Asebter amenzawi
Ad ssersen 600 n tmacinin n ufraq n yidrimen
LezZAYER – Yenna-d Abdenacer Sayeh, anemhal n Algerie-Poste, ass n ssebt, dakken takebbanit-nnes ad tessers 600 n tmacinin timaynutin n ufraq n yidrimen.
Deg yiwet n tdiwennit ay iga d Tnegga n Yisalan n Ldzayer, ixebber-d dakken tadbelt-nnes tebda-d tiddit i ussetrer d usmal n yimeẓla n waṭas n tnariyin n tesreqqest (lbusṭa) deg wakk timnaḍin n tmurt, yerna i lmend n waya, ad tessers 600 n tmacinin n ufraq n yidrimen deg tnariyin yemgerraden n tesreqqest deg wakk tamurt.
Uqbel ma ifuk useggas-a, ad yers uferraq n yidrimen deg yal tanarit tagejdant n yal taɣiwant, ɣef wakken ay d-yenna yimḍebber-a ay d-yesmektin dakken asenfar-a yudef deg ukatar n lmeǧhud n ussenqes n teɛkemt ɣef tnariyin n tesreqqest d usmal n umeẓlu anagdud.
Mass Sayeh iwekked-d daɣ dakken tadbelt teddem iḥezziben deg tmehliwin n tesreqqest n yal tawilayt akken ad ssefqaden aṣeggem n tmacinin-a yerna ur ttuɣalen ara medden ɣer tigganit wa deffir wayeḍ ma xeṣrent tmacinin.
Dɣa yella-d lmeǧhud i lmend n usmatu n usseqdec n tesnestwilin timaynutin n teɣwalt i usselhu n yimeẓla i lfayda n medden, ladɣa deg wayen yerzan dellu ɣef umiḍan n CCP s Internet neɣ s tebṛat n usawal (asamas), d uwjad n yikaṛniyen n yicaken deg 15 n wussan, ɣef wakken ay d-yena yimḍebber-a.
D acu kan, yesteɛṛef daɣ dakken kra n tnariyin n tesreqqest yella-d fell-asen lḥeṛs, ladɣa deg tallit n lexlaṣ n yibuṛsyunen n testaɣt (lantrit) d yixeddamen (gar 14 d 18 n yal ayyur) d mi ara d-qerrbent leɛyudat (tameẓyant d tmeqrant).
Algérie-Poste la txeddem akken ad tefru taluft-a s urẓam n tnariyin n tesreqqest sdat yigmamen anda ay llan aṭas n yimezdaɣen d tkebbaniyin ay yessexdamen aṭas n yixeddamen, ɣef wakken ay d-yenna.
Algerie-Poste tesɛa iẓeḍwan n tesreqqest imxeyyren akk deg tmura taɛṛabin s 3650 n tnariyin deg wakk timnaḍin n tmurt, yerna s tlemmast n yiwet n tesreqqest i yal 10500 n yimezdaɣen, ɣef wakken ay d-yenna.
Deg wayen yerzan aḥbas n uẓeḍḍa n usseddu n tedrimt n tesreqqest, imḍebber yenna-d dakken takebbanit-nnes tessefɛel yiwen n uɣawas s umɛawen d Algerie Telecoms i ussetrer n uẓeḍḍa n tnellit tasekdant akken ad faken wuguren-a.
Aẓeḍḍa n usseddu n tedrimt yeqqel yetteddu xir n zik, ɣef wakken ay d-yenna yimḍebber-a, am wakken ay d-yerna dakken ass n 14 Yulyu yezrin, 1,8 d amelyun n yijbaden n yidrimen ay d-yellan deg tnariyin n tesreqqest yerna ttwajebden-d 25 n yilemyaṛen n yidinaṛen.
Deg wayen yerzan lexṣaṣ n yidrimen deg kra n tnariyin n tesreqqest, yenna-d dakken Tabanka n Ldzayer la tetteg lmeǧhud d ameqran akken ad d-tessiweḍ idrimen i tnariyin n Algerie-Poste, d acu kan, assiweḍ n yidrimen yesɛa talast deg wakud (kra kan n tsaɛtin deg wass) ladɣa deg wayen yerzan, s umata, tinariyin ibeɛden.
Deg wayen yerzan kra n yixeddamen ay yettakren idrimen seg yimiḍanen n medden, yenna-d Mass Sayeh yenna-d dakken ilugan n Algerie Poste ttḥettimen win ara yakren ad d-yerr idrimen-nni ay yuker yerna win ara igen aya ad yettwaɛaqeb ama ɣer tedbelt n tkebbanit, ama deg ccṛeɛ.
Seg yidis niḍen, Mass Sayeh yenna-d dakken asenfar-nni n tbanka n Algerie Poste mazal-it deg tezrawt yerna ad d-ttunefken ttfaṣil-nnes asmi ara yewjed kullec. Assebded n tbankiwin am ti yeḍḍef acḥal n yiseggasen deg tmura niḍen am Fṛansa d Lalman, ɣef wakken ay d-yenna.
Deg wayen yerzan ammager n yiɣermanen deg tnariyin n tesreqqest, yenna-d yimḍebber n Algerie Poste dakken ixeddamen n tesreqqest ttilin-d i lmend n uɛawen n medden yerna yessefk ad t-mmagren s wudem igerrzen akk.
Tadbelt n tesreqqest tessebded-d tamehla n ussileɣ n yixeddamen akken ad ten-id-swejden i uxeddim n tɣara.
Deg wayen yerzan uguren ay iḥuzan aḥric n tesreqqest deg yiseggasen-a ineggura d lateṛ n diri ayyes d-yegla waya ɣef medden, Mass Sayeh iwekked-d dakken yebɣa ad yili umciweṛ gar tkebbanit-nnes d yinmula (ssandikat) i ferru n temsal yerzan ixeddamen d tkebbanit.
