴰⴼ ⵏ ⵜⵏⴻⵣⵣⵓⵜ, ⴱⴰⴽⵀⵜⵉ ⴱⴻⵍⴰⵉⴱ. ⴰⵃⴻⵣⵣⵉⴱ-ⴰ ⴷ ⵡⵉⵏ ⴰⵔⴰ ⵢⴻⴵⴵⴻⵏ ⵙⵙⵓⵎⴰⵜ ⴰⴷ ⵇⴻⵄⴷⴻⵏⵜ ⵢⴻⵔⵏⴰ ⴰⴷ ⵜⴼⴰⴽ, ⵙ ⵡⴰⵢⴰ, ⵜⵓⴼⴼⵔⴰ ⵏ ⵙⵙⴻⵍⵄⴰ ⴷ ⵓⵙⵙⴻⵏⵣⵉ-ⵏⵏⴻⵙ ⵙ ⵙⵙⵓⵎⴰ ⵖⵍⴰⵢⴻⵏ ⵎⵉ ⴰⵔⴰ ⵜⵅⴰⵚⵚ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴻⵖⵍⴰⴼ ⴷⴻⴳ ⵢⵉⵡⴻⵜ ⵏ ⵜⴻⵔⵣⵉ ⵏ ⵓⵙⵙⴻⴼⵇⴻⴷ ⵏ ⵓⵛⴰⵏⵟⵉ ⵏ ⵍⴻⴱⵏⵉ ⵏ ⵙⵙⵓⵇ ⵏ ⵓⵊⴻⵎⵎⴰⵍ ⵏ ⵢⵉⴳⵓⵎⵎⴰ ⴷ ⵍⵅⴻⴹⵔⴰ. ⵙⵙⵓⵇ-ⴰ ⴰⴷ ⵢⵉⵍⵉ ⴷ ⵙⵙⵓⵇ ⴰⵖⴻⵍⵏⴰⵡ, ⵢⴻⵔⵏⴰ ⴰⴷ ⵢⴻⴹⴹⴻⴼ 30 ⵏ ⵢⵉⵇⴻⵟⵟⴰⵔⴻⵏ ⴷⴻⴳ ⵓⵎⴽⴰⵏ ⵓⵎⵉ ⵜⵜⵉⵏⵉⵏ ⵄⵉⵏ ⵚⵚⴼⵉⵃⴰ (ⵖⴻⵔ ⵜⵓⴼⴼⵖⴰ ⵏ ⵓⵏⵥⵓⵍ ⵏ ⵜⴻⵎⴷⵉⵏⵜ ⵏ ⵚⵟⵉⴼ), ⵢⴻⵔⵏⴰ ⴷ ⵢⵉⵡⴻⵏ ⵙⴻⴳ 8 ⵏ ⵍⴻⵙⵡⴰⵇ ⵏ ⵚⵚⴻⵏⴼ-ⴰ ⴰⵢ ⵍⴰ ⴱⴻⵏⵏⵓⵏ ⴷⴻⴳ ⵜⵡⵉⵍⴰⵢⵉⵏ ⵢⴻⵎⴳⴻⵔⵔⴰⴷⴻⵏ ⵏ ⵜⵎⵓⵔⵜ, ⵖⴻⴼ ⵡⴰⴽⴽⴻⵏ ⴰⵢ ⴰⵖ-ⴷ-ⵏⵏⴰⵏ ⴷⴻⴳ ⵓⵎⴽⴰⵏ-ⵏⵏⵉ. ⵙⵙⵓⵇ-ⴰ ⴰⴷ ⴷ-ⵢⴻⵡⵊⴻⴷ ⴷⴻⴳ ⵓⵣⴳⴻⵏ ⵡⵉⵙ ⵙⵉⵏ ⵏ 2016, ⵢⴻⵔⵏⴰ ⵢⴻⴷⴷⴰ ⴷⴻⴳ-ⵙ ⵓⵎⴰⵀⵉⵍ (ⴰⵅⴻⴷⴷⵉⵎ) ⵙ 50%. ⴰⵙⵎⵉ ⴰⵔⴰ ⵉⴼⴰⴽ, 3000 ⵏ ⵢⵉⵎⵓⴽⴰⵏ ⵏ ⵓⵎⴰⵀⵉⵍ ⵉⴷⵓⵎⴻⵏ ⴰⵔⴰ ⴷ-ⵢⴻⵏⵏⵓⵍⴼⵓⵏ ⴷⴻⴳ-ⵙ ⴰⵎ ⵡⴰⴽⴽⴻⵏ ⴰⵔⴰ ⵜⵜⵄⴻⴷⴷⵉⵏ ⵙⴻⴳ-ⵙ 500.000 ⵏ ⵢⵉⵟⵓⵏⴻⵏ ⵏ ⵢⵉⴳⵓⵎⵎⴰ ⴷ ⵍⵅⴻⴹⵔⴰ ⵉ ⵓⵙⴻⴳⴳⴰⵙ. ⵎⴰⵙⵙ ⴱⴻⵍⴰⵉⴷ ⵉⵃⴻⵜⵜⴻⵜ-ⴷ ⵍⴰⴷⵖⴰ ⵖⴻⴼ ⵡⴰⵣⴰⵍ ⴰⵢ ⵙⵄⴰⵏ ⵍⴻⵙⵡⴰⵇ-ⴰ, ⵢⴻⵔⵏⴰ ⵢⴻⵏⵏⴰ-ⴷ ⴷ ⴰⴽⴽⴻⵏ ⴰⴽⴽ ⵜⴰⵏⴻⵣⵣⵓⵜ (ⵜⵜⵊⴰⵕⴰ) ⵏ ⵓⵊⴻⵎⵎⴰⵍ ⴰⴷ ⵜⴻⵇⵇⴻⵍ ⴰⴷ ⴷ-ⵜⴻⵜⵜⵉⵍⵉ ⴷⴻⴳ ⵢⵉⵎⵓⴽⴰⵏ ⴰⵎ ⵡⴰ, ⴷ ⵉⵎⵓⴽⴰⵏ ⴰⵢⴷⴻⴳ ⴰⵔⴰ ⵢⵉⵍⵉ ⵜⵜⴰⵡⵉⵍ ⵏ ⵓⵅⵣⴰⵏ ⴷ ⵓⵃⵔⴰⵣ ⵏ ⵜⵖⴰⵔⴰ ⵏ ⵍⵖⴻⵍⵍⴰ. ⴰⵢⴰ ⵢⴻⵙⵄⴰ ⴰⵣⴰⵍ, ⵖⴻⴼ ⵍⴻⵃⵙⴰⴱ ⵏ ⵓⵏⴻⵖⵍⴰⴼ, ⵢⴻⵔⵏⴰ ⵢⴻⵣⵎⴻⵔ ⴰⴷ ⵉⵄⴰⵡⴻⵏ ⴷⴰⵖ ⴰⵙⵙⵉⴵⴻⵡ ⵏ ⵙⵙⴻⵍⵄⴰ ⵖⴻⵔ ⵜⵎⵓⵔⴰ ⵏ ⵓⵣⵖⴰⵔ. ⴰⵏⴻⵖⵍⴰⴼ ⵢⴻⵙⵎⴻⴽⵜⵉ-ⴷ ⴷⴰⵖ ⴷ ⴰⴽⴽⴻⵏ ⴰⵡⴰⵏⴰⴽ (ⴷⴷⵓⵍⴰ) ⵍⴰ ⵢⴻⵜⵜⴽⴻⵎⵎⵉⵍ ⵜⵉⴷⴷⵉⵜ-ⵏⵏⴻⵙ ⵉ ⵍⵎⴻⵏⴷ ⵏ ⵓⵃⵔⴰⵣ ⴷ ⵓⵙⵎⴰⵍ ⵏ ⵙⵙⴻⵍⵄⴰ ⵜⴰⵖⴻⵍⵏⴰⵡⵜ, ⴰⵎ ⵡⴰⴽⴽⴻⵏ ⴰⵔⴰ ⵉⴽⴻⵎⵎⴻⵍ ⴰⴷ ⵢⴻⵜⵜⵄⴰⵡⴰⵏ ⴷⴻⴳ ⵙⵙⵓⵎⴰ ⵏ ⵢⵉⴼⴰⵔⵉⵙⴻⵏ ⵉⴳⴻⵊⴷⴰⵏⴻⵏ ⵏ ⵜⵓⵞⵞⵉⵜ, ⵓⵍⴰ ⵎⴰ ⵢⴻⵏⵇⴻⵙ ⵓⵎⴻⴷⵅⵓⵍ ⵏ ⵓⵒⵉⵜⵕⵓⵍ. ⵙⴻⴳ ⵢⵉⴷⵉⵙ ⵏⵉⴹⴻⵏ, ⵢⴻⵏⵏⴰ-ⴷ ⴷ ⴰⴽⴽⴻⵏ ⵍⴰ ⴷ-ⵜⵜⵉⵍⵉⵏ ⵢⵉⵃⴻⵣⵣⵉⴱⴻⵏ ⵉ ⵓⵙⵙⵓⴷⴷⴻⵙ ⵏ ⵓⵎⴰⵀⵉⵍ ⵏ ⵜⴽⴻⴱⴱⴰⵏⵉⵢⵉⵏ ⴰⵢ ⵢⴻⵙⵏⵓⵣⵓⵢⴻⵏ ⵜⵉⴽⴻⵕⵕⵓⵙⵉⵏ. ⴰⵖⵍⵉⴼ ⵏ ⵜⴻⵎⴳⵓⵔⵉ ⴷ ⵍⵎⵉⵏⴰⵜ ⴷ ⵡⵉⵏ ⵏ ⵜⵏⴻⵣⵣⵓⵜ ⵓⵔ ⵍⴰ ⵙⵙⴻⴼⵔⴰⵢⴻⵏ ⴰⵔⴰ ⴰⴷ ⵙⵏⴻⵇⵙⴻⵏ ⴰⴵⴰⵡ ⵏ ⵜⴽⴻⵕⵕⵓⵙⵉⵏ, ⵎⴰⵛⴰ ⵍⴰ ⵅⴻⴷⴷⵎⴻⵏ ⴰⴽⴽⴻⵏ ⴰⴷ ⵢⵉⵍⵉ ⵓⵔⵎⵓⴷ ⵏ ⵜⴽⴻⴱⴱⴰⵏⵉⵢⵉⵏ ⵏ ⵓⵙⵙⴻⵏⵣⵉ ⵏ ⵜⴽⴻⵕⵕⵓⵙⵉⵏ ⴷ ⴰⴼⵔⴰⵡⴰⵏ ⵓⴳⴰⵔ, ⴰⵎ ⵡⴰⴽⴽⴻⵏ ⴰⵢ ⵍⴰ ⵙⵙⴻⵃⴱⵉⴱⵉⵔⴻⵏ ⵖⴻⴼ ⵜⵖⴻⵍⵍⵉⵙⵜ (ⵍⴰⵎⴰⵏ) ⵏ ⵢⵉⵎⴻⵛⵜⵓⵔⴰ-ⵏⵙⴻⵏⵜ.