Asebter amenzawi
Khaled Mechaal yenna-d yella wawal d Isṛayil i uḥbas n yimenɣi deg Ɣezza
LEZZAYER – Taɣlamt n Ldzayer n tcirt n yiswi (irgazen) terbeḥ-d talɣuɣa tagraɣlant n temdint n Sharm el Cheikh deg Maṣer, mi terna deg tneggarut, taɣlamt tuṛdunit s 17 ɣer 16 (7-8 deg uzgen n wakud) deg temlilit ay d-yellan ass n ljemɛa.
Talɣuɣa-a tella-d deg ukatar n ussewjed i Telɣuɣa n Tefriqt (irgazen d tlawin) ara d-yilin deg Ldzayer deg wayyur n Wembeṛ ay d-yetteddun d uɛeddi ɣer Wuraren Ulimpiyen n Yimeɛdaṛ n Rio n 2016. Talɣuɣa-a n Sharm el Cheikh tella-d daɣ « d akayad aydeg d-tella lfayda » i yimariren n Ahmed Ferdjouni d Aissa Soualmi.
Iswi n telɣuɣa-a n ussewjed netta d attekki deg umḍan ameqran n temliliyin akken akk imariren n teɣlamt ad ttekkin deg unrar yerna ad uraren aṭas n tsaɛtin.
« D tidet, aswir ur igerrez ara mliḥ, ladɣa imi ay ɣabent tmura am Lɛiraq, Ṛumanya d Iṛan, maca cwiṭ-nni n temliliyin aydeg turar teɣlamt-nneɣ ǧǧant isleɣmayen ad sɛun takti igerrzen cwiṭ ɣef wazal n yimariren-a yerna ad ẓren ayen ay ḥwaǧen i lmend n tannanin d telɣuɣiwin ay d-yetteddun i lmend n ussewjed n teɣlamt », ɣef wakken ay d-yenna unemhal atekni aɣelnaw, Zoubir Aichaine.
Menɣir Ldzayer, talɣuɣa n Sharm el Cheikh ttekkant daɣ deg-s Maṣer d Luṛdun, d teɣlamt tamaṣrit n n Al Imane (ay yessuddsen talɣuɣa-a).
Deg temlilit-nnes tamezwarut, taɣlamt n Ldzayer, ula ma ur ttekkan ara deg-s Abdelhamid Larbi, Mohamed Mokrane d Ishak Boutaleb (ay yesgunfan), terna s tefses taɣlamt tamaṣrit (10 ɣer 0).
Deg temlilit-a, isleɣmayen ssadfen-d imariren ilemẓiyen am Imadeddine Godmane d Djalal Boutadjine ay yuraren i tikkelt tamezwarut deg teɣlamt taɣelnawt.
Deg temlilit tis snat, Idzayriyen ɛawden rnan Maṣer s 10 ɣer 5.
Deg temlilit-nnes tis 3, Ldzayer terna Luṛdun s 10 ɣer 7 s uttekki n yimariren ay yuraren akken igerrez (Godmane, Djelali Chenaoui d Boutadjine). Ula ma Uṛduniyen ssadfen iswan deg 8 n tedqiqin timezwura, Idzayriyen ssawḍen ad ssalin agmuḍ-nsen yerna ad rnun axṣim-nsen.
Timlilit tis snat ay rnant urarent-tt Ldzayer d Luṛdun akken ad d-tban tin ara irebḥen d tin aydeg Ldzayer tessaweḍ ad ternu Luṛdun s lḥif s ugmuḍ n 17 ɣer 16, maca tessaweḍ daɣ ad d-terbeḥ talɣuɣa-a.
